Read Tobelo O KEJADIAN 41 Bible Online

O KEJADIAN 41 - Tobelo bible

O KEJADIAN 41

¹O taongo hinoto ipahaika, o Mesir ma koano wonanere, ünanga magogiriaka womaokoino o Nil ma Ngairi madatekoka.

²I todokanino o hapi o dutu tumidi maboburere deʼ makai mameletongo ihupu o ngairil̄e gënanga daha imulaenge i ol̄omo o momo o ngairi gënanga madatekoka.

³Ipaha o hapi o dutu tumidi mahomoa i böali; o aiwani-aiwani gënanga yapelelaka deʼ kamakai yahawoino makobongo. Mahapi mabobelelaka gënanga imaokoino o hapi maboburere madatekoka, o ngairi gënanga madatekoka.

⁴De ipaha mata-mata o hapi mabobelelaka gënanga yaol̄omo mata-mata o hapi maboburere. De iböto gënanga ma koano ai gogiokoka de womomiki.

⁵De ipaha ünanga iwikiokoka deʼ wonaneroli. Ai nanere magoronaka ünanga wamake o utu moi o gandum iwango de magobe tumidi de ma akemoka deʼ ioha-ohakoka.

⁶De ipaha iwangoli o gandum o gobe tumidi mahomoa, mabobelelaka deʼ i lohu-lohu de magogororomo mangale o tonaka ikokakaha mahidal̄oko.

⁷Daha o gandum magobe mabobelelaka gënanga yal̄ahiri o gandum o gobe tumidi dema ake-akemoka kangano. De i böto gënanga ma koano womomiki de wanako ünanga wonaneroka.

⁸ Ma ngoru-ngorumino ma koano wamao ai hininga iruae, karana gënanga wähuloko yäahoko mata-mata yogogumatere deʼ o nyawa yososawaro o Mesir mabereraka. Daha wohijarita ai nanere onangika, mä moiua yakunu ihitararono mamangarati.

⁹De ipaha wohidö dailako yaoke-okere wïtemo ma koanoika, ”O wange nënanga ngohi kokiani tomangaku ahihowono.

¹⁰Kahuruono Koano nomïngamo wohidödailako o roti deʼ ngohino, daha ngomi imihi ngohama o buika, yögoa-goana o kadato manga baluhu ai tauoka.

¹¹O hutu moiuku ngomi i mï hinotö minanere deʼ o nanere gënanga mamangarati ima teroua.

¹²O goduru womatengo o Ibrani manyawa naga dokengoka dede ngomi. Ünanga wïlöleleani o kadato yogögoa-goana gënanga manga baluhu. Ngomi mihijarita miananere unangika, daha wohitararono o nanere gënanga mamangarati.

¹³I nyata mata-mata itiai idadi hokä waheto-hetongoka, enagënanga: Jou Koano nohihigilio ngohi ahi manarama mahiraika, mawohidödailako o roti gënanga iwihukumu iwihohonenge.”

¹⁴Done ma koano wähuloko iwingoho o Yusuf, deʼ dema japati iwihihupu o buioka. De ipaha o Yusuf womakori deʼ ai keanga watagali, ünanga wïhimanga ma koano.

¹⁵Ma koano witemo unangika, ”Ngohi tonaneroka, deʼ moiua yakunu ihitararono mamangarati. Naga ihihingahu ngohino ngona nakunu nohitararono o nanere.”

¹⁶O Yusuf wohaluhu, ”Ngohiua, ahi Tuanga, duga-duga ma Jou Madutu aha wohidöaka o hitararono itotiai.”

¹⁷Daha ma koano wotemo, ”Ngohi tonanere ngohi magogiriaka tohigokoino o Nil ma Ngairi madatekoka.

¹⁸Daha i hupu o ngairil̄e gënanga o hapi o dutu tumidi maboburere deʼ makai mameletongo, daha i mulaenge i ol̄omo o momo o ngairi gënanga madatekoka.

¹⁹De ipaha o ngairil̄e gënanga iboali o hapi o dutu tumidi mahomoa, mabobelelaka deʼ kama kai yahawoino makobongo. Komaiwahi ngohitamake o hapi hokogënanga mamodorou i ngodumu o Mesir mabereraka.

