Read Tobelo O KEJADIAN 26 Bible Online

O KEJADIAN 26 - Tobelo bible

O KEJADIAN 26

¹O bereraka gënanga idadioli o habirokata hokä idadadioka o Abraham ai orahoka. O Ishak wïhimanga o Abimelekh, o Filistin manyawa manga koano, o Gerar mabereraka deʼ womahi demo hupaya wogogere dokengoka.

²O hali gënanga wadiai karana ma Jou womahi matokoka Ai diri unangika deʼ wïtemo, ”Uha noiki o Mesirika nogogere o bereraka nënanga, hokä Tonihiparetaka ngonaika.

³ Ngohi aha tonï göana deʼ Tonihibarakati. Mata-mataika o daera nënanga aha Tonihidöaka ngonaika deʼ aningohaka de ani danongika. Ngohi aha tohiganapu Ahi jaji tohidoä-doäkoka o Abrahamika ani ama.

⁴Ngohi aha tonihidöaka ngonaika o ngohaka de o danongo mangöe hokä o murumu o dihangoka, deʼ mata-mataika o daera nënanga aha Tahidöaka onangika. Mata-mata o berera de o hoana o duniaka aha yogahoko Ngohino hupaya Ngohi tahibarakati önanga hokä sarakia Tahibarakati ani difauku.

⁵Ngohi aha tinihi barakati ngini, karana o Abraham wohihimotekoka Ngohi deʼ wapaliara hagala o hukumu deʼ Ahi huloko.”

⁶Hoʼ o Ishak wogogere o Gerar mabereraka.

⁷ Maöraha hagala manyawa genangoka yoleha mangale o ngo Ribka, o Ishak wohaluhu munanga gënanga ngoihiranga, deʼ koigoungua ngoihekata. O Ishak wohawana hagala o nyawa gënanga aha iwi toma mangale imä l̄ë o ngo Ribka duru ami hohailoa gënanga.

⁸De ipaha o Ishak wogogere dokengoka o wange moiuku makoano Abimelekh o jangelaino womä lega-lega, deʼ wïmake o Ishak magogiriaka imaule-ule deʼ imahi morene deongo Ribka.

⁹Done ünanga wïahoko o Ishak deʼ ünanga wïtemo, ”Koigoungua o ngoheka gënanga ngoni hekata? Yadodoa hoʼ ngona nahetongo gënanga munanga ngoni hiranga?” O Ishak wohaluhu, ”Ngohi tapikiri, ngohi aha ihitoma nako ta hetongo gemunanga ngohi hekata.”

¹⁰”Okia ngona nadiaioka ngomino?” o Abimelekh wotemo. ”Womatengoani ahikawaha yakunu dika womäidu de ngoni hekata, deʼ nako o hali gënanga idadi, ngona namoku mabobaluhu mangale tongomi mia howono gënanga.”

¹¹De ipahaika o Abimelekh wahidöaka o hohininga mata-mata ai kawahaika hoko nënanga, ”O nagona honanga iwi ruae o nyawa nënanga ekola ngoihekata, aha yahukumu yahohonenge.”

¹²O Ishak wohibarihi o gihihi mangale womädatomo o bereraka gënanga, deʼ o taongo gënanga wamake mahasili idogo maratuhu moi de wohi bari-barihi, karana ma Jou wihibarakati ünanga.

¹³Ai kaya iholoi idogo deʼ ünanga idadi wokaya ma ago-agomo.

¹⁴O Filistin manyawa yosanangua unangika karana ünanga ai gilaongo yowöe, o duba matika deʼ o hapi.

¹⁵De ipaha önanga yöpohuku de o tonaka mata-mata o humu yahai-haitoka o Abraham ai gogilaongo maöraha ünanga kawo-wangohi.

¹⁶De ipahaika o Abimelekh wïtemo o Ishakika, ”Noikoka namal̄a miaberera nënanga. Ngone iholoioka nokuaha ngaro de ngomi.”

¹⁷Hoʼ o Ishak woiki deʼ womätau o Gerar ma Waioka. Genangoka ünanga wogogere madekanino.

