Read Tobelo O KEJADIAN 39 Bible Online

O KEJADIAN 39 - Tobelo bible

O KEJADIAN 39

¹O Yusuf iwi ao oka o Ismael manyawa gënanga o Mesirika deʼ iwihukunu o Potifarika, ma koano ai kapita ai manarama o kadato yögoa-goana manga haeke.

² Ma Jou wïriwo o Yusuf hiädono ünanga salalu wohasili mata-mata ai manarama magoronaka. Unanga wogogere ai tuanga ai tauoka, o Mesir manyawa gënanga.

³Ai tuanga wamake ma Jou wiriwo o Yusuf deʼ karana gënanga o Yusuf wohasili yaoa hagala wamomanarama magoronaka.

⁴O Potifar wïsanangi o Yusufika deʼ wïgoraka wodadi wïlöleleani ai diri mahirete; daha wihimanarama o Yusuf wohidailako aitau madol̄a de hagala okianaga touna madutu.

⁵Mulaenge o öraha gënanga, mangale o Yusuf, ma Jou wohibarakati o Mesir manyawa gënanga ai tau ma dol̄a deʼ hagala okianaga touna madutu, kayaoa ai tauoka kayaoa aidumuleoka.

⁶Hagala moi-moi madutu to Potifar wihigogoana o Yusufika. De hoko gënanga o Potifar wohiorikokaua mangale ai tau mahidailako sowaliua ai inomo mahali. O Yusuf wokuata deʼ wohailoa.

⁷O öraha muruono naga mahoana, o Potifar ngoihekata mulaenge mïnahihu o Yusufika, daha o goduru gënanga mihigaro imähidu.

⁸O Yusuf woluku deʼ womitemo munangika, ”Uha nongamo, Nyonya, matuanga Potifar wohihi gogoanoka hagala touna madutu ngohino. Ünanga i paraluua wapikiroli okianaga o tauoka nënanga.

⁹Nenangoka ahikuaha imatero ma amoko de touna ai kuaha. Koiwa naga kamoiö de wohihigogoanua ngohino, sowaliua ngona Nyonya. Sarakia yakunu ngohi tadiai o manarama mamodorou gënanga deʼ tobaradoha ma Jou Madutuika?”

¹⁰Ngarokä o Potifar ngoihekata mïbaja o Yusuf o wange mohigetongo, o goduru gënanga itatapu woluku imäidu dede munanga.

¹¹O wange moiuku maöraha o Yusuf wowohama otau magoronaika la wadiai ai manarama, o nyawa moiua genangokadau.

¹²O Potifar ngoihekata mïtauru o Yusuf ai jubaika deʼ mïtemo, ”Naino ngone homahidu.” O Yusuf woma kekelu womakua-kuata deʼ wakunu womahuputu, daha wohupu wopiringana ma ai juba kawa mal̄aika o ngoheka gënanga ami giamoka.

¹³Maöraha o Potifar ngoihekata mï make o Yusuf wopiringanoka deʼ ai juba i gogogere,

¹⁴munanga ma ahoko imilöleleani deʼ matemo, ”Abeika niamake! O Ibrani manyawa ahirokata wïaoao o tauino nënanga, wohihi kauku ngohi. Unanga wowohama tongohi ahi kamarino deʼ womau wohipakisa ngohi, mangohi topöaka takua-kuatil̄e.

¹⁵Maöraha woihene ngohi topöaka, ünanga wohupu wopiringana deʼ ai juba kawamal̄aika.”

¹⁶Daha o Potifar ngoihekata magogono o juba gënanga hiädono amirokata wolio.

¹⁷De wolioino amirokata, münanga tai-taiti mahetongo o jarita gënanga unangika, mato, ”O Ibranima nyawa ngona nï ao-aoino gënanga, wowohama o kamarino la wohihikauku ngohi.

¹⁸Mä maöraha ngohi topöaka, ünanga wohupu wopiringana deʼ aijuba kawa mal̄aika.”

¹⁹O Potifar duru wongamo.

²⁰Deʼ ünanga wohipareta hupaya o Yusuf itaiti iwitagoko de i wihingohama o bui magoronaika, makoano wäbui-bui manga kurunga mangïoka.

²¹ Mä ma Jou wïriwo o Yusuf deʼ kahokogenangika wïdora, hiädono o bui mabaluhu wïigo unangika.

²²Ünanga wihigogoana yoböbui-bui mahomoa o Yusufika, deʼ o Yusuf iwihimoku wögöana hagala o manarama yadodiai o bui magoronaka gënanga.

²³O bui mabaluhu gënanga wotö tailakokaua hagala wihigogogoanoka o Yusufika, karana ma Jou wïriwo hiädono ünanga wohasili hagala ai manarama magoronaka.