Read Tobelo O KEJADIAN 25 Bible Online

O KEJADIAN 25 - Tobelo bible

O KEJADIAN 25

¹O Abraham wokawingoli de o ngoheka momatengo ami romanga o ngo Ketura.

²Ngoihekata gënanga mongohaka ami ngoha-ngohaka manga roma-romanga: O Zimran, o Yoksan, o Medan, o Midian, o Isybak, deʼ o Suah.

³O Yoksan o Syeba deʼ o Dedan manga ama, deʼ o Dedan ai difauku ganga o Asyur manyawa, o Letus manyawa, deʼ o Leum manyawa.

⁴O Midian ai ngoha-ngohaka ganga: o Efa, o Efer, o Henokh, o Abida, deʼ o Eldaa. Onanga mata-mata o ngo Ketura ami ngohaka de ami danongo.

⁵Ngarokä o Abraham wihipuhaka hagala ai arata o Ishakika,

⁶maöraha ünanga wowangohi ünanga wahidöaka o ngongike ma ngöe aingoha-ngohakika wamömake-make de ai heka-hekata mahomoa. Ipaha wähuloko ai ngoha-ngohaka gënanga imatururu o Kanaan madaera o wange mahiwaroko idaduoka, hupaya iwitingaka ikurutika aingohaka o Ishak.

⁷O Abraham wohonenge ai umuru ikurutil̄eoka, enagënanga o taongo o ratuhu moi deʼ moritumidi deʼ motoa.

⁹Unanga aingoha-ngohaka iwilungunu, enagënanga o Ishak deʼ o Ismael, o Makhpela ma Arukoka magogere o dumuleoka o Mamre o wange mahiwaroko idaduoka. Mahira o dumule gënanga madutu o Efron o Zohar aingohaka, o Het manyawa,

¹⁰ mä o Abraham waijaka o Het manyawaka gënanga. O ngo Sara o Abraham ngoi hekatö imi lungunu dokengoka.

¹¹O Abraham de wohonengoka, ma Jou Madutu wihibarakati o Ishak, o Abraham aingohaka. O öraha gënanga o Ishak wogogere imahi tigi-tigika de o humu yahöheto-hetongo ”Unanga Wohitö tailako Ngohi”.

¹²O Ismael ganga o Abraham deʼ o ngo Hagar manga ngohaka, o Mesir mangoheka, o ngo Sara ngomi gilaongo gënanga.

¹³O Ismael aingohaka yangimoi de hinoto yäheto-hetongo nenangoka dau itatoro imoteke ima kil̄au: o Nebayot, o Kedar, o Adbeel, o Mibsam, o Misyma, o Duma, o Masa, o Hadad, o Tema, o Yetur, o Nafis deʼ o Kedma. O ngoha-ngohaka gënanga yodadi o ama o berera de o hoana ngimoi de hinoto manga ete de manga tohora, deʼ o kapongo deʼ toönanga manga tau madoomu yahetongo imoteke toönanga manga roma-romanga.

¹⁷O Ismael ai umuru o taongo o ratuhu moi de moruange de tumidi maöraha ünanga wohonenge.

¹⁸Ai difauku yogogere o Hawila deʼ o Syur madaera mahi dogorona o Mesir o wange mahiwaroko idaduoka yödumutu o Asyurika. Onanga yowango imakoki tingakika de o Abraham aidifauku mahomoa.

¹⁹Nënanga o Ishak, o Abraham aingohaka ai wowango majarita.

²⁰O Ishak ai umuru o taongo moruata maöraha ünanga wokawingi de o ngo Ribka, o Laban ngoi hiranga o Betuel ngoi ora, womatengo o Aram manyawa o Mesopotamiaino.

²¹Karana o ngo Ribka mamakeua o ngohaka, o Ishak womäniata ma Jouika mangale ngoihekata. Deʼ ma Jou wohimoteke o Ishak ai niata, hiädono o ngo Ribka moröehe.

²²Munanga moröehe amingohaka ihago, deʼ o ngoha-ngohaka gënanga imakil̄auowahi, önanga imatago-tagoko amingohaka mangï magoronaka. O ngo Ribka motemo, ”Yadodoa hoʼ o hali nënanga kokiani idadi ahidirioka?” Daha munanga mogahoko o hidumutu ma Jouika.

²³ Ma Jou womitemo munangika, ”O berera de o hoana hinoto naga aningohaka mangï magoronaka; ngona aha nongohaka o berera de o hoana hinoto imabori haturu; ai dodoto iholoi wokuata de ai riaka woria-riaka wï leleani wodödodoto.”

²⁴O ngo Ribka ami öraha yadono momagilianga, deʼ muna mongohaka o nauru yahinoto yohago.

²⁵Woria-riaka hatoli ai doka-dokara, deʼ aikai hokä o juba magö gogo. Hababu gënanga ünanga iwihi romanga o Esau.

²⁶Maöraha o ngohaka mahinotoka womakil̄au, ai giama yasöika o Esau ai bobö. Hababu gënanga ünanga iwihi romanga o Yakub. O Ishak ai umuru o taongo mori butanga maöraha önanga ima kil̄au.

²⁷O ngohaka yahinoto gënanga idogoyolamoko. O Esau wodadi yolimo-limoro o aiwani o honganika deʼ wöigo wogogere o tonaka ilua-luasoka, mä o Yakub ai biaha worïdi deʼ wöigo wogogere o tauoka.

²⁸O Ishak iholoi wïhayangi o Esau hababu o Ishak wöigo wol̄omo o hiode ma akeme. Mä o ngo Ribka iholoi mï hayangi o Yakub.

²⁹O wange moiuku maöraha o Yakub magogiriaka wohakai o gauku otanuma madoka-dokara, o Esau woböa ai niniaino. Unanga duru iwihahini.

³⁰Witemo o Yakubika, ”Ngohi duru ihihahini. Tomagahoko mahuhutulu o tanuma madoka-dokara gënanga.” (Genanga mahababu ünanga iwi hetongo o Edom.)

³¹O Yakub wohaluhu, ”Kayaoa, itiyakunu nohidöaka ihira ani haku hokä o ngohaka o riaka.”

³²O Esau wotemo, ”Haduli okia o haku gënanga ngohino. Ngohi ihihahini yatoka tohonenge!”

³³ O Yakub wotemoli, ”Nokoboto ihira kano hihidöaka ani haku ngohino.” O Esau wokoboto deʼ wihidöaka ai haku o Yakubika.

³⁴De iböto gënanga o Yakub wihidöaka unangika o roti deʼ o hidoku moi o gauku o tanuma madoka-dokara gënanga. O Esau wol̄omo deʼ wokere daha woiki. Hoko gënanga o Esau wolegaikaua ai haku hokä o ngohaka o riaka.