Read Tobelo O KEJADIAN 30 Bible Online

O KEJADIAN 30 - Tobelo bible

O KEJADIAN 30

¹Mä o ngo Rahel momakeowahi o ngohaka. Hababu gënanga munanga momisanangua ngomiriakika, daha mïtemo o Yakubika, ”Nohihidöaka o ngohaka ngohino, nako kowali, ngohi aha tohonenge.”

²O Yakub womingamo o ngo Rahel deʼ womitemo, ”Ngohi nënanga ma Jou Madutuua. Unanga wadiai ngona namakeua o ngohaka.”

³Ipaha o ngo Rahel mato, ”Nenanga ngohigilaongo o ngo Bilha; nomäidu dede muna. De hoko gënanga ngohi yakunu todadi o ayo de mangekomo munanga.”

⁴Daha mihidöaka o ngo Bilha amirokatika, deʼ o Yakub womäidu de magilaongo gënanga.

⁵O ngo Bilha moröehe deʼ mongohaka o ngohaka o nauru womatengo.

⁶O ngo Rahel motemo, ”Ma Jou Madutu watibangoka tongohi ahiparaluika. Woihene ahininiata deʼ wohihidöaka ngohino o ngohaka o nauru womatengo.” Daha mihiromanga o ngohaka gënanga o Dan.

⁷O ngo Bilha moröeholi deʼ mongohaka o ngohaka o nauru woma-tengo.

⁸O ngo Rahel mato, ”Ngohi tomariwoka tomahohonenguku tomilawani ngohiriaka, deʼ ngohi toutumu,” karana gënanga mihiromanga o ngohaka gënanga o Naftali.

⁹Maöraha o ngo Lea momanako munanga yakunokaua mamakeoli o ngohaka, mihidöaka ngomigilaongo enagënanga o ngo Zilpa, o Yakubika mangale modadi ngoihekata.

¹⁰O Zilpa mihingohaka o ngohaka o nauru womatengo.

¹¹O ngo Lea motemo, ”Ngohi toutumu,” daha mihiromanga o ngohaka gënanga o Gad.

¹²O ngo Zilpa mongohaka o ngohaka o nauroli womatengo,

¹³deʼ o ngo Lea motemo, ”Duru toutumu ngohi! Oraha nanga o ngongoheka mata-mata aha yahetongo ngohi toutumu.” Karana gënanga mihiromanga o ngohaka gënanga o Asyer.

¹⁴O gandum youtuku maorahoka, o Ruben woiki o tonaka ilua-luasika deʼ wamake dokengoka hara moi o houru yadödato-datomo, daha wao o ngo Leaika ngoi ayo. O ngo Rahel momitemo o ngo Leaika, ”Nohihidöaka ngohino mahuhutulu o houru idö dato-datomo wamomake-make aningohaka gënanga.”

¹⁵O ngo Lea mohaluhu, ”Koini wedonowahi ngona nil̄ë ahirokata? Oraha nënanga kaidogo ngona nohitailoli nal̄ë o houru idödato-datomo wamömake-make ahingohaka.” O ngo Rahel mato, ”Nako ngona nomau nohihidöaka o houru idö dato-datomo toani ngohaka gënanga, ngona yakunu nomaidu de o Yakub o hutu nënanga.”

¹⁶Maöraha o Yakub wolio ai tauika o tonaka ilua-luasoka de waino o bimaoaka gënanga, o ngo Lea mibuhuku de mïtemo, ”Homa hidu o hutu nënanga karana ngohi töbanguoka gënanga de o houru idato-datomo ahingohakoka.” Daha o Yakub womäidu dede muna o hutu gënanga.

¹⁷Ma Jou Madutu wohimoteke o ngo Lea amininiata, deʼ münanga moröehe daha mongohaka o ngohaka mamotoaka.

¹⁸O ngo Lea mato, ”Ma Jou Madutu wohihidöakoka o hewa hababu ngohi tihi döakoka o ngo Zilpa ahi rokatika,” karana gënanga mihiromanga o ngohaka gënanga o Isakhar.

¹⁹O ngo Lea moröeholi deʼ mongohaka ami ngohaka mabutangaka.

²⁰Motemo mato, ”Ma Jou Madutu wohihidöakoka ngohino o ngongike mahohailoa duru. Oraha nënanga ahirokata aha wohihibaraguna ngohi, hababu ngohi tongohakoka yabutanga o ngohaka o nauru,” karana gënanga mihiromanga o ngohaka gënanga o Zebulon.

²¹De iböto gënanga o ngo Lea mongohaka o ngohaka ngoheka momatengo momihi romanga o ngo Dina.

²²Daha ma Jou Madutu womahininga o ngo Rahel; ma Jou Madutu wohimoteke o ngo Rahel amininiata deʼ wohigumal̄a munanga mongohaka.

²³Done o ngo Rahel moröehe deʼ mongohaka o ngohaka o nauru womatengo. O ngo Rahel motemo mato, ”Ma Jou Madutu wahohihangoka tongohi ahimal̄eke.

