Read Tobelo O KEJADIAN 49 Bible Online

O KEJADIAN 49 - Tobelo bible

O KEJADIAN 49

¹De ipaha o Yakub wä ahoko ai ngoha-ngohaka deʼ wätemo, ”Nima toomu nengino, nihihitigi-tigino. Aha tinihingahu nginika okia aha ngini niamake o wange maduruino:

²Nima toomu, hei o Yakub ai ngoha-ngohaka niwihi gihene o Israel nia ama.

³O Ruben, ahingohaka mariaka, ngona ahikuata, ahinauru mahohoko madodihiraka. Ngona duru nonauru deʼ duru nokuata ahingohaka mata-mata manga idogoronaka.

⁴Ngona i gapanga nololopaka hokä o akere, hiädono kono holoiua; hababu ngona nomi hiduoka ngohi hekata paliara, napesekoka ani ama ahingidu-ngidu mangï.

⁵O Simeon deʼ o Lewi o riadodoto: toönanga manga däe o dogowini mapakakaha.

⁶Ngohi aha tomotekua toönanga manga fakati magoronaka, de toonaö manga doomu mahidogoronaka. Hababu önanga yotoma manga gangamo magoronaka, o banteng ikuatokaua mangale o sanangi.

⁷Toönanga manga gangamo yamake o bodito, karana yömodongo. Toönanga manga dohata yamake o bodito, karana mahayanga koiwa. Ngohi aha önanga tahikokitingakoka i ngodumu o Israel madaeraka. Ngohi aha tahibarihi önanga o hoana de o berera i ngodumu mahigoronaka.

⁸Yehuda, ngona aha nahorokumu anihaturu mangatotö; ani riadodoto aha inihigiriri deʼ yohuba anihimangoka.

⁹ O Yehuda hokä o singa magö; ënanga yatoma mainomo, deʼ imakilioro maigutika; ënanga imatotupukoro daha i mäidu, deʼ moiua o nyawa yömoroneua yaruae.

¹⁰O Yehuda aha wasö ino kokoano madiki-diki, aidifauku aha yopareta kahi ado-adonika. Hagala o hoana de o berera aha yoao o soungu, deʼ yohuba de imaponuku ai himangoka.

¹¹Ai keledai mangohaka waliko o gota mautuika, o angguru magota mautu duru i hohailoa. Unanga wafoka ai pakeanga de o angguru, ma angguru mamodökara hokä o awunu.

¹²Ai lako mamo dokara karana o angguru waokere, ai ingiri mamagarehe karana o huhu waokere.

¹³O Zebulon aha wogogere womahi tigi-tigika de o ngöto; hagala o kapa aha i matapu ai hohanoka; hiädono o Sidon mabatingi ai daera.

¹⁴O Isakhar hokä o keledai i kua-kuata i mä idu-idu magina makaraja mahidogoronaka.

¹⁵Wamake hokokia marahai o ngï gënanga, deʼ hokokia mahailoa o berera gënanga, done woma huguku ünanga wömodeke iwïgina, deʼ iwi pakisa wokarajanga hokä o gilaongo.

¹⁶Ngona Dan aha nahi dero o adili anihoana de aniberera ngona nodadi o hoana hokä o hoana mahomoa o Israel mabereraka.

¹⁷Ngona hokä o dodiha o ngekomo madatekoka, o dodiha i biha-biha o lurungu madatekoka, yagögoli-goli o kuda mabobo hiädono wadoa-doail̄e womahi kaweli.

¹⁸Ya Jou, nohidödöa-döaka o halamati, gënanga tödodamä.

¹⁹O Gad, ngona aha yo ora-ora i nilawani, ma ngona aha nädogiliorika önanga näora.

²⁰O Asyer, ani inomo duru i wöe dekai hemo-hemoro, ngona aha nasadia o kokoano manga inomo.

²¹O Naftali hokä o maijanga iotanika, aingoha-ngohaka duru yohö hailoa.

²²O Yusuf hokä o keledai magö, o keledai ihühuhuku imahi tigi-tigika de o akere malako, ima popopäta ol̄oku magelehoroka.

²³Ai haturu iwi lawani kahagiria, iwi nïki de o toimi, deʼ matoimi madoto.

²⁴Mä o Yusuf ai giama i tatapu i puturungu, itatapu ikuata ai toimi madoto, karana o Gogoana Wokua-kuata aikuaha, o Yakub ai Jou Madutu, o Israel ai Hohohongo.

²⁵Ani ama ai Jou Madutu wonï riwo ngona; Woko Kuaha wonihi barakati ngona de o awana o dihanguku de o akere o tonakil̄e. De o ngohaka deʼ o hapi,

²⁶o gandum deʼ o bunga. Ani ama ai Jou Madutu Ai barakati i hiholoi de o l̄oku yapoperekioka makaya. Tanu o barakati gënanga mata-mata iuti o Yusuf ai häekuku, ai biono mal̄okuoka. Unanga duru iwihöheto-hetongo ai riadodoto manga hidogoronaka.

²⁷O Benyamin ganga o serigala ihohatera. O ngorumino ënanga yagoli mainomo. Deo hutu-hutu ëna ihi kodoku.”

²⁸Genanga o Israeloka mahoana ngimoi de hinoto, deʼ o demo-demo wahö heto-hetongo toönanga manga ama, maöraha wohidöaka o gitingaka matabea onangika moi-moi.

²⁹ De ipaha o Yakub wohibehehongo aingoha-ngohakika, ”Mahutuohi aha ngohi tolio hokä ahi ete de ahi tohora. Dahaö ngohi nihilungunu toönanga manga datekoka o Makhpela maaruku magoronaka, o Mamre o Kanaan matonakoka o wange mahiwaroko i daduoka. O Abraham waijaka o aruku de o dumule magilolitino o Efronoka o Heti manyawa la yadiai manga jere.

³¹ Genangokadau o Abraham deʼ o ngo Sara, o Ishak de o ngo Ribka yälungunu; deʼ genangokadauö ngohi tomi lungunu o ngo Lea.

³²O dumule deʼ o aruku genangokadau taijaoka o Het manyawaka. Nihi lungunu ngohi genangokadau.”

³³ De ipaha o Yakub wohibehehongo de iböto aingoha-ngohakika, ünanga womä idu daha wohonenge.