Read Tobelo O KEJADIAN 43 Bible Online

O KEJADIAN 43 - Tobelo bible

O KEJADIAN 43

¹O habirokata o Kanaan mabereraka idogo kahägiria, deʼ dei böto o Yakub ai tau madol̄a yamataka mata-mata ma gandum yo ao-ao o Mesirino, o Yakub wätemo ai ngoha-ngohakika, ”Ni oikoli dokaika de nina ijäli nanga gandum.”

³Daha o Yehuda wïtemo unangika, ”O Mesir magubernur duru womihi bobehehongoka, ngomi yakunua miwïhimanga ünanga nako ngomi miwi aoua tongomi miadodoto gënanga.

⁴Nako Baba nihigumal̄a miadodoto wonïki, ngomi mimau mioiki dokaika mi ija o inomo.

⁵Mänako Ama nihigumal̄aua o Benyamin wonïki, ngomi mioluku mioiki, hababu magubernur gënanga wotemoka ngomi miakunua miwïhimanga nako miadodoto wonïkua.”

⁶O Yakub wato, ”Yadodoa hongini nihidiai o huha de nihingahu o nyawaika gënanga ngini de nia dodotohi?”

⁷Onanga yohaluhu, ”O nyawa gënanga koitogu-togumua womi leha mangale ngomi deʼ mangale nanga tau madol̄a, wato, ’Kawo wangohi nia ama? Boteka ngini de niadodotohi o nauru mahomoa?ʼ Ngomi pakisa miobaluhu hagala ai loleha. Sarakia ngomi miakunu miatuga ünanga aha womï huloko ngomi miwi ao tongomi mia dodoto gënanga?”

⁸Daha o Yehuda wato ai amaika, ”Nihigumal̄a o ngohaka gënanga wonïki, de ngohi tomahi tagongo mangale ünanga. Ngomi aha mimä jobo de majapati hupaya ngoneoka kamoiö de hohihonengua o habirokata.

⁹Ngohi ai dururu deʼ Baba yakunu nïgahoko ünanga ngohino. Nako ngohi tihigilioua de mahalamati, ngohi tatagongo mahukumanga ahingango magurutu.

¹⁰Ade-ade ngone hototamäua hoko gënanga madëkana, maraioka o öraha nanga ngomi mioiki de milio mihigali mahinoto iböto.”

¹¹Daha manga ama wätemo, ”Nako igoungu kokiani hoko gënanga, niao o hasili duru maoa-oa manga bereraino nënanga niakarongo magoronaka hokä o ngongike iti magubernur gënanga: O kismis, o madu, o rampa-rampa, o kemiri mahohoko deʼ o badam mahohoko.

¹²Niaoli o tiwi idogo mahinotoli, karana o tiwi niamö make-make niakarongo magoronaka gënanga kokiani ngini nihi gilio. Mudukua gënanga ihilihowono.

¹³Niwiao niadodoto gënanga de nima kilioro itai-taiti.

¹⁴Tanu ma Jou Madutu Woko Kuaha wadiai magubernur gënanga winïdora nginika, hiädono ünanga womau wahigilio o Simeon deʼ o Benyamin nginika. Yakorona ngohi nënanga, nako ngohi igoungu kokiani ahingoha-ngohaka yohihanga, okia yakunu todiai.”

¹⁵De ipaha o Yusuf ai ria-riaka yoao o ngongike-ngongike gënanga deʼ o tiwi idogo mahinoto, daha önanga imäjobo o Mesirika de o Benyamin. Imahi ädonikaka dokengoka, önanga iwïhimanga o Yusuf.

¹⁶Maöraha o Yusuf wïmake o Benyamin ünanga wätemo iwi löleleaniika wohiböbalu-baluhu ai tau madol̄a, ”Na ao o nyawa geönanga ahi tauika. Onanga aha yol̄omo dede ngohi o wangeoka nënanga, hababu gënanga niatöaka o aiwani o gigini o dutu moi daha nihidiaiuku gënanga.”

¹⁷Wolöleleani gënanga wadiai aipareta gënanga deʼ wa ao o Yusuf ai riadodoto magubernur ai tau magoronaika.

