Read Tobelo O KEJADIAN 42 Bible Online

O KEJADIAN 42 - Tobelo bible

O KEJADIAN 42

¹Maöraha o Yakub woihene naga o gandum o Mesir mabereraka, ünanga wätemo aingoha-ngohakika, ”Yadodoa hongini kanima rirïdokadika?

² Toihenoka naga o gandum o Mesir mabereraka; nioiki dokaika deʼ ni ija o gandum hupaya ngone uha o habirokata hohi honenge.”

³Daha yoiki yangimoi o Yusuf ai ria-riaka gënanga yoija o gandum o Mesir mabereraika.

⁴Mä o Yakub wihigumal̄aua o Benyamin, o Yusuf ai dodoto madutu, woiki imakomoteke dede önanga, karana ünanga wohawana uha-uha idadi wobodito aingohaka gënanga.

⁵Karana o habirokata o Kanaan mabereraka, o Yakub ai ngoha-ngohaka imakomoteke de o nyawa mahomoa yaino imaija o gandum o Mesir mabereraino.

⁶Wohö huku-hukunu o gandum hagala o nyawaika o duniaka i ngodumu ganga o Yusuf, hokä o Mesir magubernur. Hababu gënanga o Yusuf ai ria-riaka yaino de yatilabukuku ai himangoka.

⁷Maöraha o Yusuf wämake ai ria-riaka, ünanga wänako önanga, mäünanga wohiliba hokä wänakoua. Wä dobuturungu ünanga wäleha onangika, ”Ngini okia manyawa?” ”Ngomi o Kanaan manyawa. Ngomi miaino la mimä ija o inomo,” önanga yohaluhu.

⁸Ngarokä o Yusuf wänako ai ria-riaka, önanga iwinakoua ünanga.

⁹ Daha ünanga womähininga ai nanerika mangale önanga. Deʼ ünanga wätemo, ”Ngini nënanga nitotailako; ngini niböa la niatailako kiaka yabole miaberera.”

¹⁰”Kowali, Tuanga,” önanga yohaluhu. ”Ngomi, anigogilaongo Tuanga miböa duga-duga la miija o inomo.

¹¹Ngomi nënanga o riadodoto, ahi tuanga. Ngomi o nyawa maoa, yototailakoua.”

¹²O Yusuf wätemo onangika, ”Ni eluku! Ngini niböa nenangino la nia tailako kiaka yabole o berera nënanga.”

¹³Onanga yohaluhu, ”Ngomi nënanga imi ngimoi de hinoto o riadodoto, ahi Tuanga, ngomi o ama moi aingoha-ngohaka o Kanaan mabereraka. Ngomioka womatengo wohonengoka deʼ mia dodoto makiditoko naga de tongomi mia ama.”

¹⁴”Igoungu itiai hokä ahi demo,” o Yusuf wohaluhu, ”ngini nënanga yotötailako.

¹⁵Ngohi tomau tiniuji ngini: Ngohi tokoboto de ma koano ai romanga ngini aha niamal̄aua o berera nënanga nako niadodoto makiditoko gënanga wainoua nenangino.

¹⁶Nginioka womatengo kokiani wolio wïngoho. Mahomoa aha tätumungu hiädono niademo inyata igoungu. Nako kowali, de ma koano ai romanga, ngini nanga miahaturu yotötailako!”

¹⁷De ipaha önanga yahingohama o buika o wange hange madëkana.

¹⁸O wange hangeoka o Yusuf wätemo onangika, ”Ngohi o nyawa tï modo-modongo deʼ tihigihene ma Jou Madutuika. Ngini aha tinihi halamati de o jaji moi.

¹⁹La ihinyata i goungu ngini nënanga niahininga itebini, nginioka womatëngo aha tïtumungu o bui magoronaka; mahomoa yakunu nilio deʼ niao o gandum ngini ni ija-ija iti matau madol̄a magogiria yamao yähahini.

²⁰De ipaha gënanga ngini kokiani niwiao nia dodoto makiditoko ngohino. Genanga damä manyonyata i goungu nia demo gënanga itiai, deʼ ngini aha tinihukumua nihonenge.” Onanga ihimoteke de magubernur ai putuhu gënanga.

²¹Daha önanga imaketemo moi demoika, ”Aa, ngone o öraha nanga i nä hukumu nanga howono mahasili nanga dodotika kahuruono; ünanga wogahoko o roriwo mä ngone hïfaduliua, ngarokä ngone himake ünanga wamao wohangihara. Genanga mahababu o öraha nanga ngone hamao o huha de o hangihara nënanga.”

