Read Tobelo O SAMUEL MAHINOTOKA 13 Bible Online

O SAMUEL MAHINOTOKA 13 - Tobelo bible

O SAMUEL MAHINOTOKA 13

¹O Absalom o Daud aingohaka to ünanga ngoi hiranga o dodoto momatengo, ka ami hailoa, ami romanga o ngo Tamar. O Amnon o Daud aingohaka ngoi hekata mahomoaka, womi nahihu o ngo Tamarika,

²deʼ wonahihu ima idu dede munanga. Mä gënanga idadiua munangika karana o ngo Tamar mokawinguahi de yakunua imateke dodiawo deʼ o nau-nauru. O Amnon kahoko genangika wa tiba-tibanga o hali gënanga hiädono mabaha ünanga wopanyake.

³O Amnon to ünanga ai dodiawo womatengo duru wosawaro, ai romanga o Yonadab o Simea aingohaka o Daud ai riaka.

⁴O Yonadab witemo o Amnonika, ”Ma Koano aingohaka, yadodoa o wange mahigetongo ngona honi lega-lega hoko gënanga ani hininga ihuha? Naga okia?” O Amnon wohaluhu, ”Ngohi tomi nahihu o ngo Tamarika, ahi dodoto o Absalom ngoi hiranga o dodoto gënanga.”

⁵Daha o Yonadab witemo unangika, ”Genanga igapanga dika! Noma rubaiha o dangiroka, deʼ nomadiai matero-tero mago giria nopanyake. Nako ani ama waino woni lega, notemo unangika, ’Baba, nomihi gumal̄a o ngo Tamar maino hupaya ohihi döaka ngohi tol̄omo. Nako ngohi takunu tomi make munanga mohakai o inomo gënanga nenangoka dau, ngohi yakunu tol̄omo.’ ”

⁶Ipaha o Amnon woma rubaiha ai dangiroka, matero-tero wopanyake. Maöraha ma Koano Daud waino wilega, o Amnon witemo unangika, ”Baba, nomihi gumal̄a o ngo Tamar maino mangale mohakai o kukisi ahi himangoka nenangoka; damä ngohi aha tomau tol̄omo.”

⁷Ipaha o Daud wohi dingoto o behehongo o ngo Tamarika o kadatoka, wato, ”Noiki ani riaka o Amnon ai tauika, deʼ nidiai o inomo mangale ünanga.”

⁸Daha o ngo Tamar moiki dokengika deʼ mimake o Amnon woma rubaiha o dangiroka. O ngo Tamar mal̄ë mahuhutulu o tarigu iganu-ganuoka, aha o Amnon ai himangoka munanga modiai o kukisi mangale maharongo.

⁹Iböto gënanga mohi hupu o kukisi gënanga o basioka deʼ mihidiai. Mä o Amnon woluku wal̄omo. Unanga wato, ”Nahuloko mata-mata yohupu nenangoka!”

¹⁰O nyawa mata-matayohupuoka o kamaroka gënanga, o Amnon womitemo o ngo Tamarika, ”Naoino o kukisi-o kukisi gënanga, ahi dangirino deʼ nohi tofo ngohi!” o ngo Tamar mamoteke.

¹¹Mä maöraha o ngo Tamar mohi döaka o kukisi gënanga unangika, o Amnon womi sö o moholehe gënanga daha womitemo, ”Dodoto, naino nomaidu dede ngohi!”

¹²”Ee, uha, riaka!” mohaluhu o moholehe gënanga. ”Uha nohi pakisa ngohi hodiai o hali itotorou gënanga! O hali hoko gënanga komaiwahi yadiai o Israeloka.

¹³Nako idadi hoko gënanga, kiani ngohi kiani tangiunu ahi biono? Ikali, ngonaö aha ini hikauku o nyawa o Israeloka manga bereraka nënanga. Kayaoa ngona notemo ma koanoika, maraioka ma koano aha womodeke ngohi todadi ngoni hekata.”

¹⁴Mä o Amnon woluku wamoteke, deʼ karana ünanga iholoi wokuata, womi ributu ngoi dodoto gënanga deʼ mabuturungu, daha womipakisa.

¹⁵Mä ipaha gënanga o Amnon duru womi dohata o ngo Tamarika deʼ ai dohata gënanga iholoi ilamoko ngaro deʼ ai nahihu mahira. Daha ünanga womitemo ngoi dodotika gënanga, ”No hupu!”

¹⁶O ngo Tamar mohaluhu, ”Ee, yadodoa hoko gënanga riaka? Nako nohi duhu ngohi, o dorou gënanga iholoi ilamoko ngaro o hali kangano nadodiaioka!” Mä o Amnon woluku woihene.

¹⁷Unanga wa ahoko ai diri mahirete yolö leleani daha watemo, ”Nimi ao o ngoheka nënanga mohupu, deʼ nia kusi o ngorana!”

¹⁸Yolö leleani gënanga yadiai aipareta gënanga. O ngo Tamar ani pakeanga ganga o juba mahohurutuku magiama maguru-gurutu. Mä o öraha gënanga o ngohaka o ngongoheka yokawinguahi manga biaha yapake o pakeanga hokä hoko gënanga.

