Read Tobelo O SAMUEL MAHINOTOKA 10 Bible Online

O SAMUEL MAHINOTOKA 10 - Tobelo bible

O SAMUEL MAHINOTOKA 10

¹”Oraha muruono naga ipaha o Nahas o Amon manga koano wohonenge, deʼ aingohaka o Hanun wodadi o koano.

²Daha ma Koano Daud wotemo, ”O Nahas ganga ahi dodiawo wososetia. Hoʼ, ngohi kiani tidodiawoö deʼ aingohaka o Hanun.” Karana gënanga o Daud wahi dingoto ai huhuloko o Amon mabereraika mangale iwi laru o Hanun mangale ai ama wohonenge.

³Maöraha önanga imahi ädono o Amonoka, o berera ma tutuda-tutuda gënanga iwi temo ma Koano Hanunika, ”Uha Jou Koano natibanga o Daud wohi dingoto ai huhuloko gënanga karana ünanga ai mau wihoromati ani ama Jou Koano! Unanga wahi dingoto hagala o nyawa gënanga yaino hokä yotö tailako mangale yatailako ihi dodiai o kota nënanga, la yakunu yaora.”

⁴Daha o Hanun wätagoko o Daud ai huhuloko-huhuloko gënanga, yakori toönanga manga parahi mahononga, yatobiki toönanga manga pakeanga mamodipoko manga guluioka yauku, deʼ yahuloko önanga yoiki.

⁵Mä önanga yamal̄eke yolio toönanga manga bereraika. Maöraha o hali gënanga ihi ngahu o Daudika, ünanga wahi dingoto o behehongo hupaya o huhuloko-o huhuloko gënanga, yo gogere o Yerikhoka hiädono toönanga manga parahi iwangoli.

⁶Ipaha o Amon manyawa yamao toönanga manga manarama dadi hababu o Daud wahaturu önanga. Hababu gënanga yahewa o Siria manyawa manga tentara yaribuhu monaoko yogö gogere o Bet-Rehoboka deʼ o Zoba, o Tob ma nyawainoö manga tentara yaribuhu ngimoi deʼ hinoto, ikali o Maakha maberera ma koano deʼ ainyawa yaribuhu moi.

⁷Maöraha o Daud woihene o hali gënanga, ünanga wihuloko o Yoab deʼ ainyawa yopoparangi yongodumu yängika yalawana manga haturu.

⁸O Amon manyawa yohupu deʼ yatatoro manga duduono o Raba toönanga manga kota matiti mangorana ma amo-amoko ma himangoka, ma Siria manyawa o Tob manyawa deʼ o Maakha yatatoro toönanga manga duduono o tonaka malua-luasoka.

⁹O Yoab wamake ünanga iwihi dobilatu o haturu manga duduono ai himangoka deʼ ai poretoka. Karana gënanga ünanga wäiriki o Israeloka manga tentara yaoa-oa deʼ wahi gogere önanga ima teke rori himanga deʼ o Siria manga tentara.

¹⁰Maboloi o Israelino manga tentara wihi lapahi ai dodotika o Abisai, yatatoro toönanga manga duduono ima teke rorihimanga deʼ o Amon manga tentara.

¹¹O Yoab witemo ai dodotika gënanga, ”Nako ngohi takunokaua toma tumungu o Siria manga tentaraika taiti nohiriwo ngohi; idulu yaino, nako ngona nakunokaua noma tumungu o Amon manga tentaraika, ngohi aha toboa toni riwo.

¹²Homa totongohono! Naino ngone hoparangi deʼ homa bobarani mangale tongone nanga hoana deʼ mangale tongone nanga Jou Madutu Ai kota-kota. Tanu ma Jou wodiai okia womau-mau.”

¹³O Yoab deʼ ai duduono yängika yaparangi, hiädono o Siria manga tentara yoara,

¹⁴Maöraha o Amon manyawa yämake o Siria manga tentara ihi oaroka manga diri, onangö yoara o Abisaioka deʼ ima dohuku o kota magoronaika. O Amon manyawa yäparangi ibötino, o Yoab wolio o Yerusalemika.

¹⁵O Siria manyawa yamao o Israeloka manyawa yahihangoka önanga, hababu gënanga önanga yäahoko manga duduono ingodumu hupaya ima toomuoli.

¹⁶Daha ma Koano Hadadezer wähuloko yäahoko o Siria ma nyawa naga o Efrat ma Ngairi o wange mahiwaroko idaduoka, daha önanga yoboa o Helamika wäto tuda-tuda o Sobakh, ma Koano Hadadezer aitentara manga kapita o Zobaino.

¹⁷Woihene o hali gënanga, o Daud deʼ ai japatioka wä toomu o Israeloka manga duduono ingodumu, daha yotobongo o Yordan ma Ngairi, ipaha yongika o Helamika. Genangoka o Siria manyawa yatatoro toönanga manga duduono daha yangika yaparangi o Daud ai duduono.

¹⁸Mä o Israeloka manyawa yahi dodohukoka o Siria manga tentara. O Daud deʼ ai duduono yätoma o nyawa yaratuhu tumidi ya ao-ao o kureta ihi poparangi, deʼ o nyawa yaribuhu moruata o tentara yokö kuda-kuda; mahomoa deʼ gënanga, o Sobakh manga haturu manga tentara manga kapita iwi l̄abo kohangöe hiädono wotifa o parangi mangïoka.

¹⁹Maöraha o kokoano wäkö kokuaha o Hadadezer yamake o Israeloka manga tentara yahihangoka önanga, önanga yogahoko imaka dame daha yahigihene o Israel manyawaika. Mulaenge gënanga o Siria manyawa yobarani okaua yariwo o Amon manyawa.