Read Tobelo O SAMUEL MAHINOTOKA 12 Bible Online

O SAMUEL MAHINOTOKA 12 - Tobelo bible

O SAMUEL MAHINOTOKA 12

¹ Iböto gënanga ma Jou wihuloko ma nabi Natan wiädono o Daud. O Natan woiki unangika deʼ wato, ”Naga o nyawa yahinoto yogogere o kota moi magoronaka; womatengo wokaya deʼ woma tengoli womihikini.

²Wokö kaya-kaya to ünanga iwoë ai aiwani o gigini deʼ ai duba,

³womö mihikini to ünanga duga-duga o dutu moi o duba mangohaka woma ijaino. O duba mangohaka gënanga wapaliara hiädono idadi ilamoko ai tau magoronaka ima koki nïki deʼ ai ngoha-ngohaka. O duba mangohaka gënanga wohi döaka o inomo o nyawa gënanga ai inomino, iholoi idogo iokere ai mangkouku, deʼ ima idu ai dapariono mal̄okuoka; o demo madipoko, wadiai hokä aingohaka o ngoheka mahirete.

⁴O wange moiuku wokö kaya-kaya iwi adonino o nyawa. Wo kö kaya-kaya woluku watoaka ai duba ekola ai hapi mahirete hupaya wahakai mangale ai tamu. Mä ünanga wal̄ë womö mihikini ai duba mangohaka gënanga, daha wahakai mangale ai tamu.”

⁵Woihene gënanga o Daud idadi duru wongamo karana ai manarama wokö kaya-kaya gënanga de ünanga wato, ”Duru ai dora koiwa o nyawa kaya gënanga! deʼ ma Jou wowango-wango, o nyawa gënanga kiani wa tagali womö mihikini ai duba mangohaka gënanga o lape iata deʼ ünanga kiani iwi hukumu wohonenge!”

⁷O Natan wato o Daudika, ”Ngona Jou Koano o nyawa gënanga! Deʼ nënanga ma Jou wotemo, o Israeloka manga Jou Madutu, ’Ngona Toni gorakoka nodadi o koano mangale o Israeloka deʼ Tonihi halamatoka o Saul ai giama mahoatino.

⁸O Saul aipareta deʼ ngoi heka-hekata tonihi doakoka ngonaika, igoungu ngona Toni goraka nodadi o koano mangale o Israel deʼ o Yehuda. Hohi ade gënanga ini wedono uahi, maraioka aha tonihi döakoli ngonaika hoko genangoli mangoë.

⁹Yadodoa ngona nahaduliua ahi pareta-pareta? Yadodoa nadiai o dorou gënanga? O Uria nihuloko iwi toma o parangi magoronaka; nimal̄a ünanga mangale iwi toma o Amon manyawa, deʼ nomi l̄ë ngoi hekata!

¹⁰Karana ngona nohihi ngounua Ngohi deʼ nomi l̄ë o Uria ngoi hekata, done ani gutiuku manga ngohaka deʼ manga danongo moi-moi magoronaka naga yohonenge yätoma.

¹¹ Ngohi tokoboto aha ini tapal̄u deʼ o hangihara ngonaika iboa ani tau ma nyawaino mahirete. Ngohi aha tal̄ë ani heka-hekata ani lako mahimangoka mahirete deʼ tahi döaka o nyawa ma homoaika aha ima hikidu dede önanga o wange ikokoronauku.

¹²Ngona nodiaioka o baradoha de nomahi bongonino, idulu yaino Ngohi aha tohi matoko tonihi bodito deʼ ma nyata-nyata o Israeloka yongodumu manga himangoka.’ ”

¹³Daha o Daud wotemo o Natanika, ”Ngohi tobaradohaka ma Jouika.” O Natan wohaluhu, ”Ma Jou wonihi apongoka Jou Koano; hoʼ, Jou Koano aha nohonengua.

¹⁴Mä karana Jou Koano nihi kaukuoka ma Jou deʼ o manarama gënanga, Jou Koano ani ngohaka dahao ima kokil̄auino gënanga aha ihonenge.”

¹⁵Iböto gënanga o Natan wolio ai tauika. O Daud aingohaka mihingö ngoha-ngohaka o ngo Batsyeba o Uria ngoi fao, wopanyake deʼ ma Jou Ai mau.

