Read Tobelo O KEJADIAN 3 Bible Online

O KEJADIAN 3 - Tobelo bible

O KEJADIAN 3

¹ O dodiha ganga o aiwani duru i sawaro de hagala o aiwani Wadodiai ma Jou Madutu. O dodiha gënanga imileha mangohekaika gënanga, ”Boteka ma Jou Madutu igou-goungu winï duhunu nia ol̄omo hagala o gota mahohoko o dumuleoka nënanga?”

²”Ngomi yakunu mia ol̄omo moi-moi o gota mahohoko o dumule nënanga magoronaka,” ongoheka gënanga mohaluhu,

³”sawaliua o gota naga o dumule mahidogoronaka. Ma Jou Madutu womï duhunu ngomi mia ol̄omo o gota gënanga mahohoko ekola mia sö; nako ngomi miadiai hoko gënanga, ngomi aha mihonenge.”

⁴O dodiha gënanga ihaluhu, ”Genanga itiaiua; ngini aha nihonengua.

⁵Ma Jou Madutu wotemo gënanga karana Unanga wohioriki nako ngini niaol̄omo o hohoko gënanga, niadibanga aha i helenga; ngini aha nidadi hokä Ma Jou Madutu deʼ nihioriki o kia naga maoa deʼ o kia naga madorou.”

⁶Ongoheka gënanga mapulo-pulono o gota mautu gënanga i hailoa, deʼ mahohoko molega-lega i hemoro maol̄omo. Deʼ munanga moma pikiri hokokia marahai nako munanga mosawaro. Hababu gë nanga munanga mapagele o gota gënanga mahohoko, ipaha maol̄omo deʼ mihidöakö ami rokatika, deʼ ami rokata ma waol̄omo.

⁷Kajai-jaino yaol̄omoka o hohoko gënanga, manga dibanga i helenga deʼ önanga imamao önanga kamanga hekonoka. Hababu gënanga önanga ihihawoino manga roëhe deʼ o ara magota mahoka ya uri-urituku.

⁸O bimaoaoka gënanga önanga yoihene ma Jou Madutu woma dagi-dagi o dumule magoronaka, ipaha önanga yahinoto i ma-ngiunu o gota-gota mahidogoronaika hupaya ma Jou wämakeua.

⁹Mä ma Jou Madutu wïahoko manaurika gënanga, ”Kiaka naika ngona?”

¹⁰O nauru gënanga wohaluhu, ”Ngohi toihene Ngona o dumuleoka; ngohi tohawana, hoʼ ngohi tomangiunu karana kahihekonoka.”

¹¹”O nagona yahetongo ngonaika ngona kanihekonoka?” Ma Jou Madutu woleha. ”Boteka ngona naol̄omo o hohoko Toni duhu-duhunu naol̄omo gënanga?”

¹²O nauru gënanga wohaluhu, ”Mangoheka Ngona nohihidö döa-döakoka ngohino la mohidodiawo, mohihidöakoka o hohoko gënanga ngohino, ipaha ngohi taol̄omo.”

¹³ Ma Jou Madutu womi leha mangohekaika gënanga, ”Yadodoa honadiai gënanga?” Mohaluhu, ”Ngohi o dodiha ihibudi, hiädono ngohi taol̄omo o hohoko gënanga.”

¹⁴Genanga deʼ iböto ma Jou Madutu wätemo o dodihaika gënanga, ”Ngona aha inihukumu karana ani manarama gënanga; Hagala o aiwanino duga-duga ngona dika kokiani natagongo o lolai nënanga: Mulaenge o öraha nënanga ngona aha noma tahe deʼ ani mamata, deʼ naol̄omo o kafo madekana hoani umuru nowango.

¹⁵ Ngona deʼ ongoheka gënanga aha nimä bori dohata, ani difauku deʼ ami difauku aha salalu imä teke haturu. Ami difauku aha yawedere ani häeke, deʼ ngona aha nagoli toönanga manga bobö.”

¹⁶De ipaha ma Jou Madutu womitemo mangohekaika gënanga, ”Ngohi aha tödogo anihiri ngohaka ka aniroëhokahi deʼ maöraha ngona aningohaka imakil̄au. Mä ngaroka hoko gënanga, ngona kanï igohi ani rokatika, mangona aha nomaruku unangika.”

¹⁷ Ipaha ma Jou Madutu wïtemo o naurika gënanga, ”Ngona nohigïhene ngoni hekata ami demo-demo daha naol̄omo o hohoko To nï duhu-duhunu ngona naol̄omo. Karana ani manarama gënanga, o tonaka yakorona o lolai. Ngona kokiani noma manarama i puturungu madekana Ho ani umuru nowango hupaya o tonaka nënanga yakunu mahasili ini wedono ani inomo ngonaika.

¹⁸O momo deʼ o hihika aha ihihasili o tonaka nënanga ngonaika, deʼ o momo iwö wango-wango o honganika aha idadi ani inomo.

¹⁹Ngona aha nomanarama deʼ mahuha deʼ makangela deʼ ani gahauku la yadiai o tonaka nënanga ihihasili okianagani, hiädono ngona nolio o tonakika, hababu o tonakino ngona ini diai. Ngona o tonakino inihidadi, deʼ aha nolio ö otonakika.”

²⁰O Adam womihiromanga ngoihekata o ngo Hawa, karana ongoheka gënanga modadi hagala o nyawa manga ayo.

²¹Done ma Jou Madutu wadiai o aiwani makai idadi o Adam de ngoihekata manga pakeanga, daha wahi pake onangika.

²² Ma Jou Madutu wotemo, ”O öraha nënanga o nyawa yodadi oka hokä ngone deʼ manga ganako mangale maoa-oa deʼ madorou. Hoʼ paralu häduhunu önanga yaol̄omo o gota mautu mahohoko ihidöa-döaka o wowango, hupaya önanga uha yowango kahi ado-adonika.”

²³Deʼ ma Jou Madutu wäduhu o nyawa o Eden ma Madumuleoka deʼ wähuloko yakarajanga o tonaka idadi manga ahali gënanga.

²⁴Ipaha mawange mahiwaroko o dumule gënanga o ngorana yowoha-wohama mahimangoka, ma Jou Madutu wohi gogere o malaekat, deʼ o oworo gahumu moi deʼ maukuoka iloliti yameta yögeto-getongo, hupaya yö goana o ngekomo o gota mautuika ihidöa-döaka o wowango. De hoko gënanga kao nyawa moiö deʼ yakunua yowohama deʼ imahitigi o gota mautu gënanga.