Read Tobelo O KEJADIAN 28 Bible Online

O KEJADIAN 28 - Tobelo bible

O KEJADIAN 28

¹Ipaha o Ishak wïahoko o Yakub, daha wihibarakati ünanga de wotemo, ”Uha ngona nokawingi de o Kanaan manyawa mamoholehe.

²Noiki o Mesopotamiaika, o Betuel ani ete ai tau madol̄aika, deʼ nokawingi de momatengo ani pepe o Laban ngoi ora.

³Tanu ma Jou Madutu Wokokuaha wohibarakati ani kawingi deʼ deʼ wonihi döaka ngonaika o ngohaka de o danongo manga ngöe, hiädono ngona nodadi o berera de o hoana mangöe manga ete de manga tohora!

⁴ Tanu ma Jou wonihi barakati ngona hokä sarakia wihibarakatioka o Abraham deʼ tanu ngona nodadi o tonaka madutu nogogogere nënanga, ma Jou Madutu wihi döa-döakoka o Abrahamika!”

⁵Hoko gënanga o Ishak wihigumal̄a o Yakub woiki o Mesopota-miaika, o Labanika, o Betuel aingohaka o Aram manyawa gënanga. O Laban ganga o ngo Ribka amiranga o riaka o Yakub deʼ o Esau manga ayo.

⁶O Esau woihene o Ishak wihibarakatioka o Yakub deʼ wihigumal̄a ünanga woiki o Mesopotamiaika mangale womalingiri o hekata genangoka. De inoli maöraha o Ishak wihibarakati o Yakub, ünanga wïduhunu o Yakub wokawingi de o Kanaan mamoholehe.

⁷Mahomoa de gënanga o Esau wohiöriki o Yakub wohi moteke ai ama de ngoi ayo manga demo deʼ womä joboka o Mesopotamiaika.

⁸Done o Esau womangarati ai ama, o Ishak, wäigoua o Kanaan ma ngongoheka,

⁹hababu gënanga o Esau woiki o Ismaelika o Abraham aingohaka, deʼ wokawingi de o Ismael ngoi ora ami romanga o ngo Mahalat, o Nebayot ngoihiranga o dodoto.

¹⁰O Yakub wamal̄a o Bersyeba deʼ womäjobo o Haranika.

¹¹Ma orahoka o wange itumunu ünanga womahiädono o ngï moioka, daha womahiduhutu genangoka. Unanga womarubaiha womau womä idu; ai häeke wohikerenail̄e de o helewo o gahumu moi.

¹² De ipaha ünanga wonanere ünanga wamake o ngute o gahumu moi ima okoil̄e o duniaka deʼ madekara itiki le o dihangil̄e deʼ o momalaekat yauti yadoa o ngute gënanga.

¹³ Deʼ madatekoka womaokoino ma Jou deʼ wïtemo, ”Ngohi ma Jou, ma Jou Madutu o Abraham deʼ o Ishak iwipuji-puji. Ngohi aha tonihidöaka ngonaika deʼ aningohaka de ani danongika o tonaka o ngï ngona nomä idu-iduoka nënanga.

¹⁴ Aningohaka de anidanongo aha manga ngöe hokä o tonaka makafo o duniaka. Onanga aha yawoata toönanga manga daera o wange mahiwaroko, o wange madumuniha o koremieuku, o koreharail̄e, deʼ mangekomo ngona deʼ ani difauku, Ngohi aha tahibarakati mata-mata o berera de o hoana o duniaka.

¹⁵Nohohininga, Ngohi aha tonïriwo deʼ tonïgoana, kiaikadika ngona noiki deʼ Ngohi aha toniao nolio o bereraino nënanga. Ngohi aha tonimal̄aikaua ngona hiädono Tadiaioka hagala okianaga tonijä jajioka ngonaika.”

¹⁶De ipaha o Yakub ai gogiokoka deʼ womomiki deʼ wotemo, ”Ma Jou naga nenangoka, o ngïoka nënanga, mäöraha nënanga daha ngohi tohiöriki!”

¹⁷Unanga wohawana daha wotemo, ”Duru maborohono o ngï nënanga! Maraioka nënanga ma Jou Madutu Ai tau, o horoga mangorana ma amo-amoko.”

¹⁸Yarehino mawange o ngoru-ngorumino, o Yakub womomiki, daha wal̄ë o helewo wapöpake-pake hokä o gogerena deʼ wa okoil̄e idadi o hohininga mahelewo. Wohituagi o zaitun maminya o helewo mal̄okuku gënanga mangale wohitingakoka ma Jou Madutuika.

¹⁹O ngï gënanga wohiromanga o Betel. (Mahira maromanga o Lus.)

²⁰De ipaha o Yakub wokoboto, ”Nako ma Jou wohiriwo deʼ wohi goana ngohi ahidodagioka nënanga inoli wohihidöaka o inomo deʼ o pakeanga

²¹hiädono ngohi tomakilioro ahi ama ai tauika demahalamati, ma Jou aha wodadi tongohi ahi Jou Madutu.

²²Deʼ hagala moi-moi ma Jou wohidöaka ngohino, o hidoku ngimoi o hidoku moi ma Jouika aha tohidöaka. O hohininga mahelewo ngohi tohi goko-gokoka nënanga aha idadi o pupuji mangï ma Jouika.”