²² O Ruben wato, ”Koigoungua kahuruono ngohi tahetongoka nginika hupaya o ngohaka gënanga uha hïsarakianaga. Mä ngini nioluku niihene. Deʼ öraha nanga ai honenge mabalaha ngoneino.”

²³O Yusuf womangarati toönanga manga demo, mä önanga yanakoua o hali gënanga, karana önanga ima ketemo de o Yusuf yapäke de manga uru madodohanga.

²⁴O Yusuf wämal̄a önanga, de woari. Maöraha wakunokali wotemo-temo, ünanga womakilioro onangika, daha wïl̄ë o Simeon, deʼ wohuloko iwiliko ünanga ai riadodoto mata-mata manga himangoka.

²⁵O Yusuf wohipareta hupaya ai ria-riaka manga karongo yao-ao mata-mata yonoa de o gandum deʼ manga tiwi moi-moi ihingohama mangakaronguku gënanga. Ikali hupaya önanga yahidöaka o inomo la iti manga bilaono o ngekomika. Aipareta gënanga yadiai.

²⁶Genanga de iböto o Yusuf ai ria-riaka yögina toönanga manga keledai de o gandum önanga yo ija-ijaoka gënanga, daha genangokadau de önanga imä jobo.

²⁷I mä idu-idu mangïoka onangoka woma tengo wahelenga ai gandum makarongo la wohi ol̄omo ai keledai. Wamake ai tiwi o gandum gënanga mal̄okuoka.

²⁸”Tongohi ahi tiwi ihigilio,” wäböaka ai roriadodotika. ”Niamake, naga tongohi ahikarongo magoronaka!” Toönanga manga hininga idadi iruae, deʼ de manga modongo önanga imakokeleha, ”Okia ma Jou Madutu wodiai ngoneino?”

²⁹Maöraha imahiädono o Kanaanika, önanga ihijarita manga amaika hagala moi-moi önanga yamao-maoka. Onanga yato,

³⁰”O Mesir magubernur womitemo womïdodorohu ngomino deʼ womï tae ngomi mitötailako ai berera.

³¹Ngomi mihaluhu, ’Ngomi o nyawa maoa, mitotailakoua, ngomi o nyawa miahininga i riko-rikoto.

³²Ngomi mata-mata imingimoi de imihinoto o riadodoto, o ama moi, deʼ womatengo wohonengoka, mamia dodoto makiditoko naga de mia ama o Kanaan mabereraka.’

³³Ma gubernur gënanga wotemo, ’Ngohi tomau tinï uji la tohiöriki boteka ngini o nyawa nia hininga i riko-rikoto: Nginioka woma tengo kiani wogö gogere; mahomoa yakunu nilio ni ao o gandum nia ngohaka de nia hekatika magogiria yamao o hahini.

³⁴De iböto ngini nima kilioro niwi ao nia doto makiditoko, ngohi aha tohi öriki ngini yotö tailakoua, duga-duga ngini o nyawa manga hininga i riko-rikoto. Done nia riadodoto tï tumu-tumunguku gënanga aha tihi gilio nginika deʼ ngini yakunu nigogere o bereraka nënanga deʼ nia hininga ma huka nima hakunu.’ ”

³⁵De ipaha, maorahoka önanga manga karongo madol̄a yokopoa, onanga moi-moi yamake manga tiwimangï de matiwioka; daha önanga duru yohawana, de manga ama ö.

³⁶Daha manga ama wätemo, ”Ngini nihi hababu ahingohaka mata-mata yohihanga. O Yusuf koiwïwaka; o Simeon koiwïwaka; deʼ öraha nanga ngini aha niwi l̄ë o Benyamin ö. Goguleua ahi huha de ahi hangihara!”

³⁷De o Ruben wïtemo ai amaika, ”Nihilapahi o Benyamin ngohino, Baba; damä aha ngohi tihigilio, nako kowali Baba yakunu nä toma ahingohaka o nauru yahinoto.”

³⁸Mä o Yakub wätemo, ”Kowali! O Benyamin yakunua ngini niwiao; ai riaka wohonengoka deʼ öraha nanga duga-duga unangokahi wogogogere. Uha-uha ünanga wamake o bodito o dodagi magoronaka gënanga. Ngohi nënanga hiperekioka, deʼ o hininga mahuha aha ngini ni ao-ao ngohino gënanga mabaha ka ahi honenge.”