Read Tobelo O SAMUEL MAHINOTOKA 11 Bible Online

O SAMUEL MAHINOTOKA 11 - Tobelo bible

O SAMUEL MAHINOTOKA 11

¹ O kokoano manga biaha yodagi parangi ihiwara maöraha. De maöraha ihiwara o taongo gënanga o Daud wïhuloko o Yoab wodagi woparangi imaki nïki aitentara manga balu-baluhu deʼ o Israeloka manga tentara yongodumu; daha önanga yahohihanga o Amon manyawa deʼ ihigiloliti o Raba makota. Mä o Daud wogö gogere o Yerusalemoka.

²O bimaoa moiuku, o Daud womaidu womomikino, ünanga woma dagi-dagi o kadato makatuoka ihohehelaika gënanga. Genangino ünanga womimake o ngoheka momatengo magogiria moma ohiki, deʼ o ngoheka gënanga duru koami hailoa.

³Daha o Daud wähuloko imi leha o nagona o ngoheka gënanga, de iwihingahu unangika o ngoheka gënanga ami romanga o ngo Batsyeba; ami ama ai romanga o Eliam deʼ ami rokata ganga o Uria o Het manyawa.

⁴O Daud wähuloko imi ngoho o ngoheka gënanga, deʼ moboa ikaka o kadatoika, o Daud woma idu dede munanga. O ngo Batsyeba daha ibotino madiai o debini maupacara ami mede imi daene ipahaino. Daha molio munanga amitauika.

⁵Oraha muruono naga ipaha o ngo Batsyeba mulaenge o ngohaka mo oa daha munanga mohi dingoto o abari o Daudika mangale o hali gënanga.

⁶De majapati o Daud wohi dingoto o pareta o Yoabika, wato, ”Nihuloko o Uria o Het manyawa gënanga waino ngohino.” Daha o Yoab wihuloko o Uria woiki o Daudika.

⁷Maöraha o Uria wihimanga ma Koano Daud, ma koano wileha sarakia manga wowango o Yoab deʼ o Israeloka manga duduono, deʼ sarakiaö mangekomo o parangi.

⁸Ipaha o Daud witemo o Uriaika, ”Nolio ani tauika deʼ nomahi batongo öraha utu.” O Uria wamal̄aka o kadato, o Daud wohidingoto o ngongike o Uria ai tauika.

⁹Mä o Uria wolioua mä woma iduoka o kadato mangorana ma amo-amoko mahimangoka deʼ ma koano iwigö goa-goana.

¹⁰O Daudika iwihi ngahu mangale o hali gënanga. Daha ünanga wileha o Uriaika, ”Ngona daha nolioino, o dodagi magogurutoka deʼ naino, yadodoa nolioua ani tauika?”

¹¹O Uria wohaluhu, ”O Israeloka deʼ o Yehudaka manga tentara manga gogiria yoparangi imahohonenguku deʼ ma Jou Ai Jaji mapeti yatomoteke önanga; o Yoab tongomi mia kapita deʼ o tentara manga balu-baluhu ima tau o tonaka ma lua-luasoka. Kiaka yakunu ngohi nënanga tolio ahi tauika, tol̄omo deʼ tokere ikali toma idu deʼ ngohi hekata? De ani nyawa Jou Koano deʼ ahi nyawa tongohi, ngohi aha todiaiua gënanga!”

¹²Daha o Daud wato, ”Iböto, o wange nënanga nomahi batongohi nenangoka deʼ iyarehe o ngorumino aha tonihi gumal̄a ngona noiki.” Ho, o wange gënanga o Uria wogogere o Yerusalemoka. O wange moi yaino o Daud wiahoko ünanga wol̄omo.

¹³Daha ünanga wol̄omo deʼ wihi döaka unangika ai ngoke-ngokere koha amoko hiädono ünanga iwi daluku. Mä o hutu genangö o Uria wolioua dika ai tauika, mä womaidu womahi nao il̄e ai gal̄oko o kadato yogö goa-goana manga kamari magoronaka.

¹⁴Yarehino mawange o Daud wotulihi o hurata o Yoabika, deʼ wohi dingoto o Uria wao.

¹⁵Watulihi, ”Nihi gogere o Uria mahima-himangoka, kiaka o parangi magogiriaka, de ngona noma dahuku, ma uha woni hioriki hapaya ünanga wohonenge ünanga wohonenge.”

¹⁶Daha o Yoab kawa kilolitohi o kota gënanga, o Uria wihuloko woiki o ngï wohi öriki manga haturu yogoana ikö kua-kuatika.

¹⁷Maöraha manga haturu manga tentara yohupu o kotaino deʼ yaparangi o Yoab ai duduono, o Daud aitentara manga baluhu yamuruono naga yatoma, idogoika o Uriahi.

¹⁸Ipaha o Yoab wihi dingoto ai huhuloko o Daudika mangale wihi ngahu mado dagi o parangi gënanga.

¹⁹O Yoab wipareta o huhulokika gënanga, ”Ma Jou Koano woihene iböto ani hingahu mangale madodagi o parangi gënanga,

²⁰maraioka ünanga idadi wongamo deʼ winileha nginika, ’Ya dodoa ngini hoko gënanga nia midigika deʼ o kota gënanga? Koi goungua ngini nihi öriki maraioka o haturu aha ini toimi dakuku o bebeno-o bebeno mameheloka deʼ yauku?

²¹ Bote niwohangoka ngini sarakia o Abimelekh o Gideon aingohaka gënanga iwi toma o Tebesoka? Koigoungua ünanga wohonenge karana o ngoheka momatengo mikaweli deʼ o helewo o gandum magulinga unangika o bebeno meheloka deʼ yauku? Hoʼ, yadodoa ngini hoko gënanga nia midigi deʼ o bebeno o mehele gënanga?ʼ Nako ma Jou Koano woleha hoko gënanga, notemo unangika, ’Jou Koano ani tentara mabaluhu o Uriaö, wo honenge!ʼ ”

²²Daha o huhuloko gënanga woiki wihimanga o Daud deʼ wihi ngahu okia o Yoab wihi pareta unangika.

²³O huhuloko gënanga wato, ”Tongomi mia lawana iholoi yokuata deʼ önanga yohupu o kotaino imi parangi ngomi o tonaka ilua-luasoka. Mä ngomi duru mima kua-kuata mia hido dohuku önanga hiädono o kota mangorana ma amo-amokika.

²⁴Ipaha o bebeno o meheloka deʼ yauku önanga imi toimi ngomi, deʼ Jou Koano ani tentara manga baluhu wodogoika o Uria yohonengoka.”

²⁵O Daud witemo o huhulokika gënanga, ”Nakuata o Yoab ai hininga deʼ notemo unangika hupaya uha ai hininga ieteke, hababu hakunua hohi demo o nagona aha yohonenge o parangi magoronaka. Notemo unangika hupaya wataiti o parangi iholoi ikuata o kotaika gënanga, hiädono o kota gënanga manyawa imaike.”

²⁶Maöraha o ngo Batsyeba moihene ami rokata wohonengoka munanga momahi pake o duka mapakeanga.

²⁷Momahi pake o duka mapakeanga iböto ipahaino, o Daud wähuloko imi ngoho o ngoheka gënanga ai kadatoika deʼ munanga modadi ngoi hekata. O mede muruono naga ipaha munanga mihi ngohaka womatengo o ngohaka o nauru. Mä ma Jou wo sanangua deʼ o Daud ai manarama gënanga.