¹⁹Daha o ngo Tamar mogelenga o kafo ami haëkoka, ami juba makakihi, deʼ moiki deʼ matamunoka ami biono deʼ ami giama hinoto ikali moari ami hininga duru ihuha.

²⁰Maöraha o Absalom womimake, ünanga womi leha, ”Bote o Amnon watilakuru ani horomati? Iböto ngohi dodoto uha napikiroli. Unanga kani riaka, hoʼ, uha nohi ngahu o hali gënanga o nagona-o nagonaika.” Daha o ngo Tamar momahi tingaka ami diri o Absalom ai tauoka, deʼ munanga duru ami hininga ihuha ikali kamo ma rirïdoka.

²¹Ma Koano Daud woihene mangale idö dadadi gënanga, deʼ ünanga idadi duru wongamo.

²²O Absalom duru wigogonika o hininga o Amnonika deʼ wolukokali ima temode de ünanga karana ünanga womi pakisaoka o ngo Tamar ngoi dodoto.

²³O taongo hinoto ipaha, o Absalom wodiai o duba magogo ma kulu marameanga o Baal-Hazoroka, itigi deʼ o Efraim makota, deʼ ünanga wä ahoko ma koano aingohaka o nau-nauru mata-mata.

²⁴Unanga wihimanga ma Koano Daudika deʼ wotemo, ”Baba, ngohi todiai o duba magogo makulu marameanga. Kanomodeke, Baba ahaö noboa o rameangika gënanga deʼ ani nyawa yo lago-agomo o kadatoka.”

²⁵Mä ma koano wohaluhu, ”Uha, ahi Ngohaka, hababu nako ngomi mata-mata miboa, ngomi aha minihi huha.” O Absalom hoko genangika wiributu, mä ai ama tatapu woluku waika. Unanga duga-duga wihi döaka o barakati unangika.

²⁶Daha o Absalom wotemo, ”Nako hoko gënanga, nihi gumal̄a ahi riadodoto o Amnon womi nïki dede ngomi.” Ma koano wato, ”Ngaro uha ünanga wonïki.”

²⁷Mä karana Absalom hoko genangika wogegoto, mabaha o Daud wihi gumal̄a o Amnon deʼ amata-mata aingohaka o nauru mahomao imaki nïki deʼ o Absalom. [Daha o Absalom wahi diai o inomo irupa-rupa mahohailoa.]

²⁸Unanga wahi pareta ai gogilaongika, ”Niohininga nihi dodiai, nako o Amnon iwi dalukoka karana o angguru wokere, ngohi aha tinihi döaka o pareta, daha niwi toma ünanga. Uha nihawana. Ngohi tatagongo mabobaluhu mangale o hali gënanga. Nidiai deʼ nia barani deʼ uha nidododato!”

²⁹O gogilaongo gënanga yadiai o Absalom aipareta, daha önanga iwi toma o Amnon. Yamake gënanga o Daud ai ngoha-ngohaka o nauru mahomoa yokoki doa manga keledai il̄e moi-moi deʼ ihi oara manga diri.

³⁰Maöraha önanga yolioka o ngekomo mahidogoronakahi, o nyawa ihi ngahu o Daudika, ”O Absalom wätomaka Jou Koano ani ngohaka o nauru mata-mata — moi okaua yowango!”

³¹Ma koano womomiki, daha wakakihi ai pakeanga karana ai hininga ihuha, deʼ warubaiha ai diri o lanteiha. Mata-mata ai pegawe ima kinïki yakakihi toönanga manga pakeanga.

³²Mä o Yonadab o Simei aingohaka o Daud ai riaka wato, ”Jou Koano, uha nohawana deʼ uha napikiri Jou Koano ani ngohaka o nauru mata-mata yohonengoka. Duga-duga o Amnon wohonenge, hababu itiaioka gënanga o Absalom womau mamulaenge o ngo Tamar ngoi dodoto mangale o Amnon womi pakisa.

³³Hoʼ, uha nongaku Jou Koano ani ngohaka o nauru yo honengoka mata-mata, hababu wohonenge duga-duga o Amnon dika.”

³⁴O öraha gënanga o Absalom wohi oaroka ai diri. O Daud ai kadato magogoana wamake o nyawa manga ngoë yoboa yauti o l̄oku mameta o Horonaimino. Daha ünanga woiki ma koanoika wohi ngaho o hali gënanga.

³⁵Daha o Yonadab wato o Daudika, ”Genanga Jou Koano ani ngoha-ngohaka o nauru! Itiai hokä ngohi kangano totemo.”

³⁶Daha ibötino ünanga wotemo yowohama o Daud ai ngoha-ngohaka o nauru yowohama o kamari ma goronaika. ”Onanga gënanga mulaenge yoari, deʼ o Daud ikali ai gogilaongö yoari deʼ manga hininga ihuha.

³⁷ O Absalom womahi ditoko o Gesur maberera ma koano ai kadatoika, enagënanga o Talmai aingohaka. Unanga wogogere genangoka o taongo hange madekana. Kaha dekana o Daud wapake o pakeanga o duka manonako mangale o Amnon,

³⁹mä o Daud ai hininga ihuhaokaua iböto, ünanga duru woigo wimake o Absalom.