²⁰Mata-mata o hapi mabobelelaka gënanga ya ol̄omo yamata-mataka o hapi maboburere kangano.

²¹Ma de i böto gënanga mata-mata o hapi mabobelelaka gënanga kahirahi i pelelaka. Daha ngohi ahi gogiokoka de tomomiki.

²²De ipaha ngohi ihikioko deʼ tonaneroli, ngohi tamake o gandum o gobe tumidi de ma akemoka de i oha-ohakoka, iwango o utu moioka.

²³Daha iwango o gandum o gobe tumidi mabobelelaka deʼ i lohu-lohu de magogororomo mangale o tonaka ikokakaha mahidal̄oko.

²⁴O gandum magobe mabobelelaka gënanga yal̄ahiri magobe de ma ake-akemoka kangano. Tohi jaritaoka ahi nanere hinoto-hinoto gënanga yogogumaterika ma moiua yakunu ihitararono mamangarati.”

²⁵Daha o Yusuf wato ma koanoika, ”O nanere hinoto gënanga imatero mamangarati; ma Jou Madutu wonihi ngahuoka ngonaika ahi tuanga okia aha wodiai.

²⁶O hapi o dutu tumidi maboburere gënanga ganga o taongo tumidi, deʼ o gobe tumidi o gandum de ma akemoka gënanga gangö o taongo tumidi; hinotö ma mangarati imatero.

²⁷O hapi o dutu tumidi mabobelelaka, ituru-turuino i böa, inoli o gandum o gobe tumidi ilohu-lohu de magogororomo mangale o tonaka ikokakaha mahidal̄oko gënanga ganga o habirokata maöraha madekana o taongo tumidi.

²⁸Hokä sarakia ngohi tahetongoka ngonaika ahi Tuanga, ma Jou Madutu wohimatokoka ngonaika ahi tuanga okia aha wodiai.

²⁹Damä aha i böa o taongo tumidi o Mesir maberera mata-mataika i omanga de o hasili mangöe.

³⁰De ipaha gënanga aha i böa o taongo tumidi o habirokata, deʼ maöraha i omanga de o hasili mangöe gënanga aha yawohanga mata-mata, karana o habirokata gënanga aha duru kahägiria hiädono o berera nënanga matonaka idadi yapelelaka.

³¹

³²Ahi Tuanga nonanere mahinotoino, gënanga mamangarati o hali gënanga ma Jou Madutu wohitatapuoka deʼ ma Jou Madutu aha wodiai de majapatioka.

³³Karana gënanga, yaoa ahi Tuanga nïiriki womatengo wososawaro deʼ wobobarija deʼ nihidöaka o kuaha la watatoro o berera nënanga.

³⁴Kokiani ahi Tuanga nägoraka o pegawe-pegawe mahomoa, deʼ nahidöaka onangika o kuaha la mata-mata manga dumule mahasili o gandum yaregu motoa de o regu moi yal̄ë o taongo tumidino madekana maöraha o hasili i wöe gënanga, daha yatoomu o kota-o kota yögetongo inoli yögoana.

³⁵

³⁶O gandum gënanga aha idadi o inomo homahi goa-goana o taongo tumidino madekana maöraha o habirokata aha iböboa-boa o Mesirino. De hoko gënanga o kawaha aha ihi honengua de o habirokata.”

³⁷Ma koano deʼ mata-mata ai pegawe ihigoungu o Yusuf ai datoro gënanga.

³⁸Daha ma koano wätemo onangika, ”Idadiua ngone hämake o nyawa mahomoa i holoi yaoa de o Yusuf, hababu ünanga ma Jou Madutu Ai Womaha iwituda.”

³⁹Done ma koano wïtemo o Yusufika, ”Ma Jou Madutu mata-mata nënanga wonihi ngahuoka ngonaika, ho itiaioka ngaroko de o nagonaoli ngona i holoi nosawaro deʼ nobarija.

⁴⁰ Ngona aha tonigoraka nodadi o gubernur, deʼ i ngodumu ahikawaha aha ihimoteke anipareta. Duga-duga ngohi dika i holoi tokuaha de ngona de.”

