Read Tobelo O SAMUEL MAHINOTOKA 14 Bible Online

O SAMUEL MAHINOTOKA 14 - Tobelo bible

O SAMUEL MAHINOTOKA 14

¹O Yoab wohi öriki ma Koano Daud duru woigo wimake o Absalom,

²hababu ünanga wahuloko imi ahoko o ngoheka momatengo mososawaro mogogere o Tekoaoka. Maöraha o ngoheka gënanga momahi ädono, o Yoab womitemo munangika, ”Ayo kiani noma diai hokä ani hininga ihuha; nomahi pake o duka mapakeanga, deʼ uha napake o minya mabou-bounu. Nomadiai hokä o ngoheka madekanoka mä gari o nyawa mahohininga yohonenge.

³Ipaha noiki ma koanoika, notemo hoko nënanga.” Daha o Yoab womihi ngahu munangika okia kokiani motemo.

⁴Daha o ngoheka gënanga moiki mihimanga ma koano, deʼ matilabukuku mihuba ikali motemo, ”Ahi Tuanga no Momulia, nohiriwo ngohi!”

⁵”Naga okia?” ma koano womi leha munangika. O ngoheka gënanga mohaluhu, ”Ngohi nënanga o bobao moi tomö mihikini. Tongohi ahi rokata wohonengoka.

⁶Tongohi ahi ngohaka o nauru yahinoto, deʼ o wange moiuku önanga ima ributu o tonaka malua-luasoka. Karana moiua naga o nyawa yahiki tingaka, daha womatengo manga hidogoronaka wohonenge witoma.

⁷De öraha nanga, tongohi ahi roriadodoto yongodumu ihi haturu ngohi deʼ yoributu hupaya ngohi tihi lapahi tongohi ahi ngohaka wotö toma-toma gënanga onangika, la önanga iwi hukumu deʼ o hukumanga wohonenge, hababu ünanga witomaka ai riadodoto. Nako ngohi tihilapahi o ngohaka gënanga, ngohi togö gogere to okoino toma tengokahi. ”Onanga ya wedere tongohi ahi ngonganono genangö moi deʼ mangale tongohi ahi rokata wamal̄a ikaua o ngohaka o nauru womatengo mangale wohi gila-gila aidifauku.”

⁸”Nolio,” ma koano wohaluhu, äha tatailako o perekara gënanga.”

⁹”Ahi Tuanga no Momulia,” o ngoheka gënanga motemo, ”Ahaö okia ahi Tuanga nodiai, ngohi deʼ tongohi ahi tau ma nyawa aha mia tagongo mahasili; ahi Tuanga deʼ ahi Tuanga ani tau manyawa nia howono.”

¹⁰Ma koano wohaluhu, ”Nako naga o nyawa yomau inihi bodito ngona; niao ünanga ngohino, daha gila-gila maraioka ünanga aha woni ruaeokaua oli.”

¹¹O ngoheka gënanga mato, ”Tanu ahi Tuanga nomä niata ahi Tuanga ani Jou Madutuika, hupaya o nyawa yomau yabalahi ahi ngohaka wohone-honenge gënanga uha hiädono yodiai o dorou iholoi ilamokoli deʼ iwi toma tongohi ahi ngohaka woma tengoli.” O Daud wohaluhu, ”deʼ ma Jou wowö wango-wango, ani ngohaka gënanga ngaro kamahuhutulö ma aha iwi dodoaua.”

¹²Daha o ngoheka gënanga motemo, ”Aha Tuanga no Momulia, tanu nohihi gumal̄a ngohi totemo mahuhutuloli.” ”Kayaoa,” ma koano wohaluhu.

¹³O ngoheka gënanga mato, ”deʼ ani demo ahi Tuanga gënanga, ahi Tuanga noma ngakuoka ahi Tuanga mahirete nahowono karana nihi gumal̄aua ahi Tuanga ani ngohaka o nauru woma tinga-tingakika wolio. Yadodoa ahi Tuanga nodiai o howono hoko gënanga ma Jou Madutu Ai umatika?

¹⁴Ngone mata-mata aha hohonenge; ngone nënanga hohitotero o akere ipoa o tonakika deʼ hakunua hatoomuoli. Ma Jou Madutuö aha wahi wango okaua o nyawa yoho hone-honengoka; hababu gënanga tanu kokiani ahi Tuanga nohi dailako hupaya o nyawa yaumo-umoka yakunu yolioli.

¹⁵Ngohi tonï himanga ahi Tuanga, karana o nyawa yomau ihi hibodito ngohi. Daha ngohi toma pikiri kayaoa ngohi mima ade-ade ahi Tuanga deʼ ahi nganono tongohi ahi gogahoko nënanga aha ahi Tuanga natarima.

¹⁶Ngohi toma pikiri ahi Tuanga aha noihene deʼ nohi halamati ngohi o nyawaino ihidö dailako yomau ihi toma ngohi deʼ tongohi ahi ngohaka. Onanga manga dungutu imihi tingaka deʼ o tonaka ma Jou Madutu wahi döa-döakoka Ai umatika.