²⁴Tanu ma Jou wohihi döaka ngohino o ngohaka o nauru woma-tengohi.” Karana gënanga mihiromanga o ngohaka gënanga o Yusuf.

²⁵De iböto o ngo Rahel mihingohakoka o Yusuf, o Yakub wïtemo o Labanika, ”Nohihigumal̄a ngohi tolio ahibereraika.

²⁶Mal̄aika ngohi toiki täao ngohi hekata yahinoto de tongohi ahingoha-ngohaka. De tokarajanga ngonaka Pepe ngohi tomä makeoka önanga. Pepe nohi öriki, ngohi tokarajangoka duru takaigoungu.”

²⁷O Laban wïtemo unangika, ”Noihenohi: Ngohi tamakeohi dumutu ma Jou wohihi barakatioka ngohi karana ngona.

²⁸Nahetongo dika okia moi ngona nogahoko.”

²⁹O Yakub wïbaluhu, ”Pepe ngona mahirete nohiöriki ngohi tokarajanga duru takaigoungu, deʼ Pepe ani aiwani o gigini idogo iwöe karana tongohi ahipaliara.

³⁰Ngohi toböauwahi, Pepe ani arata hoko kiaua, mäöraha nënanga Pepe nokayaka. Oraha nënanga maöraha yadonoka täkarajanga ahihekata de ahingohaka mahirete.”

³¹O Laban wotemo, ”Hoʼ okia kokiani tonihidöaka ngonaika?” O Yakub wïbaluhu, ”Ngarouha Pepe okianaga nohihidöaka. Ngohi aha itatapu tapaliara ani aiwani o gigini Pepe, iti yakunu Pepe nomodeke de tongohi ahi gogahoko nënanga:

³²Nohihigumal̄a o wange nënanga tomädagi aniabingi deʼ duba matika mahidodogoronaika, deʼ tal̄ë o duba mangohaka madödaro-daromo, deʼ o kabingi magogo mababänga ekola itubu-tubuku. Genanga dika toigo tongohi ahi hewa.

³³Maduruino de magapanga yakunu Pepe nohiöriki okia ngohi todiaioka de ahihininga itebini. Maöraha okia Pepe noboa mangale natailako tongohi ahihewa, deʼ namake naga o kabingi itubu-tubukua ekola mababängua, ekola o duba madaro-daromua, Pepe aha nohiöriki o aiwani gënanga ngohi tatohikoka.”

³⁴O Laban wïbaluhu, ”Tomodeke! Ngone aha hadiai hokä nogö gaho-gahoko gënanga!”

³⁵Mä o wange gënanga o Laban watingaka mata-mata o kabingi manauru madodigiri ekola mababänga deʼ mata-mata o kabingi mabeka mababänga, itubu-tubuku, ekola nagaö madubuku magare-garehe; unangö watingaka mata-mata o duba madaro-daromo. De ipaha wähuloko ai ngoha-ngohaka ihidailako o aiwani-aiwani gënanga,

³⁶daha önanga yoiki de o aiwani-aiwani gënanga iwihitingaka o Yakub, mahoana madodagi o wange hange. O Laban ai kabingi de ai duba matika mahouohi o Yakub wapaliara.

³⁷De ipaha o Yakub wal̄ë o hawar magota majaga-jaga magou-gou, o badam magota, deʼ o berangan magota, de utu makai wahelengaka hiädono idadi mababänga.

³⁸Wakelengauku o gota majaga-jaga gënanga o kabingi matika gënanga mahimangoka, ma akere yaoke-okere mangï magoronaka, karana o aiwani-aiwani gënanga yoigo imol̄oka maöraha imau iokere.

³⁹Hoʼ nako mata-mata o kabingi gënanga imol̄oka o jaga-jaga gënanga mahimangoka gënanga, mangohaka madodigiri ekola mababänga ekola madubu-dubuku.

⁴⁰De ipaha o Yakub wal̄ë mata-mata ma duba daha wohihimanga mameta o kabingi mababängaka deʼ madaro-daromika. De madodagi hoko gënanga ünanga womämake ai aiwani matika mahirete deʼ wohitingaka de tö Laban ai aiwani matika.

⁴¹Maöraha okia o aiwani-aiwani ikökua-kuata magogiriaka imol̄oka, o Yakub wakelenga o gota majaga-jaga makai ihöhelengaka gënanga toënanga mahimangoka, mangongokere magoronauku.

⁴²Mä o gota majaga-jaga gënanga wakelengaua o aiwani ikökua-kuatua mahimanguku. Hoʼ mata-mata o aiwani magö gare-garehe gënanga ikuatua, deʼ gënanga mangale tö Laban, hoʼ de ino mata-mata o aiwani madö daro-daromo, mababänga deʼ madubu-dubuku gënanga ikuata, deʼ gënanga tö Yakub.

⁴³De hoko gënanga o Yakub idadi wokaya ma ago-agomo. Unanga de ai kabingi de ai duba matika mangöe, o onta, o keledai, deʼ ai gogilaongo.