¹⁶Daha o Daud woma niata ma Jouika hupaya o ngohaka gënanga wotogumu. Unanga wopuaha deʼ hutu magetongo ünanga woma rubaiha o hutu moi wahaiwatiki ai kamari malanteoka.

¹⁷Daha yolö lago-agomo o kadatoka yoiki unangika deʼ iwi baja hupaya womomiki, mä ünanga watila deʼ woluku wol̄omo imaki nïki dede önanga.

¹⁸O minggu moi ipaha o ngohaka gënanga wohonenge, deʼ o Daud ai gogilaongo yohawana mangale iwihi ngahu. ”Onanga yato, ”Ma öraga o ngohaka gënanga ka wo wangohi, ma koano woluku woihene nako ngone hitemo unangika. Okia hongoli öraha nënanga aingohaka wohonengoka! Uha-uha ünanga aha wohaduliua ngaro wahangihara ai diri!”

¹⁹Maöraha o Daud wamake ai gogilaongo gënanga ima koku hudu, ünanga womamao o ngohaka gënanga wohonengoka. Daha ünanga wä leha onangika, ”Boteka o ngohaka gënanga wohonengoka?” ”Iböto, Jou Koano,” önanga yohaluhu.

²⁰Daha o Daud womomiki o lanteil̄e, daha woma ohiki deʼ ai tadauru wawuhi, ikali woma duru ru ai pakeanga. Ipaha ünanga woiki wopuji ma Jou Ai Tauika. Iböto gënanga ünanga womaidulu o kadatoika, deʼ wogahoko iwi hidiai o inomo unangika, daha ünanga wol̄omo.

²¹Yamake gënanga, ai gogilaongo iwi temo unangika, ”Ngomi mimangaratiua, Jou Koano. Maöraha o ngohaka gënanga kawowangohi Jou Koano nopuaha deʼ nigari. Mä ünanga wohonengoka, Jou Koano nomomiki deʼ nol̄omo!”

²²”Iya,” O Daud wohaluhu, ïgoungu ngohi topuaha deʼ toari maöraha o ngohaka gënanga kawo wangohi hababu ngohi tatibanga: Bote ma Jou aha wohi dora ngohino deʼ womau o ngohaka gënanga wowango.

²³Maöraha nënanga, ünanga wohonengoka, mabaraguna okia ngohi hoko genangika topuaha? Yakunu ngohi tihi wango okali? Damä ngohiö aha toiki o ngï ika ünanga naga, maöraha nënanga ünanga aha woma idulokaua ngohino.”

²⁴Ipaha o Daud wa l̄aru ami hininga o ngo Batsyeba, ngoi hekata, daha ima idu deʼ munanga. O ngo Batsyeba mihi ngohaka womatengo o nauru o Daud wihi romanga o Salomo. Ma Jou widora o ngohaka gënanga

²⁵deʼ ma Nabi Natan wihuloko wihi romanga o ngohaka gënanga o Yedija, karana ma Jou wihininga.

²⁶Oraha utu gënanga o Yoab kawo parangi ohi walawana o Raba o Amon maberera ma kota matiti, deʼ ngadeke yadono waora.

²⁷Daha ünanga wohi dingoto ai huhuloko o Daudika deʼ ihi ngahu, ”Ngohi taparangioka o Raba, deʼ ta ora o akere ima sö sadiauku.

²⁸O öraha nënanga, noma sadia Jou Koano natoomu tongone nanga tentara mahou, daha natuda o parangi mangale ima ike o kota gënanga. Deʼ hoko gënanga damä o nyawa yotemoua ngohi taora o kota gënanga.”

²⁹Daha o Daud watoömu aitentara yongodumu, deʼ yaparangi o Raba, yaparangi deʼ ikali yahihangoka.

³⁰O Daud wa l̄ë o makota toönanga manga koano ai haëkino deʼ wapake mahirete ai haëkoka. O makota gënanga madubuho doneho kilo moruange deʼ motoa de ihi booteke o paramata mahohailoa. O Daudö wao duru kohangoë okia honanga waora-ora o kotaino gënanga.

³¹Mahomoa deʼ gënanga ma kota manyawa yaliliara de ya hüloko ima gao o garagaji, o pasolo o behi, deʼ o bahuku o behi deʼ onangö yahi manarama o tela yododiai mangïoka. O hali gënanga yadiaiö o Amon makota-kota manyawama homoaika. Iböto gënanga o Daud deʼ aitentara yongodumu, ima idulu o Yerusalemika.