Read Tobelo O KEJADIAN 9 Bible Online

O KEJADIAN 9 - Tobelo bible

O KEJADIAN 9

¹ Ma Jou Madutu wahibarakati o Nuh deʼ aingoha-ngohaka deʼ wätemo, ”Ningohaka deʼ nidanongo nimawoë-woe, hupaya nia difauku yogogere o dunia yamode-modekika.

²Hagala o totaleo deʼ o nawoko deʼ o aiwani mahomoaohi aha inimodongo ngonaika. Onanga mata-mata naga ani kuaha magoronaka.

³Mata-mata gënanga yakunu idadi ani inomo.

⁴ Duga-duga moi nënanga yakunua nia ol̄omo ganga o hiode ma akeme kanagaohi dema awunuka, hababu o jiwa gënanga naga o awunu magoronaka.

⁵Moi-moi o nyawa deʼ o aiwani yätoma-toma o nyawa aha Tahukumu yohonenge.

⁶ O nyawa Tahidadi hokä Ngohi; hababu gënanga, onagona honanga yätoma o nyawa ünangö mahirete aha o nyawa iwi toma.

⁷ I goungu ngini kokiani ningohaka deʼ nidanongo nimawoë-woë, hupaya niadifauku yogogere o dunia yamode-modekika.”

⁸Ma Jou wätemo o Nuh deʼ aingoha-ngohakika,

⁹”O öraha nënanga Todiai ahi jaji dede ngini deʼ nia difauku,

¹⁰dede hagala o dodadi iwö wango-wango, enagënanga o totaleo-o totaleo deʼ mata-mata o aiwani o dudungoka, i goungu mata-mata ihupu-hupu o kapaino gënanga kamamoi dede ngini.

¹¹Nenanga ahi jaji dede ngini: Ngohi tojaji hagala iwöwango-wango aha tabinahaokaua deʼ o taufani. Aha kowalioka naga o taufani yabobinaha o dunia nënanga.

¹²Hokä o jaji ikokakali manonako, Tadodiai dede ngini de hagala ododadi iwöwango-wango,

¹³done Takelenga Ahi ngawatoro olobi-lobioka hokä ma nonako Ahi jaji deʼ o dunia.

¹⁴Ma moi-ma moiani, nako Ngohi tatamunu odihanga deʼ olobi, daha o ngawatoro gënanga niamake,

¹⁵Ngohi aha tohininga Ahi jaji nginika deʼ hegala o dodadi iwöwango-wangoika, enagënanga o taufani aha yabinahaokaua hagala iwöwango-wango.

¹⁶O öraha o kia o ngawatoro nia make o lobi-lobioka, Ngohi aha tolega deʼ tomahininga Ahi jaji ikokakali gënanga Ngo hi deʼ hagala o dodadi iwö wango-wango o dunia nënanga mahidogoronaka.

¹⁷Genanga doka Ahi jaji manonako Tohi döa-döaka hagala o dodadi iwöwango-wangoika o duniaka.”

¹⁸O Nuh ai ngoha-ngohaka yohupu-hupu o kapaino gënanga ganga o Sem, o Yafet deʼ o Ham. (O Ham ganga o Kanaan ai ama.)

¹⁹Yaruangeö o Nuh aingohaka gënanga ganga mata-mata o nyawa o duniaka manga ete deʼ manga tohora.

²⁰O Nuh o nyawa moi wototumule, deʼ geunanga doka madodihiraka wodiai o angguru madumule.

²¹O Nuh ai angguru waokere iböto, ünanga iwidaluku. Wahuputu hagala ai pakeanga daha womä iduoka kaihekonoka ai tau-tau magoronaka.

²²Maöraha o Ham, enagënanga o Kanaan ai ama, wimake ai ama kaihekonoka, ünanga wohupu deʼ wohingahu o hali gënanga ai riadodoto yahinotoika.

²³Ipaha o Sem deʼ o Yafet yal̄e moi o juba deʼ yarefeika manga belekaka. Onanga yotagi imadohuku yöwohama o tau-tau gënanga deʼ iwi korobiti manga ama woheko-hekonoka gënanga.

²⁴O Nuh iwi daluku ipahaino womamao deʼ wohiöriki okia wadodiai aingohaka madodoto ai dirika,

²⁵ünanga wotemo, ”Wo bodito o Kanaan! Unanga aha wodadi o gilaongo iwi hikokauku ai riadodotino.

²⁶Niwi higiriri ma Jou o Sem ai Jou Madutu! O Kanaan aha wodadi o Sem ai gilaongo.

²⁷Tanu ma Jou Madutu wodogo o barakati o Yafetika de wo dogo ma amokika ai ngï wogögogere. Tanu ai difauku yogogere kamamoi deʼ o Sem ai difauku. O Kanaan aha wodadi o Yafet ai gilaongo.”

²⁸O taufani gënanga ipaha, o Nuh kawowangohi o taongo o ratuhu hange deʼ moritoahi.

²⁹Unanga wohonenge ai umuru o taongo o ratuhu hiwo deʼ moritoa.