Read Tobelo O KEJADIAN 44 Bible Online

O KEJADIAN 44 - Tobelo bible

O KEJADIAN 44

¹I tai-taitino gënanga o Yusuf wïhipareta ai tau madol̄a mangabaluhika, ”Nadol̄a o nyawa geönanga manga karongo de o gandum, mangöe hokokia önanga yakunu yao, de nönoa matiwi moi-moi manga karonguku, o gandum gënanga mal̄okuoka.

²Nönoaö ahi galahi o haaka toöna manga dodoto makiditoko ai karonguku, kamamoi de matiwi ai gandum mabobangu.” Wolöleleani gënanga wadiai o pareta gënanga.

³Yarehino mawange duru o ngoru-ngoruminohi, o Yusuf imakitingaka de ai riadodoto, daha önanga imä jobo de toönanga manga keledai.

⁴Onanga yokurutikaowahi de o kota gënanga, maöraha o Yusuf wïtemo ai tau madol̄a manga baluhika, ”Taiti nanïki o nyawa geonanga. Nako nadaenoka, nätemo onangika, ’Yadodoa hongini niabalahi yaoa-oa de o dorou?

⁵Yadodoa ho ngini niatohiki ahi tuanga ai galahi o haaka? O galahi gënanga wokere de wapake deʼ hokä o mamaihi mapakakaha. Ngini niadiaioka o dorou ma ago-agomo!ʼ ”

⁶Maöraha wolöleleani gënanga womahiädono o Yusuf ai riadodotika, wahetongo okia wihipopareta o Yusuf. Onanga yohaluhu unangika,

⁷”Okia ani dumutu Tuanga? Ngomi mikoboto ngomi midiaiua hoko gënanga!

⁸Tuanga ngona mahirete nohiöriki o tiwi ngomi mia make-make mia karongo magoronaka o gandum mal̄okuoka gënanga ngomi mihi gilioka ngonaika Tuanga. Ho miakunu ngomi mitohiki o haaka ekola o gurasi magubernur ai tauoka!

⁹Tuanga, o demo ma ade o baranga gënanga i make unangoka womatengo mia hidogoronaka, mal̄aikala ünanga iwi hukumu wohonenge, deʼ ngomi midadi anigilaongo Tuanga.”

¹⁰Wolöleleani gënanga wätemo, ”Kayaoa; mä duga-duga unangoka o galahi gënanga i make, geünanga aha wodadi ahi gilaongo; mahomoa yakunu nioiki.”

¹¹Daha de majapati önanga moi-moi ihiguti deʼ yahelenga manga karongo.

¹²Wilöleleani o Yusuf gënanga watailako o karongo-o karongo gënanga wohidodiai, i mulaenge mariaka ai karongo hiädono madodoto makiditoko ai karongika, deʼ ogalahi gënanga yamäke o Benyamin ai karongo magoronaka.

¹³Ai ria-riaka duru manga hininga ihuha hiädono yakäkakihi toönanga manga pakeanga. Onanga yögina to ona manga keledai deʼ imakilioro o kotaika.

¹⁴Maöraha o Yehuda deʼ ai riadodoto imahi ädono o Yusuf ai tauika, ünanga naga kagenangokadauohi, deʼ önanga yo huba ai himangoka.

¹⁵Done o Yusuf wotemo, ”Okia ngini niadiai gënanga? Ngini nihi örikua o nyawa hokä ngohi nënanga yakunu tohiöriki nia manarama madorou de o mamaihi?”

¹⁶”Yakunu okia ngomi mitemo ahi Tuanga?” o Yehuda wohaluhu. ”Sarakia ngomi miakunu mimahipongono deʼ mihitiai tongomi mia diri? Ma Jou Madutu wahelenga tongomi miahowono. O öraha nanga mata-mata ngomi anigilaongo Tuanga, koigoungua, duga-duga ünanga yamömake-make magalahi gënanga unangoka.”

