Read Tobelo O KEJADIAN 40 Bible Online

O KEJADIAN 40 - Tobelo bible

O KEJADIAN 40

¹O öraha muruono naga ipahaika yahinoto iwïlöleleani o Mesir makoano, enagënanga wohidödailako ai ngokere deʼ wohidödailako ai roti, yodiai o howono makoanoika.

²Done makoano wängamo yahinotö iwïlöleleanika gënanga,

³daha önanga yahingohama o buiika o kadato yogöa-göana manga baluhu ai tauoka, mangï o Yusuf wobui-buioka.

⁴Kamanga dëkana önanga o buioka gënanga, deʼ o kadato yogöa-göana manga baluhu wihidöaka o manarama o Yusufika la wäleleani önanga.

⁵O hutu moiuku wohidödailako ai ngokere deʼ wohidö dailako o roti gënanga moi-moi yonanere. Manga nanere mamangarati gënanga imateroua.

⁶Maöraha o Yusuf waino onangino yarehino o ngorumino, wälega-lega önanga manga hininga ihuha.

⁷Daha ünanga wäleha, ”Yadodoaho, roriadodoto hoko gënanga mahuha nia hininga o wange nënanga?”

⁸Onanga yohaluhu, ”O hutuika ngomi minanere, deʼ moiua ihiöriki mamangarati.” O Yusuf wato, ”Duga-duga ma Jou Madutu wohigumal̄a o nyawa ihitararono o nanere mamangarati. Abeika nihi ade-ade niananere gënanga.”

⁹Wohidödailako ai ngokere gënanga wotemo, ”O nanere magoronaka gënanga ngohi tamake naga o angguru magota mautu ahi himangoka.

¹⁰O gota mautu gënanga majaga hange. Genanga dahaö majaga-jaga gënanga imulaenge ihoka, de majapati mahuri i hohe, daha mahohoko iomuku.

¹¹O öraha gënanga ngohi magogiriaka tasöino ma koano ai ngokere magalahi, ho ngohi tal̄ë o angguru mahohoko gënanga deʼ, ngohi tödeo ma koano ai galahiuku, daha ngohi tihidöaka unangika.”

¹²O Yusuf wïtemo, ”Nenanga mahitararono: O jaga hange gënanga mamangarati o wange hange.

¹³O wange hange magoronaka nënanga aha ma koano wonihibebasi ngona, ünanga aha wonihi apongo ngona deʼ wonihigilio ngona animanarama ihira-hiraika. Ngona aha nohidöakoli ai ngokere magalahi ma koanoika hokä mahira.

¹⁴Mä nomä hininga ngohino maöraha okia aniwowango yaoaka. Nohï riwo nohi ädono tongohi ahi hali i dadadi ma koanoika, hupaya ngohi tobebasi o buioka nënanga.

¹⁵Hababu, imoteke madiai mahira ngohi ihitohiki o Ibrani manyawa manga bereraka deʼ nenangokadauö, o Mesir mabereraka nënanga, komaiwa ngohi to diai moi ani i totorou hiadono kokiani ihihingohama o buiika.”

¹⁶Wohidödailako o roti gënanga wohiorikoka wohidödailako o ngokere ainanere mamangarati yaoa, done unangö witemo o Yusufika, ”Ngohiö tonanere, ngohi tatamil̄e ahi haëkoka o roti o karaja hange.

¹⁷O karaja duru il̄ö l̄oku-l̄oku magoronaka naga i rupa-rupa ma koano ai kui, ma o totaleo-totaleo yaino yaol̄omo o kui gënanga.”

¹⁸O Yusuf wohaluhu, ”Nënanga o nanere gënanga mahitararono: O karaja hange gënanga mamangarati o wange hange.

¹⁹O wange hange magoronaka nënanga ma koano aha wähuloko o nyawa yatobiki anihäeke daha animayeti yanuneuku o liateoka, deʼ hagala o totaleo yaino yaol̄omo aniakeme.”

²⁰O wange hange ipahaika ganga naga ma koano ai taongo wodadi, deʼ ünanga wodiai o rame ma ago-agomo mangale mata-mata ai pegawe. Unanga wohipareta hupaya wohidö dailako o ngokere deʼ wohidödailako o roti yahihupu o buioka deʼ yä ao mata-mata o kadato mapegawe manga himangoka.

²¹Wohidödailako o ngokere iwihigilio ai manarama mahiraika.

²²Mä wohidö dailako o roti iwihukumu iwihohonenge. Mata-mata gënanga idadi imadaene de okia wahöheto-hetongo o Yusuf.

²³Mä wohidödailako o ngokere gënanga womä hininga okaua o Yusufika. Unanga duru wïwohangoka unangika.