¹⁷Ngohi tongaku ahi Tuanga ani jaji gënanga aha yatagongo tongohi ahi halamati hababu ahi Tuanga ganga hokä ma Jou madutu ai malaekat, yakunu ihi tingaka okia maoa deʼ okia madorou. Tanu ahi Tuanga ani Jou Madutu woni tomoteke ahi Tuanga!”

¹⁸Ma koano wohaluhu, ”Ngohi tomau toleha okianaga moi ngonaika, nohaluhu deʼ ani hininga iriko-rikoto.” ”Ahi Tuanga, ika noade-ade,” mohaluhu o ngoheka gënanga.

¹⁹Ma koano wato, ”O Yoab woni huloko ngona?” O ngoheka gënanga mohaluhu, ”deʼ ani nyawa ahi Tuanga, ngohi takunua tomahi rehene ahi diri ahi Tuangino ani loleha. Igoungu itiai ahi Tuanga, o Yoab wohihi ngahuoka ngohino, okia kokiani ngohi tadiai deʼ ngohi totemo.

²⁰Mä ünanga wodiai hoko gënanga mangale wotiai o perekara gënanga deʼ yaoa-oa. Ahi Tuanga nobarija hokä ma Jou Madutu Ai malaekat hiädono nohi öriki hagala moi-moi idä dadi.”

²¹Iböto gënanga ma koano wiahoko o Yoab deʼ witemo unangika, ”Ani mau gënanga aha tohi totomo. Noiki ningoho o Absalom deʼ niaoino ünanga.”

²²O Yoab wa tilabukuku o Daud ai himangoka, daha wotemo, ”Tanu ma Jou Madutu wo ni hi barakati Jou Koano! O öraha nënanga ngohi to hi öriki Jou Koano no hi igo ngohi karana Jou Koano na tarimaka to ngohi ahi go gahoko.”

²³Daha o Yoab wo ma jobo o Gesurika mangale wi ngoho o Absalom wo lio o Yerusalemika.

²⁴Mä ma koano wi hi gumal̄a ua o Absalom wo gogere o kadatoka. ”Ngohi toluku ti make,” ma koano wato. Hoʼ o Absalom gila-gila wo lio ai tau ika mahirete, deʼ wi himangua ma koano.

²⁵O Absalom duru i wi hi giriri hokä o nyawa duru yo hö hailoa o Israeloka yo ngodumu. Moi ua o nyawa i holoi yo hailoa deʼ ünanga. Ai l̄ou ma hoatoka hi adono ai tadauru ma dekaril̄e koiwa naga ma kuranga.

²⁶Ai tadauru duru ko ha birini, deʼ ünanga kiani wa tobiki o taongo moi ma moi hababu wa mao duru ko ha dubuho. Ai tadauru wa tobi-tobikuku gënanga ma dubuho o kilo hinoto i holoi i moteke o koano manga didibanga.

²⁷O Absalom to ünanga aingohaka o nauru ya ruange deʼ mo ma tengo o ngoheka duru ko ami hailoa, ami romanga o ngo Tamar.

²⁸O taongo hinoto iböto o Absalom wo gogere o Yerusalemoka, mä komaiwa i ma make deʼ ma koano.

²⁹Daha o wange moi uku ünanga wi ahoko o Yoab, mangale wi hüloko ma koano ika, mä o Yoab woluku wa ika, o Absalom wi ahoko, wo hi gali oli, mä o Yoab woluku dika wa ika.

³⁰Ipaha o Absalom wätemo ai go gilaongika, ”Ngini ni hi öriki o Yoab ai dumule ma honongaka wo datomika o buapo? Ni tuhuku o dumule gënanga.” Onangö yoiki ya tuhuku.

³¹Daha o Yoab wa ika o Absalom ai tau ika deʼ wo leha, ”Ya dodoa ani go gilaongo ya tuhuku ahi dumule?”

³²O Absalom wo haluhu, ”Hababu ngona noluku na ino maöraha to ni ahoko. Ngohi to mau to ni hüloko ni himanga ma koano deʼ no hi adono ani lo leha nënanga, ’Okia ma baraguna ngohi ta mal̄a o Gesur deʼ to ma idulu nenangino? I holoi ya oa ngohi to gogere dokengoka dika.’ ” Deʼ o Absalom wotemo oli, ”No hi dailako hupaya ngohi takunu ti himanga ma koano, deʼ nako ngohi wohipulono kata howonohi, ngohi tatarima hukumu tohonenge.”

³³Ipaha o Yoab woiki wihimanga ma Koano Daud deʼ wohi ädono o Absalom ai gogahoko. Daha ma koano wiahoko o Absalom, deʼ o Absalom waika watilabukuku ma koano ai himangoka. Deʼ ma koano witarima deʼ wiame.