Read Tobelo O KEJADIAN 4 Bible Online

O KEJADIAN 4 - Tobelo bible

O KEJADIAN 4

¹Ipahaika o Adam womahiganu kaoroëhe moi deʼ o ngo Hawa, ngoihekata, deʼ ongoheka gënanga o ngohaka mohiao. Munanga mongohaka o ngohaka o nauru womatengo deʼ motemo, ”De ma Jou Ai roriwo ngohi tamakeoka o ngohaka o nauru womatengo.” O ngohaka gënanga mihi romanga o Kain.

²Daha o ngo Hawa mongohaka o nauru womatengoli, ai romanga o Habel. O Habel wodadi o duba magogoana, mä o Kain wototumule.

³O öraha muruono naga ipahaika O Kain wal̄ë o hidoku moi ai dumule mahasili daha wohihuba ma Jouika.

⁴ Daha o Habel wal̄ë o duba mangohaka i ria-riaka o dutu moi, watoaka, daha wohi huba ma ake-akeme duru ma oa-oa ma Jouika. Ma Jou wosanangi o Habelika deʼ toünanga ai huhuba,

⁵mä wïoluku o Kain deʼ to ünanga ai huhuba. O Kain duru wongamo, deʼ ai biono yatohata.

⁶Done ma Jou wïtemo o Kainika, ”Yadodoa hongona nongamo? Yadodoaho anibiono yatohata?

⁷Nako ngona nodiai maoa, maraioka ngona noiete; manako ngona nodiai o dorou, done o baradoha itamä hupaya iwohama ani hininga magoronaika. O baradoha imau yakuaha ani diri, mä ngona kokiani nahohihanga.”

⁸ Daha o Kain wïtemo Habelika, ai dodoto, ”Naino ngone hoiki o dumuleika.” Maöraha önanga imahiadonika genangoka o Kain wï gohara de wïtoma o Habel, ai dodoto.

⁹Ma Jou wïleha o Kainika, ”Kiaka waika o Habel, ani dodoto?” O Kain wohaluhu, ”Ngohi tihiorikua. Kokiani ngohi ti goa-goana ahi dodoto?”

¹⁰ Daha ma Jou wïtemo, ”Yadodoa hongona nodiai o hali hömodo-modongo gënanga? Ani dodoto ai awunu o tonakil̄e i pöaka Ngohil̄e, hokä o ilingi i pöaka igahoko o balahi.

¹¹Ngona o lolai namake hiädono yakunokaua o tonaka nakarajanga. O tonaka gënanga yawomoka ani dodoto ai awunu, matero-tero yahelenga mauru la yatarima ani dodoto gënanga ai awunu maöraha ngona nïtoma.

¹²Nako ngona nodatomo, o tonaka o kia-kiaua mahasili; ngona aha kano tagi-tagi koiwa ani ngï nogogere o duniaka.”

¹³Done o Kain wotemo ma Jouika, ”O hukumanga gënanga i tubuho holi, ngohi takunua tatagongo.

¹⁴Ngona nohi duhu ngohi o tonakoka nënanga, magurutika deʼ ani himanga. Ngohi aha todadi kato dagi-dagi koiwa o ngï togogere o duniaka, deʼ ngohi aha ihi toma o nagona dika ihimö make-make ngohi.”

¹⁵Mä ma Jou wïtemo, ”Kowali. Nako ngona initoma, done hokä ma balahi, deʼ ini tö toma-toma hö yatumidi ahaö yätoma.” Ipaha ma Jou wïgelenga o nonako o Kainika hupaya onagona dika imaka make dede ünanga uha iwitoma.

¹⁶Daha ma Jou Ai himangoka deʼ o Kain wosobo deʼ o ngï wögögogere maromanga ”Kayododadagi” matonakoka o Eden o wange mahiwaroko.

¹⁷O Kain deʼ ngoihekata yamake o ngohaka o nauru, iwihi romanga o Henokh. Ipahaika o Kain wohigoko moi o kota deʼ wohi romanga o kota gënanga imoteke aingohaka gënanga ai romanga.

¹⁸O Henokh o Irad ai ama. O Irad o Mehuyael ai ama. O Mehuyael o Metusael ai ama, deʼ o Metusael ganga o Lamakh ai ama.

¹⁹O Lamekh ngoihekata yahinoto, o ngo Ada deʼ o ngo Zila.

²⁰O ngo Ada mihi ngohaka o Yabal, deʼ Yabal aidifauku gënanga o nyawa yopö paliara o aiwani deʼ yogogere o tau-tauoka.

²¹Ai dodoto ai romanga Yubal, deʼ o Yubal aidifauku ganga ihigogogule o musik kecapi deʼ o sulingi.

²²O ngo Zila mihi ngohaka o Tubal-Kain, deʼ aidifauku yododiai hagala i rupa o pakakaha o tabaga deʼ o behi. O Tubal-Kain ngoi hiranga madodoto ami romanga o ngo Naama.

²³O Lamekh wätemo ngoihekata yahinotoika. ”Ada deʼ o ngo Zila, ni ihene! Woma tengo o goduru tïtoma karana wohigoharoka ngohi.

²⁴Nako yatumidi yätoma yabalahi mangale o Kain wotoma done o nyawa yamori tumidi deʼ yatumidi aha yätoma nako ngohi ihi toma.”

²⁵O Adam deʼ ngoihekata yamake o ngohaka o nauru woma tengoli. O ngo Hawa mato, ”Ma Jou Madutu wohihidoäkoka ngohaka o nauru hokä o Habel ai dururu, wïtoma-tomaka o Kain.”

²⁶O Set aingohaka o nauru wihiromanga o Enos. Oraha gënanga o nyawa yomulaenge yahetongo ma Jou Ai romanga maöraha yohuba.