Read Tobelo O SAMUEL MAHINOTOKA 1 Bible Online

O SAMUEL MAHINOTOKA 1 - Tobelo bible

O SAMUEL MAHINOTOKA 1

¹O Saul wohonenge ipahaino o Daud woma idulu o parangiino wahohininga o Amalek manyawa, daha wogogere o Ziklagoka o wange hinoto madekana.

²Yarehino mawange, o Saul ai tau-tauoka deʼ waino woma tengo o goduru. Hokä manonako ai hininga mahuha to ünanga ai pakeanga wakakakihoka deʼ wogelengauku o tonaka ai haëke mal̄okuoka. Unanga woiki o Daudika deʼ wa tilabukuku ai himangoka.

³O Daud wileha unangika, ”Okiaino ngona?” Wohaluhu, ”O Israil manga tau-tauoka deʼ ngohi toma otana.”

⁴O Daud wileha, ”Nohi ade-ade okia idä dadioka!” Wohaluhu o goduru gënanga, ”Tongomi mia tentara ihi oaroka manga diri o parangioka, deʼ manga ngöe yohonenge, i dogoika o Saul deʼ o Yonatan.”

⁵”Sarakia ngona nohi öriki?” O Daud wi leha unangika.

⁶ Wohaluhu, ”Duru ima koronaika ngohi naga o Gilboa ma l̄okuoka, daha timake o Saul womahi akeika ai kuamika, manga gogiria ai haturu manga kereta deʼ manga tentara yokö kuda-kuda, yotigioka yomau iwi higiloliti.

⁷O Saul woma lega ai poretoka, deʼ wohi make ngohi, daha wohi ahoko ngohi, deʼ ngohi tohaluhu, ’Iya, ahi Tuanga.’

⁸Unanga woleha o nagona ngohi, deʼ ngohi tihingahu unangika ngohi nënanga o Amalek manyawa.

⁹Daha wohi temo ngohino, ’Naino, deʼ nohitoma ngohi! Ngohi ahi nabo kahangöe, deʼ ngadeke tohonenge.’

¹⁰Done ngohi toma hitigi unangika, deʼ ngohi titoma, hababu ngohi tohi öriki nako ünanga wo ruba karana wokuatokaua woma oko, maraioka ünanga aha wohonenge dika. Daha ngohi ta l̄e ai makota ai haekoka deʼ ai gogoli ai giamino deʼ ngohi tao ngonaika ahi Tuanga.”

¹¹Woihene gënanga o Daud wakakihi ai pakeanga ai hininga ihuha, deʼ ainyawa mata-mata yodiai hoko genangoli.

¹²Onanga yododora deʼ yapake o duka mapakeanga ikali yopuaha hiädono yohutu mangale o Saul deʼ o Yonatan, deʼ mangale o Israeloka makawaha, ma Jou Ai umati, hababu duru komanga ngöe yohonengoka o parangi magoronaka gënanga.

¹³Ipaha o Daud wileha o goduruika woö ao-ao o abari gënanga, ”Okiaino ani ahali?” Wohaluhu, ”Ngohi nënanga o Amalek manyawa, o dagi-dagino woma tengo ani berareka ahi Tuanga.”

¹⁴O Daud witemo, ”Duru nobarani ngona nitoma ma koano ma Jou wiö iri-irikoka!”

¹⁵Daha ünanga wïahoko womatengo ainyawa deʼ wipareta, ”Nitoma ünanga!” O nyawa gënanga wituduku o Amalek ma goduru gënanga hiädono wohonenge.

¹⁶O Daud witemo o Amalek magoduruika gënanga, ”Ngona mahirete noma duputuhu o hukumanga nohonenge nënanga ani diri mal̄okuoka deʼ noma ngaku ngona nitomaka makoano ma Jou wiö iri-irikoka!”

¹⁷Iböto gënanga o Daud wohi nyanyi o dodora nënanga mangale o Saul deʼ o Yonatan,

¹⁸ deʼ wohi pareta hupaya o nyanyi nënanga yädotoko o Yehuda manga hoanika. (O nyanyi nënanga itulihi o Yasar ma Buku magoronaka.)

¹⁹”Israel, ani doporono-ani doporono, dokengoka o negara mangoha-ngohaka yobobarani yotifa, önanga yoturabaha hokä o hoana deʼ o berera mamaratana.

²⁰Tanu hagala o Gat manyawa ngarouha yoïhene o abari nënanga. Tanu o Askelon mangeko-ngekomo yamakeua o abari mangale gënanga. Uha hiädono o Filistin mangongoheka ima uli-ulili uha hiädono o kafiroka mangongoheka yopöaka yarame-rame.

²¹Hei Gilboa madoporono-doporono, noihene ahi böaka: Uha hiädono o dumunitara deʼ o awana ini pehaka! Mal̄aika itoolenge deʼ yongangoua ani dumule deʼ ani tonaka malua-luasi. Hababu dokengoka ihi paka wobobarani ai dadatoko. deʼ o Saulö ai dadatoko ipariama, il̄auhoka uaoli.

²²O Yonatan ai toimi madoto makuata kabiahaua, yahönenge. O Saul ai oworo yanakoua o dora yatoma o haturu, ya binaha ai lawani.

²³O Saul deʼ o Yonatan, hoko gënanga manga demo marahai deʼ yotodora; hoko genangika yorimoi o ngango deʼ o honenge magoronaka; önanga iholoi yohiapoto ngaro deʼ o totaleo o garuda, iholoi yokuata ngaro deʼ o singa magö.

²⁴Hei, o Israeloka mangongoheka, niwi dodora o Saul, o koano womomulia! Nima hiporomu deʼ o baju madoka-dokara deʼ kama boloioka, deʼ nimahi pake deʼ o gurasi o intan deʼ flori mahohailoa.

²⁵Yonö nau-nauru yootakoka, yotifa o parangi mangïoka deʼ o doporono-doporonoka irorirïdika oka o Yonatan wotigirangika wotirihoka.

²⁶Yonatan, hei dodoto, ahi hininga duru ihuha, hababu ngona duru deʼ ani raganeoka ngohino. Ani dora ngohino duru imulia, kai holoioli deʼ o ngoheka manga dora.

²⁷O hoana deʼ o berera yonö nau-nauru yaotakoka. Kaparahaja toönanga manga dae!”