Read Tobelo O KEJADIAN 36 Bible Online

O KEJADIAN 36 - Tobelo bible

O KEJADIAN 36

¹Nënanga o Esau aidifauku iwihetongöli o Edom.

² O Esau wokawingi de o Kanaan mangoheka yaruange, enagënanga: o ngo Ada, o Elon o Het manyawa ngoi ora; o ngo Oholibama, o Ana ngoi ora deʼ o Zibeon o Hewi manyawa ngoi hanongo.

³ O ngo Basmat, o Ismael ngoi ora, deʼ o Nebayot ngoi hiranga o dodoto.

⁴O ngo Ada mongohaka o Elifas, o ngo Basmat mongohaka o Rehuel,

⁵deʼ o ngo Oholibama mongohaka o Yeus, o Yaelam deʼ o Korah. Mata-mata o ngohaka gënanga ima kil̄au o Kanaan mabereraka.

⁶De ipaha o Esau wïmal̄a o Yakub deʼ woiki o berera mahomoaika wä ao mata-mata ai hekata, aingohaka, deʼ mata-mata ainyawa naga ai tauoka kamamoi de hagala ai aiwani i popaliara deʼ ai arata wamö mäke-mäkeoka o Kanaan mabereraka.

⁷O Esau imatingaka de o Yakub karana manga arata iwöeholi hiädono önanga yakunua yowango imateke toomuino. Inoli o berera önanga yogö gogere gënanga manga aiwani yopopaliara duru kahangöe gënanga mainomo imakewedonua.

⁸Done o Esau iwihi romangö o Edom, wögogere o Seir madaera de mal̄oku-l̄okuoka.

⁹Nenanga o Esau aidifauku, o Edom manyawa manga ete de manga tohora.

¹⁰O Esau ngoihekata ami romanga o ngo Ada mongohaka o ngohaka o nauru womatengo, ai romanga o Elifas. Deʼ o Elifas aingohaka o nauru yamotoa, enagënanga: o Teman, o Omar, o Zefo, o Gaetam deʼ o Kenas. O Elifas de ngoihekata paliara, amiromanga o ngo Timna. Munanga mongohaka o ngohaka o nauru ai romanga o Amalek. O Esau ngoihekata amiromanga o ngo Basmat mongohaka o ngohaka o nauru womatengo ai romanga o Rehuel. Deʼ o Rehuel aingohaka o nauru yäruata, enagënanga; o Nahat, o Zerah, o Syama, deʼ o Miza.

¹⁴O Esau ngoihekata amiromanga o ngo Oholibama, enagënanga o Ana ngoi ora de o Zibeon ngoi hanongo, mongohaka o ngohaka o nauru yaruange, enagënanga: o Yeus, o Yaelam deʼ o Korah.

¹⁵Nënanga o hoana-o hoana manga haeke o Esau aidifauku: o Elifas, o Esau aingohaka mariaka, ganga o hoana-o hoana i tototuru nënanga manga ete de manga tohora: o Tëman, o Omar, o Zefo, o Kenas, o Korah, o Gaetam deʼ o Amalek.

¹⁶Onanga mata-mata o ngo Ada o Esau ngoihekata ami difauku.

¹⁷O Rehuel, o Esau aingohaka, ganga o hoana-o hoana i tototuru nënanga manga ete de manga tohora: o Nahat, o Zerah, o Syama, de o Miza. Önanga mata-mata o ngo Basmat o Esau ngoi hekata ami difauku.

¹⁸O hoana-o hoana i tototuru nënanga ganga o Esau aidifauku ngoi hekatoka amiromanga o ngo Oholibama o Ana ngoi ora, enagënanga: o Yeus, o Yaelam deʼ o Korah.

¹⁹Mata-mata o hoana-o hoana gënanga o Esau aidifauku.

²⁰O Edom matonaka maberera madutu i regu o hoana muruono naga o Seir o Hori manyawa aidifauku. O hoana-o hoana gënanga ganga: o Lotan, o Syobal, o Zibeon, o Ana, o Disyon, o Ezer, deʼ o Disyan.

²²O Lotan ganga o Hori de o Heman manga bätuku manga ete de manga tohora. (O Lotan de ngoi hiranga, enagënanga o ngo Timna.)

²³O Syobal ganga: o Alwan, o Manahat, o Ebal, o Syefo deʼ o Onam manga bätuku manga ete de manga tohora.

²⁴O Zibeon aingohaka o nauru yahinoto, enagënanga o Aya deʼ o Ana. (O Ana nënanga wamömake-make o akere mahau-hauku matiti o tonaka ikökakahaka, maöraha ünanga magogiriaka wogoana ai ama ai keledai.)

²⁵O Ana ganga o Disyon ai ama, deʼ o Disyon: o Hemdan, o Esyban, o Yitran deʼ o Keran manga bätuku manga ete de manga tohora. O Anaö ngoi ora momatengo ami romanga o ngo Oholibama.

²⁷O Ezer: o Bilhan, o Zaawan deʼ o Akan manga bätuku manga ete de manga tohora.

²⁸O Disyan o Us deʼ o Aran manga bätuku manga ete de manga tohora.

²⁹Nënanga o Hori o Edom mabereraka ai hoana: o Lotan, o Syobal, o Zibeon, o Ana, o Disyon, o Ezer deʼ o Disyan.

³¹Koiwahi naga o koano yopopareta o Israel mabereraka, o kokoano yäheto-hetongo nënanga yopareta o Edom matonakoka imakoki nïkika: O Bela o Beor aingohaka o Dinhabaino. O Yobab o Zera aingohaka o Bozraino. O Husyam o Teman madaeraino. O Hadad o Bedad aingohaka o Awitino (ünanga wahöhihihanga o Midian manyawa o parangi magoronaka o Moab madaeraka). O Samla o Masrekaino. O Saul o Rehobotino o ngairi madatekoka. O Baal-Hanan o Akhbor aingohaka. O Hadar o Pahuino (ngoihekata amiromanga o ngo Mehetabeel, o Matred ngoi ora o Mezahab ngoi danongo).

⁴⁰O Esau ganga o Edom mahoana i heto-hetongo nënanga manga ete de manga tohora: o Timna, o Alwa, o Yetet, o Oholibama, o Ela, o Pinon, o Kenas, o Teman, o Mibzar, o Magdiel deʼ o Iram. O hoana moi o hoana moi ihidöaka maromanga o daera yogögogerika.