Read Tobelo O KEJADIAN 35 Bible Online

O KEJADIAN 35 - Tobelo bible

O KEJADIAN 35

¹ O wange moiuku ma Jou Madutu wïtemo o Yakubika, ”Ngohi ma Jou Madutu tomahimö mato-matoko Ahi diri ngonaika maöraha ngona aniriakoka o Esau de nopiringana. Tai-taiti noiki o Betelika. Nogogere genangokadau deʼ nohigoko o huhuba mangï o gahumu moi mangale Ngohi.”

²Daha o Yakub wätemo ai tau madol̄aika deʼ mata-mataika o nyawa naga kamamoi dede ünanga, ”Ngone aha nenangoka de homäjobo deʼ hoiki o Betelika. Genangokadau ngohi aha tohigoko o huhuba mangï toma Jou Madutu wohiriwo-riwoka ahihuha de o hangihara maörahoka deʼ wohigoanoka ngohi kiaika dika ngohi toiki. Ho niaumo hagala o gikiri maporetino madulada naga nginioka; nidiai o röehe madebini imoteke madatoro deʼ niapake o pakeanga madebi-debini.”

⁴Daha önanga ihidöaka o Yakubika mata-mata o gikiri ma poretino madulada naga onangoka deʼ to onaö manga ngati-ngati. Mata-mata o baranga gënanga o Yakub wadatomo o gota ma ago-agomo matimiuku o Sikhem makota madatekoka.

⁵Maöraha o Yakub deʼ ai tau madol̄a madoomu imä jobo, ma Jou Madutu wätamunu yogögogere hagala o kota magilolitino de o modongo mamamao, hiädono önanga yakinïkua nao Yakub deʼ ai doomu.

⁶Daha önanga imahiädono o Kanaan matonakoka o Betel makotaka mahira maromanga o Lus.

⁷Genangokadau o Yakub wohi goko o huhuba mangï deʼ wohiromanga o ngï gënanga ”O El-Betel”, karana ma Jou Madutu womahi matokoka Ai diri unangika genangokadau maöraha ünanga ai riakoka de wopiringana.

⁸Dokengokaö o ngo Debora, momïlöleleani o ngo Ribka, mohonenge daha imilungunu o gota ma ago-agomo matimiuku o kotaka gënanga o korehara il̄e idaduoka. Gënanga mahababu o gota gënanga wohiromanga ”O Gari magota mautu”.

⁹O Yakub womakilioro o Mesopotamiaino de ipaha, ma Jou Madutu womahi matokoli Ai diri unangika deʼ wihibarakati.

¹⁰ Ma Jou Madutu wïtemo unangika, ”Ngona aha inihetongokauaoli o Yakub, mä o Israel.” Hoko gënanga ma Jou Madutu wihiromanga ünanga o Israel.

¹¹ Daha ma Jou Madutu wotemoli, ”Ngohi ma Jou Madutu Toko Kuaha. Kokiani ngona de aningohaka de ani danongo ka manga ngöe! Ngona aha nohi guti hagala o berera de o hoana deʼ no dadi o kokoano manga ete de manga tohora.

¹²O berera tahi döa-döakoka o Abraham deʼ o Ishakika, aha toni hidöaka ngonaika deʼ aningohaka de anidanongika.”

¹³De iböto gënanga ma Jou Madutu wimal̄a o Yakub.

¹⁴ O ngï ma Jou Madutu witemo-temo o Yakubika, ünanga wohigoko moi o hohininga mahelewo. Daha o helewo gënanga wohihuba ma Jou Madutuika de woguhe o angguru deʼ o zaitun maminya mal̄okuku.

¹⁵O ngï gënanga wohiromanga ”O Betel”.

¹⁶De iböto gënanga o Yakub deʼ ai doomu yamal̄a o Betel. Maöraha önanga kamanga gurutikaohi de o Efrata o ngo Rahel ami öraha imahi ädono la ami ngohaka ima kil̄au. Mä ami ngohaka ihuha ima kil̄au.

¹⁷Maöraha mohiri duru ikiriaka, mabidan momitemo, ”Ani hininga iamoko, Rahel, aningohaka o nauroli.”

¹⁸Mä o ngo Rahel ami ajali itigioka, deʼ maöraha münanga momau mowomaha mohibobaha, mihi romanga o ngohaka gënanga o Ben-Oni mä ai ama wihi romanga o Benyamin.

¹⁹O ngo Rahel mohonenge de ipaha, münanga imilungunu o ngekomo madatekoka yodumu-dumutu o Efrataika, öraha nanga ma romanga o Betlehem.

²⁰O Yakub wohigoko o hohininga mahelewo o gahumu moi genangokadau, deʼ hiädono o öraha nënanga ma o ngo Rahel amijere kayanonakoikahi de o helewo gënanga.

²¹De iböto gënanga o Yakub wohigila-gila ai dodagi, daha wohigoko ai tau-tau o ngï moioka yatio o Eder macandi.

²² Magogiriaka önanga naga o ngïoka gënanga o Ruben womä idu de o ngo Bilha, ai ama ngoihekata paliara. O hali gënanga o Yakub woihene, deʼ ünanga duru wongamo. O Yakub aingohaka o nauru yangimoi de yahinoto.

²³O ngo Lea ami ngoha-ngohaka ganga o Ruben (o Yakub aingohaka mariaka); o Simeon, o Lewi, o Yehuda, o Isakhar deʼ o Zebulon.

²⁴O ngo Rahel ami ngoha-ngohaka ganga o Yusuf deʼ o Benyamin.

²⁵O ngo Bilha ami ngoha-ngohaka, o ngo Rahel ngomi gilaongo ganga o Dan inoli o Naftali.

²⁶O ngo Zilpa ami ngoha-ngohaka, o ngo Lea ngomi gilaongo ganga o Gad deʼ o Asyer. O ngoha-ngohaka gënanga imakil̄au o Mesopotamiaoka.

²⁷ De o Yakub womahiädono ai amaika o Ishak, wogögogeroka o Mamre mabereraka o Hebron madatekoka. (Ma hira ai ete o Abrahamö wogogere dokengoka.)

²⁸Ai umuru duru iwiperekioka, enagënanga o taongo o ratuhu moi de mori tufange, o Ishak wohonenge de o Esau deʼ o Yakub aingoha-ngohaka iwilungunu.