Read Tobelo O KEJADIAN 50 Bible Online

O KEJADIAN 50 - Tobelo bible

O KEJADIAN 50

¹O Yusuf woma rubaiha ai amaoka de inowoari deʼ wïame ai ama aibiono.

²Daha o Yusuf wahipareta o mayeti yadodiai de o rampa-rampa la uha i taiti ibodito o Yakub ai mayeti.

³O manarama gënanga yaol̄omo o öraha o wange moruata, enagënanga biaha i paralu la o mayeti yarampa. O Mesir manyawa yapake o huha mapakeanga mangale o Yakub o wange mori tumidi madekana.

⁴De ipaha o huha mapakeanga yapake i böto, o Yusuf wätemo ma koano ai pegawe-pegaweika, ”Nihi ädono o behehongo nënanga ma koanoika,

⁵ ’Maöraha ahi ama i tigioka ai ajali, wohihuloko ngohi tojaji unangika, ngohi aha tï lungunu ünanga o lungunu waso sadiaka magoronaka o Kanaan matonakoka. Hababu gënanga, wohihi gumal̄a ngohi toiki la tïlungunu ahi ama. Genanga de iböto ngohi aha tomakilioro.’ ”

⁶Daha ma koano wotemo, ”Noiki nïlungunu ani ama hoka ngona nojajioka unangika.”

⁷Daha o Yusuf woiki la wïlungunu ai ama. Mata-mata ma koano ai pegawe, de o kadato mabalu-baluhu deʼ mata-mata o gikiri yo ago-agomo o Mesir mabereraka, yoiki kamamoi imakutuono de o Yusuf.

⁸Ai tau madol̄a, ai riadodoto, deʼ ai riadodoto de manga ngoha-ngohaka mahomoa ö yoiki. Duga-duga o ngoha-ngohaka maho humujuru deʼ manga aiwani o gigini igogogere o Gosyen madaeraka.

⁹O kereta il̄e yodöa-döa madoomu de yodöa-döa o kuda il̄eö yonïki, hiädono manga duduono gënanga duru kahä gurutu.

¹⁰Maöraha önanga imahi ädono o nyawa yohido-hidoro o gandum mangïika o Goren-Haatad, o Yordan ma Ngairi o wange mahiwaroko i daduoka, önanga yododora manga hininga i huha deʼ manga ilingi kahäkuatil̄e. O Yusuf wadiai o huha de o duka madatoro, o wange tumidi madekana.

¹¹Maöraha o Kanaan manyawa yamake o huha de o duka madoomu o Garem-Haatad gënanga, önanga yotemo, ”Duru hödora o Mesir manyawa manga huha de manga duka madoomu madatoro gënanga!” Genanga mahababu o ngï gënanga ihi romanga o Abel-Mizraim.

¹²Hoko gënanga o Yakub aingoha-ngohaka yadiai okia o Yakub wahi bobehehongo onangika.

¹³ Onanga yagoraka ai mayeti o Kanaan matonakika deʼ iwilungunu o Makhpela ma aruku magoronaka, o Mamre o wange mahiwaroko idaduoka, o dumuleoka o Abraham waija-ijaoka o Efronoka o Heti manyawa gënanga, la idadi manga jere.

¹⁴O Yusuf wïlungunu ai ama iböto, ünanga womakilioro kamamoi imakinïki de ai riadodoto deʼ mata-mata o nyawa i winö ninïki ünanga la iwi lungunu ai ama gënanga.

¹⁵Toönanga manga ama wohonenge ipahaika, o Yusuf ai ria-riaka yotemo, ”Sarakia o demo ma ade o Yusuf o hininga wonä gogono de womau wabalaha tongone nanga dorou kahuruono?”

¹⁶Hababu gënanga önanga ihidingoto o behehongo nënanga o Yusufika, ”Tongone nanga ama wohonengowahi,

¹⁷ünanga womïhuloko ngomi mitemo ngonaika hoko nënanga, ’Nahi apongo o howono kahuruono yadodiai ani ria-riaka ngonaika.’ Ho, hokä ma Jou Madutu nanga ama wïhuba-huba ai gogilaongo, ngomi migahoko, nohi apongo miahowono miadodiaioka.” O Yusuf woari maöraha watarima o behehongo gënanga.

¹⁸Daha ai riadodoto gënanga yoböa mahirete deʼ yohuba ai himangoka de inoli yotemo, ”Ngomi nënanga anigilaongo.”

¹⁹Mä o Yusuf wätemo onangika, ”Uha nihawana; hababu ngohi yakunua todiai hokä ma Jou Madutu.

²⁰Ngini nimatekefakatioka la nidiai o dorou ngohino, mä ma Jou Madutu watagali o dorou gënanga imadadi o oa, hupaya de i dödadadi kahuruono gënanga o nyawa manga ngöe yowöwango-wango o öraha nanga yakunu yahihalamati.

²¹Uha nihawatere. Ngohi aha tangodumu tingini deʼ nia ngoha-ngohaka mata-mata o baranga okianaga yopöparalu.” Hoko gënanga ünanga wohirïdi toönanga manga hininga de o demo ma oa-oa, hiädono önanga yätora.

²²O Yusuf wotatapu wogogere o Mesir mabereraka deʼ ai riadodoto de manga ngoha-ngohaka; ünanga wowango hiädono ai umuru o taongo o ratuhu moi de ngimoi.

²³Unanga kawakunohi wamake o Efraim aingohaka de ai danongo. Unanga wakunoli wäpaliara o Makhir aingoha-ngohaka, enagënanga o Manasye ai danongo hokä aingohaka mahirete.

²⁴Wätemo ai riadodotika, ”Tongohi ahi ajali i tigioka, mä ma Jou Madutu maraioka aha winïpaliara ngini deʼ winïtuda ngini nihupu de o bereraino nënanga nioiki o bereraika wahijäjajioka de makoboto o Abrahamika, o Ishakika, deʼ o Yakubika.”

²⁵ O Yusuf wähuloko mata-mata ai riadodoto de manga ngoha-ngohaka yokoboto, yato, ”Nijaji ngohino, maöraha okia ma Jou Madutu winï tuda ngini o bereraika gënanga, ngini aha niao to ngohiö ahi mayeti.”

²⁶De ipaha o Yusuf wohonenge o Mesir mabereraka de ai umuru o taongo o ratuhu moi de ngimoi. Onanga yarampa ai mayeti deʼ yakelenga ai honenge mapetiuku.