¹⁸Maöraha önanga yaao o Yusuf ai tau magoronaika, önanga yohawana deʼ imapikiri, ”Ngone inaao nenangino, karana o tiwi hamö make-make tongone nanga karongo magoronaka maöraha ngone hoboa mahira nenangino. Önanga aha inätagoko ina hitodokanino, daha yal̄ë nanga keledai deʼ inadiai ngone toönanga manga gilaongo.”

¹⁹Karana gënanga imahitigi-tigika o Yusuf ai tau mangorana, önanga iwitëmo ai tau madol̄a manga baluhika,

²⁰”Uha nomi ngamo, Tuanga, ngomi mamoi iböto miböa nenangino la mimä ija o inomo.

²¹Mia dodagioka milio, maöraha ngomi mimau mimäidu, ngomi miahohe miakarongo. Mia nako-nakoua mata-mata matiwi miagandum mabobangu naga mapine mal̄okuoka. Ngomi mihiorikua o nagona yönöa o tiwi gënanga. O öraha nanga ngomi miaoli mihigilio ngonaika Tuanga. Mahomoa de gënanga ngomi kami mägaohi o tiwi la mimä ijali o inomo.”

²³Wolö leleani gënanga wätemo, ”Uha ni hawana. Uha nihawatere. Nia Jou Madutu enagënanga ma Jou Madutu niaama wïhuba-huba, ünanga wohingohama o tiwi gënanga niakarongo magoronauku. Ngohi tatarimaka magandum mabobangu gënanga.” De ipaha wïao o Simeon onangika,

²⁴daha önanga wängotaka o tau magoronaika. Unanga wahidöaka o akere la manga l̄ou yaihoro; deʼ toönangö manga keledai mainomo.

²⁵De iböto gënanga önanga ihidiai manga ngongike la iwihidöaka o Yusufika nako ünanga woböa o wange ikoronaka karana önanga yahingahuoka önanga aha yol̄omo kamamoi dede ünanga.

²⁶Maöraha o Yusuf womahiädono o tauino, önanga ihidöaka o ngike-ngongike gënanga o Yusufika inoli yohuba unangika.

²⁷O Yusuf woleha mangale okia i dadadi onangoka, daha wotemo, ”Ngini nihijaritaka ngohino mangale niaama iwipoperekioka gënanga. Sarakia idadadi unaika? Kamaoa-oa?”

²⁸Onanga yohaluhu, ”Ani gilaongo, Tuanga, mia ama, kamaoa-oa i dadadi unangika.” Daha önanga iwihuba onangika.

²⁹Maöraha o Yusuf wïmake ai dodoto, o Benyamin, ünanga wotemo, ”Ho neünanga niadodoto makiditoko gënanga, ngini niaheto-hetongoka ngohino? Tanu ma Jou Madutu wonihibarakati, ahingohaka.”

³⁰O Yusuf ai hininga i tokeme karana wamäo wïigo de wosanangi ai dodotika. Unanga ngadeke wakunua ai diri watumungu, karana gënanga itodokanino genangoka de ünanga woiki daha wowohama ai kamarika deʼ woari.

³¹De iböto gënanga ünanga ai biono wamahau, daha wohupuoli, deʼ woma totongohono, ünanga wähuloko o inomo ihidiai.

³²O Yusuf wol̄omo o meja moioka womatengoka, de ai roriadodoto o meja mahomoaka. Hagala o Mesir manyawa naga genangoka yol̄omo o meja mahomoakaoli, karana önanga imamao o kia-kiaua yadaene nako imakinïki yol̄omo de o Ibrani manyawa.

³³O Yusuf ai roriadodoto yahingï o meja imatekerihimanga de o Yusuf, imamoteke manga umuru imakokadadu, mulaenge mariakoka hiädono madodotuku. Maöraha önanga yamake madodagi yahingï gënanga, önanga kaimakupulono de yoheranga.

³⁴Onanga yahidöaka o inomo o Yusuf ai mejaka de yaino, deʼ o Benyamin iwïleleani higali mamotoa iholoi iwöe ngaro de ai ria-riaka. Daha önanga yol̄omo de yokere kamamoi de o Yusuf hiädono duru yawedono.