Read Tobelo O KEJADIAN 34 Bible Online

O KEJADIAN 34 - Tobelo bible

O KEJADIAN 34

¹O wange moiuku, o ngo Dina o Yakub deʼ o ngo Lea mangongohaka ngoheka, mä adono o Kanaan mangongoheka yamuruono naga.

²Maöraha o Sikhem, o Hemor aingohaka o Hewi manyawa wodadadi o daera gënanga makoano womimake o ngo Dina, womihioara o moholehe gënanga, daha womipakisa womïhowono.

³Mä ünanga duru ai hininga yadaene o ngo Dinaika, hiädono duru womï hininga munaika deʼ wohidailako hupaya o moholehe gënanga mïhiningali.

⁴O Sikhem wotemo ai amaika, ”Ngohi togahoko Baba nohi dailako nohimake o moholehe gënanga. Ngohi töigo tomi kawingi.”

⁵O Yakub woihene ngoi ora ami romanga maoa yapesekoka, mä karana aingoha-ngohaka magogiria yögoana manga aiwani ipopaliara o tonaka ilua-luasoka, önanga yoliowahi, ünanga ka okianaga moiö de wakunua wadiai.

⁶O Hemor, o Sikhem ai ama, woböa o Yakubino womau imä ade-ade dede unanga.

⁷O öraha gënanga imakorona o Yakub ai ngoha-ngohaka yolio o tonaka i lua-luasoka deyaino. Yoihene o hali idödadadi gënanga, önanga yätodokana deʼ duru yongamo. Hababu de o Yakub ngoiora gënanga imipakisa imïhowono, o Sikhem wahikaukuoka o Israel manyawa mata-mata.

⁸O Hemor wïtemo o Yakubika, ”Ahingohaka o Sikhem womïigo ngoni oraika Riadodoto; ngohi togahoko hupaya Riadodoto nohigumal̄a ahi ngohaka wokawingi de muna.

⁹Naino ngone homa teke fakati anihoana manyawa deʼ mia hoana manyawa yokawingi imakongohama.

¹⁰Done Roriadodoto yakunu nigogere dede ngomi o bereraka nënanga; kiaka Riadodoto nö igo. Roriadodoto yakunu nia hininga mamau nima hukunu deʼ nimä make o arata.”

¹¹De ipaha o Sikhem wätemo o ngo Dina ami amaika de ikali ami ira-irangika, ”Nio modeke ahi gogahoko nënanga, done ngohi aha tinihidöaka okiadika tingini nia mau.

¹²Niahetongo o ngongike okia ngini nioigo, deʼ nihi tantu ami huba. Ngohi aha tinihi döaka okia ngini nigahoko iti yakunu ngini nihigumal̄a ngohi tomi kawingi o moholehe gënanga.”

¹³Karana o Sikhem wapesekoka ami romanga maoa toona manga biranga o ngo Dina, o Yakub aingoha-ngohaka yäeluku o Sikhemika deʼ ai ama o Hemor.

¹⁴Onanga yätemo o nyawa yahinotoika gënanga, ”Ngomi imïmal̄eke mihigumal̄a tongomi miabiranga mokawingi de o nyawa imauna-hunaua.

¹⁵Ngomi duga-duga yakunu miomodeke anigogahoko gënanga de moi o gogahoko, enagënanga: Ngini kokiani nidadi hokä ngomi, mamangarati mata-mata o nau-nauru ngini niahidogoronaka kokiani inïhuna.

¹⁶De ipaha gënanga ngomi aha miomodeke anigogahoko mangale hokawingi homakongohama gënanga. Ngomi aha mitatapu niahidogoronaka deʼ idadi o hoana moi dede ngini.

¹⁷Mä nako ngini nioluku niatarima miagogahoko, deʼ nioluku inihuna, ngomi aha mimil̄ë mimihigilio o moholehe gënanga deʼ mioiki.”

¹⁸O Hemor deʼ o Sikhem yamao o gogahoko-gogahoko gënanga i patutu,

¹⁹deʼ o Sikhem womasadia itaiti wamoteke o gogahoko gënanga karana ünanga womï igo o ngo Dina. Ai roriadodoto de manga tau madol̄a o Sikhem duru wäkuaha.

²⁰De ipaha o Hemor deʼ o Sikhem yoiki o gamake mangïika o kota mangorana ma amo-amokoka, deʼ yätemo manga kota manyawaika, hoko nënanga,

²¹”O Israel manyawa gënanga tongone nanga hobata. Ho, hamal̄aika önanga yogogere o bereraka nënanga kamamoi dede ngone de inoli manga hininga mahuka yoiki kiaika önanga yöigo. O berera nënanga kayaoa maluasi onangikaö. Ngone yakunu hokawingi de toona manga momoholehe, deʼ onangö yakunu yokawingi de tongone nanga momoholehe.

²²Mä o nyawa gënanga duga-duga yomodeke yogogere dede ngone deʼ idadi o berera de o hoana moi dede ngone de o gogahoko moi, enagënanga: mata-mata o nau-nauru nanga hidogoronaka kokiani i nähuna hoka önanga.

²³Dahao mata-mata manga aiwani matika deʼ hagala manga arata idadi tongone madutu. Ho niaino hodomoteke manga gogahoko gënanga hupaya önanga yogogere dede ngone.”

²⁴Mata-mata o kota manyawa imatotoomu gënanga yömodeke o Hemor deʼ o Sikhem manga gogahoko, daha mata-mata o nau-nauru yobalu-baluhoka o kotaka gënanga yähuna.

²⁵O wange hange ipahaika, maöraha o nau-nauru gënanga kayo hiriohi karana yähuna, o Yakub aingohaka yahinoto enagënanga o ngo Dina ami iranga manga romanga o Simeon deʼ o Lewi, yal̄ë to ona manga oworo, daha moiua yägihene yowohama o kota magoronaika. De ipaha önanga yätoma mata-mata o nau-nauru genangokadau,

²⁶yahideetongo o Hemor deʼ o Sikhem. Daha önanga i mil̄ë o ngo Dina o Sikhem ai tauoka deʼ imajoboka.

²⁷De iböto yätomaka gënanga, o Yakub ai ngoha-ngohaka ma homoa yaoara o kota gënanga hokä yabalahi i totorou karana manga biranga amiromanga maoa yapesekoka.

²⁸Onanga yal̄ë manga kabingi de manga duba matika, o hapi, o keledai, deʼ hagala okianaga o kota magoronaka deʼ o tonaka i lua-luasoka.

²⁹Önanga yal̄ë mata-mata manga baranga dema ija-ijaoka, yä tagoko o ngongoheka mata-mata deʼ o ngoha-ngohaka, deʼ yaora hagala manga tau madol̄a o kotaka gënanga.

³⁰O Yakub wätemo o Simeon deʼ o Lewika, ”Ngini nihïdiai o huha. O öraha nanga o Kanaan manyawa deʼ o Feris manyawa deʼ mata-mata yogögogere o berera nënanga aha ihïdohata. Tongone nanga nyawa koyowöeua; nako yogögogere gënanga mata-mata ima teke rimoi ihilawani deʼ ihiparangi, mata-mata nanga tau ma dol̄a aha yabinaha.”

³¹Mä önanga yohaluhu, ”Ngomi miakunua mimimal̄aika mia biranga imi hidiai hokä o ngoheka yahuku-hukunu manga röehe.”