⁴¹ De iböto gënanga ma koano wahuputu ai ali-ali de magaradeoka o koano mapopareta macap, daha wohingohama o Yusuf ai hagararaoko inoli wïtemo, ”De nënanga ngohi toni goraka nodadi o gubernur Mesir maberera ingodumu.” De ipaha wihipake o Yusufika o juba mangöere magare-garehe ma aluhu, deʼ wihigule ai tomaruku o rante gurasi gahumu moi.

⁴²

⁴³Daha wihidöaka o Yusufika ma koano ai kereta mahinotoka lawö bare-barene, deʼ iwihöhoromati ma koano imädagi o kereta gënanga mahimangoka de inoli yopöa-pöaka, ”Nimahi dodiai! Nihidöaka o ngekomo! Nihidöaka o ngekomo!” Hoko gënanga o Yusuf iwigoraka wodadi o gubernur o Mesir maberera ingodumu.

⁴⁴Ma koano wïtemo unangika, ”Ngohi ma koano — deʼ ngohi tohingahu o Mesir maberera ingodumu kao nyawamoiö de yakunua okianaga yodiai nako nahigumal̄aua.”

⁴⁵Daha ma koano wihi döaka moi o Mesiroka manga romanga o Yusufika, enagënanga o Zefnat-Paaneah. Wihidöakö ngoihekata momatengo amiromanga o ngo Asnat, o Potifera ma imam ngoi ora o Heliopolis makotaoka. O Yusuf ai umuru o taongo moruange maöraha ünanga womulaenge womanarama mangale o Mesir ma koano. Done o Yusuf ma koano ai kadatoka de womäjobo deʼ woiki wakiloliti o berera mata-mataika.

⁴⁶

⁴⁷Maöraha o taongo tumidi magoronaka o hasili duru kahängöe, o tonaka mahasili yautuku de maboboloi.

⁴⁸O gandum gënanga o Yusuf watoomu daha wagogono o kota-kotaika. O kota yögetongo magoronaka ünanga wagogono o gandum o dumule-dumule mahasili o kota gënanga magilolitino.

⁴⁹O gandum watotoomu gënanga hoko gënanga mangöe hiädono o Yusuf womatogumu wotuga, karana mangöe hokä o dowongi o gahi madatekino.

⁵⁰O habirokata gënanga maöraha i böaowahi, o ngo Asnat o Yusuf ngoihekata mongohaka o ngohaka o nauru yahinoto.

⁵¹O Yusuf wato, ”Ma Jou Madutu wadiaioka ngohi tawohanga hagala tongohi ahihuha de ahihangiharaika deʼ ahi ama aingohaka de ai riadodotika.” Karana gënanga wihiromanga aingohaka madodihiraka ”O Manasye”.

⁵²Unanga wotemoli, ”Ma Jou Madutu wohihidöakoka o ngoha-ngohaka ngohino maöraha ahihuha magoronaka,” daha wihiromanga aingohaka mahinotoka ”O Efraim”.

⁵³O taongo tumidi maöraha i omanga de o hasili mangöe yamao-maoka o Mesir maberera gënanga ihibobaha.

⁵⁴ Done iböa o taongo tumidi o birokata maöraha, itiai hokä waheto-hetongoka o Yusuf. O dunia mata-mataika idadi o habirokata, ma o Mesir maberera mata-mataika naga o inomo imahi goa-goana.

⁵⁵ Maöraha o Mesir makawaha yomulaenge yamao o hahini, önanga yogahoko oinomo ma koanoika. Daha ma koano wähuloko önanga yoiki o Yusufika de yamoteke hagala okianaga aha o Yusuf wohipareta onangika.

⁵⁶Maöraha o habirokata gënanga idadi iholoi ikiria deʼ i kerewoto o berera mata-mataika. O Yusuf wahelenga o gudang mata-mata deʼ wohukunu o gandum o Mesir manyawaika.

⁵⁷O dunia mata-mataika, hagala o nyawa yoböa o Mesirika la imäija o gandum o Yusufoka, karana o habirokata gënanga i goungu kiaka dika hö modongo.