Read Tobelo O KEJADIAN 6 Bible Online

O KEJADIAN 6 - Tobelo bible

O KEJADIAN 6

¹O nyawa yodogo yowoëoka deʼ imahi gogerewoto o dunia yamode modekika, deʼ yongohaka o ngohaka o ngoheka,

²ma Jou Madutu Ai ngoha-ngohaka yämake o momoholehe gënanga manga höhailoa. Daha önanga yäkawingi o momoholehe önanga yäigo-igo.

³Done ma Jou wotemo, ”Ngohi tohigumal̄aua o nyawa yowango kahiado-adonika; önanga o dodadi ikokakaliua, kokiani yohonenge. Mulaenge öraha nënanga manga umuru aha iholoiua deʼ o taongo o ratuhu moi deʼ monaoko.”

⁴ O öraha gënanga, deʼ ipahaika önanga o nyawa manga lago-agomo deʼ manga gögurutilel̄e o duniaka. Önanga o momoholehe o nyawa yokawi-kawingi deʼ ma Jou Madutu Ai ngoha-ngohaka manga difauku. O nyawa manga lago-agomo deʼ manga gogurutil̄e gënanga ganga o nyawa yonau-nauru deʼ o nyawa ya heto-hetongo i hira-hiraino.

⁵ Ma Jou wamake hokokia manga dorou o nyawa o duniaka; mata-mata toönanga manga dibanga salalu itorou.

⁶Unanga mawomatoduba wahidadioka deʼ wahigogeroka önanga o duniaka. Unanga hoko gënanga ai hininga i tobiki,

⁷hiädono wotemo, ”Aha Tabinaha o nyawa Tahidadadioka gënanga, deʼ hagala o totaleo deʼ o aiwani mahomoa, hababu Ngohi tomatoduba Tahidadioka önanga.”

⁸Mä o Nuh wasanangi ma Jou Ai hininga.

⁹ Nënanga ai jarita o Nuh. Unanga aingohaka yaruange, enagënanga o Sem, o Yafet deʼ o Ham. O Nuh o howono wodiaiua, deʼ ünanga womatengo dika o nyawa maoa ai orahoka. Unanga wo wango imadodiawo deʼ ma Jou Madutu.

¹¹Mä mata-mata o nyawa mahomoa yatorou ma Jou Madutu Ai lolega magoronaka, deʼ o hayanga koiwa o kiakadika.

¹²Ma Jou Madutu wapulono o dunia gënanga deʼ duga-duga wamake o dorou dika, hababu o nyawa mata-mata yatorou manga wowango.

¹³Daha ma Jou Madutu wïtemo o Nuhika, ”Ngohi taputuhoka la tohibobaha hagala o dodadi mangango. Ngohi aha tahohihanga önanga deʼ o dunia, karana o dunia i omangoka deʼ toönanga manga dorou.

¹⁴Nodiai o kapa o gahumu moi mangale ngona o gota i kua-kuata; nadiai makama-kamari magoronaka deʼ nohilape deʼ o teri magoronaino deʼ maporetino.

¹⁵O kapa gënanga kokiani magurutu o metere o ratuhu moi deʼ moruange deʼ hange, mangoata monaoko deʼ hinoto deʼ magurutil̄e o metere ngimoi deʼ hange.

¹⁶Nodiai makatu o kapaoka gënanga, de mabebeno mahoana mangaguru ma amokika o senti moruata deʼ iata. Nadiai o kapa gënanga makamari o lape hange, nadiai ongorana o gahumu moi magumurukino.

¹⁷Ngohi aha todotagao o taufani la yabinaha moi-moi o dodadi iwöwango-wango o duniaka. Hagala moi-moi mata-mata o duniaka aha i honenge,

¹⁸mä dede ngona Ngohi tomau todiai o jaji. Nowohama o kapa magoronaika gënanga kamamoi deʼ ngoni hekata, deʼ ani ngoha-ngohaka deʼ toönanga manga hekata.

¹⁹Naao o kapa magoronaika gënanga manauru moi deʼ ma beka moi o totaleo deʼ ma totaleo moi-moi marupa, deʼ o aiwani ma homoaohi, hupaya enanga uha i binaha.

²¹Nomä gao hagala i rupa o inomo mangale ngona deʼ mangale o aiwani-o aiwani gënanga.”

²² O Nuh wadiai hagala moi-moi mata-mata ma Jou Madutu wohipopareta unangika.