¹⁸Unanga wahaitoli mata-mata o humu ihai-haitoka o Abraham ai orahoka deʼ yopohu-pohukoka de o tonaka o Filistin manyawa kade wamal̄a o Abraham. Mata-mata o humu gënanga ihiromanga kaimatero de ai ama wohiromanga.

¹⁹O Ishak ai gogilaongo yohaiti o humu deʼ yamake o akere de maboboloi.

²⁰Mä o aiwani magogoana o Gerar mabereraka imateke ributu de o Ishak ai aiwani magogoana. Önanga yato, ”O akere nënanga madutu tongomi.” Karana gënanga o Ishak wohiromanga o humu gënanga ”O ributu”.

²¹O Ishak ai gogilaongo yohaiti o humu mahomoali, kai dadiokali o ributu yakorona o humu genangoli. Karana gënanga, o Ishak wohiromanga o humu gënanga ”Tekehaturu”.

²²De ipahaika ünanga woma tururu genangoka, deʼ yohaiti o humu mahangeoka. Nenanga mamoi idadiua o ributu. Karana gënanga, o Ishak wohiromanga o humu gënanga ”Ibebasoka”. Wätemo, ”O öraha nënanga ma Jou wonahi bebasoka ngone mangale högogere o berera nënanga deʼ ngone aha ilamoko nanga hasili nenangokadau.”

²³De ipahaika o Ishak womäjobo deʼ woma hiädono o Bersyebaika.

²⁴O hutu gënanga ma Jou womahimatoko Ai diri unangika deʼ wïtemo, ”Ngohi ani ama o Abraham ai Jou Madutu. Uha nohawana: Ngohi tonïgoana. Ngohi aha Tonihibarakati deʼ Tonihi doäka ngonaika o ngohaka de o danongo manga ngöe karana Ahi jaji Ahi gilaongika o Abraham.”

²⁵De ipaha o Ishak wohigoko o huhuba mangï deʼ wïhuba ma Jou genangoka mangï. Unanga womätau genangoka deʼ ai gogilaongo yohaiti o humu mahomoa.

²⁶ O wange moiuku o Abimelekh woböa o Gerar dewaino, de o Ahuzat, wïnonasihati, deʼ o Pikhol aitentara manga baluhu, hupaya imakamake de o Ishak.

²⁷Done o Ishak wäleha, ”Yadodoahö ngini niböa homaka make de ngohi örahanenanga, enahioko mahira ngini nihïhaturu, deʼ nihiduhu tingini niabereraka?”

²⁸De ipaha önanga iwïbaluhu, ”O öraha nënanga ngomi mihi öriki ma Jou wonïgoana ngona deʼ ngomi mia dibangoka iholoi yaoa ngone hodiai o jaji. Nokoboto

²⁹ngona aha nodiaiua o dorou ngomino, hokä sarakia ngomiö komaiwa midiai o dorou ngonaika. Ngomi miajakoka yaoa ngonaika deʼ minihigumal̄a ngona noiki de madame-dame. Inyataka ngomino ma ma Jou wonihi barakati ngona.”

³⁰De ipaha o Ishak wäahoko yol̄omo, deʼ önanga yol̄omo deʼ yokere.

³¹Yarehino mawange o ngoru-ngorumino moi-moi yahetongo manga jaji ihigoungu de o koboto. De ipaha o Ishak wätemo onangika niadodagi kaisosanangi, deʼ önanga imakitingaka hokä imateke-dodiawo.

³²O wange genangö o Ishak ai gogilaongo yoböa deʼ ihingahu unangika mangale o humu önanga yohai-haitoka. Onanga yato, ”Ngomi mia makeoka o akere.”

³³Daha o Ishak wohiromanga o humu gënanga ”O Koboto”. Genanga ma ahali madodihiraka o kota gënanga ihi romanga o Bersyeba.

³⁴Maöraha o Esau ai umuru o taongo moruata, ünanga wokawingi de o moholehe yahinoto o Het mahoana de maberera manyawa, enagënanga o ngo Yudit o Beeri ngoi ora, deʼ o ngo Basmat o Elon ngoi ora.

³⁵O ngohaka yahinoto gënanga yahuha o Ishak deʼ o ngo Ribka manga wowango.