Read Tobelo O KEJADIAN 48 Bible Online

O KEJADIAN 48 - Tobelo bible

O KEJADIAN 48

¹O öraha muruono naga ipahaika iwihiabari o Yusufika ai ama wopanyake duru kahähiri. Ho ünanga woiki de aingohaka yahinoto, enagënanga o Manasye deʼ o Efraim iwïlega o Yakub.

²Maöraha o Yakub woihene o Yusuf woböa, ünanga wödodoomuino ai kuata, daha wogogeruku ai ngidu-ngiduoka.

³ O Yakub wïtemo o Yusufika, ”Ma Jou Madutu Wo Kokuaha womahimatokoka Ai diri ngohino o Lus madaeraka, o Kanaan matonakoka, deʼ wohihi barakatioka ngohi.”

⁴Unanga wohi temo ngohino, ”Ngohi aha tonihi döaka ngonaika o ngohaka de o danongo manga ngöe, hupaya anidifauku yodadi o hoana de o berera mangöe; ngohi aha tohidöaka o berera nënanga aningohaka de ani danongika hokä toönanga madutu kahi ado-adonika.”

⁵O Yakub wohigila-gila, ”Yusuf, aningohaka yahinoto o Efraim deʼ o Manasye imakokil̄au o Mesir mabereraka nënanga i hira de ngohi tomahi ädono nenanginodau, tadiai ahingohaka, hokä o Ruben deʼ o Simeon.

⁶Nako ngona namakeoli o ngohaka, önanga aha tädiaiua hokä ahingohaka duga-duga itotiai aningohaka; o puhaka mangale önanga aha önanga yatarima o Efraim deʼ o Manasyeino.

⁷ Ngohi tadiai o hali gënanga mangale o ngo Rahel ngoni ayo. Ahi dodagi magoronaka toma kilioro o Mesopotamia de taino, ngoni ayo mohonenge o Kanaan matonakoka, i kurutikaua de o Efrata, deʼ ngohi ahihininga duru i huha. Ngohi tomi lungunu dokengoka o Efrataika mangekomo madatekoka.” (Oraha nanga o Efrata yanako hokä o Betlehem.)

⁸Maöraha o Yakub wämake o Yusuf ai ngoha-ngohaka gënanga, ünanga woleha, ”O nagona o ngoha-ngohaka nënanga?”

⁹O Yusuf wohaluhu, ”Nënanga tongohi ahingoha-ngohaka ma Jou Madutu wohihidöaka ngohino nenangokadau, o Mesir mabereraka.” O Yakub wïtemo, ”Nahitigi-tigino ngohino hupaya tahi barakati.”

¹⁰O Yakub womahimakeokaua de madiai karana iwi pereki oka deʼ ai lako i gawaka. O Yusuf wahi tigi-tigika aingoha-ngohaka gënanga o Yakubika, deʼ ünanga wäkololoinoli önanga wä ame.

¹¹Daha o Yakub wïtemo o Yusufika, ”Mata-mata ahihininga koyödagiua aha homa makeoli dede ngona, ma o öraha nanga ma Jou Madutu i goungu wohihi gumal̄a tämakeö aningoha-ngohaka.”

¹²De ipaha o Yusuf wäl̄ë önanga o Yakub ai daparionoka, daha ünanga mahirete watilabukuku wohuba ai ama ai himangoka.

¹³Genanga de iböto o Yusuf wahi gogere aingohaka yahinoto imahi tigi-tigika o Yakubika, o Efraim madodoto makiditoko gënanga ai higiloka deʼ o Manasye woria-riaka ai nirakoka. Mä o Yakub wohiwelekino ai giama deʼ wakelenga ai giama maniraka o Efraim ai häeke mal̄okuoka, hode ai giama mahigili wakelenga o Manasye ai häeke mal̄okuoka.

¹⁵Genanga de i böto wihibarakati o Yusuf, wato, ”Ma Jou Madutu, ünanga ma Jou, o Abraham deʼ o Ishak iwi huba-huba, Unanga ngohi wohi tuda hiädono o öraha nanga;

¹⁶Unanga o malaekat ngohi wohihi lapahioka hagala o boditoino. Tanu ma Jou Madutu gënanga wahibarakati o ngoha-ngohaka nënanga. Tanu kai gila-gila ahi romanga iwango de o Abraham deʼ o Ishak manga romanga mangale karana o ngoha-ngohaka nënanga! Tanu önanga de manga ngohaka de manga danongo, deʼ yowöe manga difauku o duniaka.”

¹⁷O Yusuf wosanangiua maöraha wamake ai ama wakelenga ai giama maniraka o Efraim ai häeke mal̄okuku; daha wasö ai ama ai giama la watururu o Efraim ai häeke mal̄okuoka de o Manasye ai häeke mal̄okuika.

¹⁸Wïtemo ai Ama ika, ”Uha hoko gënanga Baba. Nënanga o ngohaka woria-riaka; nakelenga Baba ani giama maniraka ai häeke mal̄okuku.”

¹⁹Mä ai ama watila, wotemo, ”Ngohi tohiöriki, ahingohaka, ngohi tohiöriki. O Manasye aha ai kuaha i lamoko deʼ ai difauku ma aha yodadi o hoana de o berera ma ago-agomo. De ai dodoto ai difauku ahai iholoi iamoko mangakuaho de yodadi o hoana de o berera ma ago-agomo.”

²⁰ Daha wahibarakatioli ai ngoha-ngohaka o wange gënanga, wato, ”O Israel manyawa aha yahetongo niaromanga nako önanga yahi barakati o nyawa. Onanga aha yotemo, ’Tanu ma Jou Madutu woni diai ngona hokä o Efraim deʼ o Manasye.’ ” De hoko gënanga o Yakub wïtotihira o Efraim ngaro de o Manasye.

²¹Daha o Yakub wïtemo o Yusufika, ”Hokä ngona namake, ahi ajali i tigioka, mama Jou Madutu aha winïriwo ngini deʼ winï ao ngini nilio niaete de niatohora manga bereraika.

²²Ka ngonaika, deʼ aniriadodotikaua, ngohi tonihi döaka o Sikhem, o daera i boburere gënanga taora-oraino o Amori manyawaka de tongohi ahioworo deʼ ahitoimi.”