Read Tobelo O KEJADIAN 46 Bible Online

O KEJADIAN 46 - Tobelo bible

O KEJADIAN 46

¹O Yakub wohidiai hagala ai kiahonanga daha imäjobo. I ma hiädono o Bersyebaika ünanga wohihuba o huhuba ma Jou Madutuika ai ama o Ishak wïhuba-huba.

²Yohutuku o momake moi magoronaka, ma Jou Madutu wïtemo unangika, ”Yakub, Yakub!” ”Ia, Jou,” ünanga wohaluhu.

³”Ngohi ma Jou Madutu, ani ama wï huba-huba,” wato. ”Uha nohawana mangale noiki o Mesir mabereraika. Ngohi aha tohidadi aningohaka de anidanongo o hoana ma ago-agomo dokengoka.

⁴Ngohi aha tonitomoteke ngona o Mesirika, deʼ taao aningohaka de anidanongo imakilioro o bereraino nënanga. Aha o Yusuf naga anidatekoka maöraha okia aniajali imahiädono.”

⁵Daha o Yakub o Bersyebaka de womä jobo. Ai ngoha-ngohaka iwihidöa toönanga manga ama inoli toönanga manga hekata de manga ngohaka okuretail̄e wohidödingo-dingoto o Mesir manga koano.

⁶ Onangö yao manga aiwani o gigini deʼ hagala manga arata önanga yamake-makeoka o Kanaan mabereraka, daha imä jobo o Mesirika. O Yakub wäao yongodu-ngodumu aingohaka de aidanongo, enagënanga

⁷mata-mata aingohaka de ai danongo o nauru deʼ o ngoheka.

⁸O Yakub ai tau ma dol̄a manga gegetongo yonöninïki o Mesirika ganga:

⁹O Ruben, aingohaka woria-riaka; ai ngoha-ngohaka: o Henokh, o Palu, o Hezron deʼ o Karmi.

¹⁰O Simeon; ai ngoha-ngohaka: o Yemuel, o Yamin, o Ohad, o Yakhin, o Zohar, deʼ o Saul, o ngohaka ngoihekatoka o Kanaan mangoheka momatengo.

¹¹O Lewi; aingoha-ngohaka: o Gerson, o Kehat deʼ o Merari.

¹²O Yehuda; aingoha-ngohaka: o Syela, o Peres deʼ o Zerah, ho de o Yehuda aingohaka mahomoa, enagënanga o Er deʼ o Onan yohonenge o Kanaan mabereraka. O Peres aingoha-ngohaka: o Hezron deʼ o Hamul.

¹³O Isakhar; aingoha-ngohaka: o Tola, o Pua, o Ayub, deʼ o Simron.

¹⁴O Zebulon; ai ngoha-ngohaka: o Sered, o Elon deʼ o Yahleel.

¹⁵Onanga mata-mata tö Yakub ganga o ngoha-ngohaka o ngo Lea mahingohaka o Mesopotamia mabereraka, mahomoa de gënanga ngoi ora ö ami romanga o ngo Dina. Ho yongodumu o Yakub ai ngohaka de ai danongo ngoi hekatoka o ngo Lea yamoruange de ya ruange.

¹⁶O Gad; aingoha-ngohaka: o Zifyon, o Hagi, o Syumi, o Ezbon, o Eri, o Arodi deʼ o Areli.

¹⁷O Asyer; aingohaka-ngohaka: o Yimna, o Yiswa, o Yiswi deʼ o Beria, de inoli o ngo Serah, toönanga manga biranga. O Beria ai ngoha-ngohaka ganga o Heber deʼ o Malkiel.

¹⁸O nyawa yangimoi de yabutanga gënanga ganga o Yakub aingohaka de ai danongo o ngo Zilpaino, enagënanga ngoi gilaongo womihidöa-döaka o Laban ngoi oraika o ngo Lea.

¹⁹O ngo Rahel o Yakub ngoihekata amingohaka yahinoto, enagënanga o Yusuf deʼ o Benyamin.

²⁰ O Mesir mabereraka o Yusuf wamake o ngohaka yahinoto, enagënanga o Manasye deʼ o Efraim mahingohaka ngoihekata o ngo Asnat, o Potifera ngoi ora, wodadi o imam o Heliopolis mabereraka.

²¹O Benyamin; aingoha-ngohaka: o Bela, o Bekher, o Asybel, o Gera, o Naaman, o Ehi, o Ros, o Mupim, o Hupim deʼ o Ared.

²²O nyawa yangimoi de yaruata gënanga ganga o Yakub aingohaka de ai danongo ngoi hekatoka o ngo Rahel.

²³De ikali o Dan; aingohaka o Husim.

²⁴O Naftali; aingoha-ngohaka: o Yahzeel, o Guni, o Yezer deʼ o Syilem.

²⁵O nyawa yatumidi gënanga ganga o Yakub aingohaka de ai danongo o ngo Bilhaino, ngoi gilaongo womihidöa-döaka o Laban ngoi oraika o ngo Rahel.

²⁶O Yakub aingohaka de ai danongo yoiki o Mesirika mata-mata yamoributanga de yabutanga, yaetongua ai momol̄oka.

²⁷ O Yusuf aingoha-ngohaka i makil̄au o Mesir mabereraka naga yahinoto, hiädono o Yakub ai tau madol̄a imahi ädono o Mesir mabereraika mata-mata yamori tumidi.

²⁸O Yakub wïhuloko o Yehuda wotagi wïhihira la wïahoko o Yusuf hupaya imamake de ai ama o Gosyen madaeraka. Maöraha önanga imahi ädono o Gosyen madaeraka,

²⁹o Yusuf wodöa ai keretail̄e la imamake de ai ama genangokadau. Maöraha önanga imamake, o Yusuf wïkololo ai ama deʼ madekana woari.

³⁰O Yakub wïtemo o Yusufika, ”O öraha nanga ngohi tömodeke tohonenge, karana ngona tonimakeoka deʼ tohi öriki ngona kanowangohi.”

³¹Daha o Yusuf wätemo ai riadodotika deʼ ai riadodoto de manga ngoha-ngohaka mahomoahi, ”Ngohi kokiani tooiki deʼ tohi ngahu ma koanoika tongohi ahiriadodoto deʼ yongodumu ahi riadodoto de manga ngoha-ngohaka yogogogere o Kanaan mabereraka yoboaka.

³²Ngohi tahetongo ngini o duba deʼ o hapi magogoana, deʼ niaoka niaaiwani o gigini deʼ hagala niakiahonanga.

³³Nako ma koano winïahoko ngini deʼ woleha niamanarama,

³⁴niahetongo unangika ngini nënanga kania hohumujurohi o aiwani nipopaliara, imatero hokä niaete de niatohora. De hoko gënanga ünanga aha winïhuloko ngini nigogere o Gosyen madaeraka.” O Yusuf wahetongo o hali gënanga karana o Mesir manyawa yamäo yobaragunaua imateke dodiawo de o aiwani yogoa-goana.