Read Tobelo O KEJADIAN 45 Bible Online

O KEJADIAN 45 - Tobelo bible

O KEJADIAN 45

¹ O Yusuf wakunokaua watumungu ai mamao ai pegawe-pegawe manga himangoka. Karana gënanga wähuloko önanga yamal̄a o kamari ma amo-amoko gënanga hupaya ünanga womahi nyata ai riadodotika imoteke madiai ünanga o naguna.

²De iböto mata-mata ai pegawe yamal̄aka o kamari ma amo-amoko, o Yusuf woari wakua-kuatil̄e, hiädono o Mesir manyawa o kamari ma amo-amoko maporetoka yoihene, deʼ o abari gënanga yadono ma koano ai kadatoika.

³O Yusuf wätemo ai riadodotika, ”Ngohi nënanga o Yusuf. Kawowangohi nanga ama?” Yamake gënanga ai riadodoto duru yohawana hiädono yakunua yohaluhu.

⁴Daha o Yusuf wato onangika, ”Niaino nengino.” Onanga imahitïgi, deʼ wätemoli, ”Ngohi o Yusuf, ngini nihihukunoka o Mesirika.

⁵Uha nihawana ekola niatoduba niadiri karana ngini nihihukunoka ngohi. Imoteke madiai ma Jou Madutu mahirete wohiao ngohi nenangino tinï hihira ngini la tahihalamati o nyawa manga ngöe.

⁶O öraha nanga daha o taongo hinoto o habirokata maöraha, deʼ madekana o taongo motoahi o nyawa aha yakunua yopajeko ekola youtuku.

⁷Ma Jou Madutu wohiaoka ngohi tinïhihira ngini la ngini tinihihalamati de madodagi i höhera-heranga nënanga, deʼ tomahi tagongo niahalamati deʼ niangohaka de niadanongo idogo.

⁸Ho imoteke madiai nginiua nidadi o hababu ngohi naga nenangokadau, duga-duga ma Jou Madutu. Unanga wohihidadioka ngohi ma koano Mesir ai pegawe ikökurutil̄e. Ngohi ihihijojo o kuaha ai tau de madol̄a mata-mataika deʼ o Mesir mata-mataika.

⁹ Oraha nanga itaiti ngini nima kilioro nanga amaika deʼ niahëtongo unangika aingohaka o Yusuf wotemo hoko nënanga, ’Ma Jou Madutu wohihidadi ngohi yakokuaha o Mesir mata-mataika; woma tai-taiti waino.

¹⁰Nanga ama yakunu wogogere o Gosyen madaeraoka, woma hitigi-tigino ngohino — nanga ama, deʼ aingohaka de ai danongo, ai duba, aikabingi, ai hapi deʼ hagala tonanga ama.

¹¹Nako nanga ama naga o Gosyen madaeraoka, ngohi takunu tïpaliara nanga ama. O habirokata maöraha kaidogohi o taongo motoahi, deʼ ngohi aha tohidailako hupaya nanga ama, ai tau madol̄a deʼ nanga ama ai aiwani o gigini uha okianaga ikuranga.’ ”

¹²O Yusuf wotemoli, ”O öraha nanga ngini mahirete niamake, ngonaö Benyamin, i gou-goungu ngohi o Yusuf.

¹³Nahetongo nanga amaika hoko kia ma amoko tongohi ahi kuaha nenangoka dau o Mesir mabereraka deʼ nihijarita unangika hagala ngini nia make-makeoka. Daha tai-taiti niwiao ünanga nenangino.”

¹⁴De iböto gënanga ünanga wïkololo o Benyamin, ai dodoto gënanga, daha woari; o Benyaminö woari inoli wïkolololi o Yusuf.

¹⁵De ipaha, de kawo ari-ariohi, o Yusuf wäkololo mata-mata ai riadodoto deʼ wä ame önanga. De iböto gënanga önanga yomulaenge imä teke ade-ade dede ünanga.

¹⁶Maöraha ma koano ai kadatoka yoihene o abari o Yusuf ai riadodoto yoböa, ma koano deʼ ai pegawe-pegawe mayosanangi.

¹⁷Daha ma koano wïtemo o Yusufika, ”Nähuloko aniriadodoto gënanga manga keledai yogina de o gandum deʼ yolio o Kanaanika

¹⁸la iwingoho niaama deʼ manga tau madol̄a daha imatagali nenanginodau. Ngohi aha tahidöaka onangika o tonaka duru maoa-oa o Mesir mabereraka, deʼ önanga aha yakunu yowango de koyo kura-kurangua de o tonaka gënanga mahasilino.

¹⁹Nä huloko onangö nenangoka de imä gao o kereta muruono naga iti toöna manga hekata deʼ manga ngohaka mahohumujurohi, deʼ la iwingoho toönanga manga ama.

²⁰Onanga i paraluua yapikiri manga bara-baranga pakisa önanga yamal̄aika, karana duru maoa-oa o Mesir mabereraka mata-mataika aha idadi toönanga.”

²¹O Yakub aingoha-ngohaka yadiai ma koano gënanga aipareta. O Yusuf wahidöaka onangika o kereta muruono naga, imamoteke de makoano aipareta, deʼ manga bilaonö mangale manga dodagi.

²²Yahidöakoli onangika o nyawa moi-moi o pakeanga mahungi o habi moi, mä o Benyaminika wihidöaka o ratuhu hange o tiwi haaka deʼ o pakeanga mahungi o habi motoa.

²³Unanga wohidingoto ai amaika o keledai o dutu ngimoi de ihigina o bara-baranga duru maoa-oa o Mesir mabereraka, deʼ o keledai o dutu ngimoioli de magina o gandum, oroti de o inomo mahomoa la yaol̄omo manga dodagi magoronaka o Mesirika.

²⁴De ipaha ünanga wahidongotaka yosobo ai riadodoto, inoli wätemo onangika, ”Uha nima teke ributu o ngekomika.”

²⁵Onanga yamal̄a o Mesir deʼ yolio o Kanaan mabereraika o Yakubika, toönanga manga ama.

²⁶”O Yusuf kawo wangohi!” önanga yato unangika. ”Unanga wakokuaha o Mesir mata-mataika!” Woihene o abari gënanga, o Yakub iwitomomonoka, deʼ ünanga wä ngakua onangika.

²⁷Mä de ipaha önanga ihijarita mata-mata wahöheto-hetongo o Yusuf onangika, deʼ maöraha ünanga wamake makereta o Yusuf wohidingo-dingoto la iwïbuhuku deʼ iwiao o Mesirika, ünanga womatodokana ai hayalino.

²⁸”Ahingohaka o Yusuf kawowangohi!” una wato. ”Duga-duga gënanga ngohi tö igo-igo! Ngohi kokiani toiki deʼ tïmake i hira de tohonenge.”