¹⁷O Yusuf wato, ”Kowali! Ngohitoluku todiai hoko gënanga! Duga-duga unangoka magalahi gënanga yamö make-make aha wodadi ahi gilaongo. Mahomoa yakunu nilio nia hininga mahuka nia amaika.”

¹⁸O Yehuda wotagi mahimangiha wihitigi-tigika o Yusuf deʼ wotemo, ”Uha nongamo, ahi Tuanga, nohihigumal̄a to ade-adeoli de ngona ahi Tuanga. Uha nohi ngamo ngohino; Ahi Tuanga hokä ma koano Mesir mahirete.

¹⁹Ahi Tuanga nolehaka ngomino nënanga, ’Boteka ngini de niaamaohi ekola niadodoto mahomoaohi?ʼ

²⁰Ngomi mihaluhu, ’Tongomi mia Ama iwiperekioka deʼ miadodoto womakil̄au maöraha mia ama ai umuru ikurutil̄eoka. Ai riaka o ayo moi de miadodoto gënanga wohonengoka, hoʼ önanga yahinotoka duga-duga unangokahi mahirete kawowangohi, deʼ mia ama duru wihayangi unangika.’

²¹Ahi Tuanga nomihuloko ngomi miwi ao ünanga nenangino, hupaya ahi Tuanga yakunu nïmake,

²²daha ngomi mihaluhu o ngohaka gënanga yakunua imatingaka de ai ama; nako ünanga womatingaka de ai ama, ai ama aha wohonenge.

²³De ipaha ahi tuanga notemo ’Ngini yakunua nihïhimangoli ngohi nako niwiaoua niadodoto gënanga.’

²⁴Maöraha ngomi mima kilioro tongomi mia amaika, ngomi mi hiadono unangika ahi Tuanga ani demo gënanga.

²⁵De ipaha tongomi mia ama womïhuloko ngomi miboali nenangino la miija o inomo.

²⁶Ngomi mihaluhu, ’Ngomi yakunua mioiki dokaika, hababu ngomi yakunua miwïhimanga magubernur nako tongomi miadodoto makiditoko wonïkua. Ngomi duga-duga yakunu mioiki dokaika nako unangö woiki.’

²⁷De ipaha tongomi mia ama wotemo, ’Ngini nihiöriki o ngo Rahel, ngohihekata duga-duga amingohaka hinoto.

²⁸Madodihiraka wohidogumal̄aikaoka ngohi. Unanga marai iwigolioka o aiwani madorou, karana hiädono o öraha nanga ngohi tïmakeokaua.

²⁹Nako ngini niwil̄ë o ngohaka madodoto makiditoko nënanga ngohioka, deʼ okianaga idadi dede ünanga, o hininga mahuha ngini niao-ao ngohino gënanga aha mabaha ka ahi honenge, karana ngohi nënanga i hiperekioka.’ ”

³⁰”Karana gënanga, ahi Tuanga,” o Yehuda wato o Yusufika, ”nako ngohi toma kilioro mia amaika de tongomi miadodotua gënanga, marai tongomi mia ama gënanga wohonenge. Ai ngango imahigagao o ngohakoka gënanga, deʼ ünanga hoko gënanga ai mobereki hiädono o hininga mahuha ngomi miao-ao unangika gënanga aha mabaha kai honenge.

³²Inoli, ngohi tojajioka ahiamaika ngohi todadi o ngohaka gënanga ai dururu. Ngohi totemo ahi amaika, nako ngohi tiaoua o ngohaka gënanga tihigilio unangika, ngohi aha tatagongo mahukumanga hokokia madekana towango.

³³Ho, ngohi togahoko, ahi Tuanga, nohihigumal̄a ngohi togogogere nenangokadau todadi ani gilaongo ahi Tuanga tïtagali tongomi miadodoto nënanga; mal̄aikala ünanga wolio kamamoi de ai ria-riaka.

³⁴Sarakia yakunu ngohi tomakilioro tongomi mia amaika nako o ngohaka gënanga wonïkua? Ngohi done tapöaua tölega-lega o bodito aha iwitapal̄u tongomi mia ama gënanga.”