Read Tobelo O SAMUEL MAHINOTOKA 15 Bible Online

O SAMUEL MAHINOTOKA 15 - Tobelo bible

O SAMUEL MAHINOTOKA 15

¹Iböto gënanga o Absalom wasadia mangale ai diri moi kureta ihi poparangi deʼ makuda ima kao o nyawa iwi ninïki yamoritoa.

²O wange mahi getongo o Absalom womomiki o ngoru-ngorumino daha woma oko o ngekomo mangigoroka, o kadato mangorana ma amo-amoko madatekoka. O nyawa mahigetongo yomau yao manga perekara ma koanoika, o Absalom wa ahoko deʼ waleha, wato, ”Ngona o hoana okiaino?” Deʼ nako o nyawa gënanga wohaluhu, ”O hoana nenangino eko la genangino,”

³daha o Absalom wätemo, ”Imoteke o hukumu, ngona natiai, mä hioko ma koano ai wakili koiwa, yomau ihi gihene ani galaki.”

⁴Daha wotemoli, ”Beika, o demo ma ade ngohi todadi o hakimi, daha moi-moi o nyawa toönanga manga gangamo ekola yao manga perekara yakunu yaino ngohino, ngohi aha tadiai deʼ ma adili.”

⁵Nako naga o nyawa imahitigi o Absalom mangale yatilabuku iwi huba ünanga, o Absalom watoakika ai giama, daha o nyawa gënanga wakololo de wa ame.

⁶Hoko gënanga o Absalom ai jako o Israel manyawaika moi-moi womau wohi ädono manga perekara ma koanoika dede hoko gënanga o Absalom manga hininga wol̄ë o Israeloka manyawa.

⁷O taongo iata ipahaika, o Absalom witemo ma Koano Daudika, ”Baba, nohihi gumal̄a ngohi toiki o Hebronika mangale tohi totomo ahi jaji ma Jouika.

⁸Hababu maöraha togogerohi o Gesuroka o Siria mabereraka, ngohi tojaji aha toiki topuji ma Jouika o Hebronoka nako Unanga wohihi gunal̄a ngohi tolio o Yerusalemika.”

⁹Ma koano wohaluhu, ”Noiki deʼ ani halamati.” Daha o Absalom womä jobo o Hebronika.

¹⁰Mä kowahi deʼ gënanga ünanga wahi dingotoka ai huhuloko-huhuloko o Israel ma hoanika mata-mata deʼ yoao o behehongo, ”Nako ngini nï ihene o trompet mailingi, nipöaka, ’O Absalom wodadioka o koano o Hebronoka!ʼ ”

¹¹O Yerusalemino naga o nyawa yaratuhu hinoto iwi nïki o Absalom o Hebronika. ”Onanga oki-kiaua yanako mangale o dorou madoomu gënanga deʼ önanga mata-mata yoiki yonïki koya tibangikaua.

¹²Daha magogiriaka o Absalom wohi huba o huhuba, unangö wohi dingoto ai huhuloko o Gilo ma kotaika mangale iwi ahoko o Ahitofel, enagënanga womatengo ma Koano Daud wino nasihati. Hoko gënanga o dorou madoomu iwi lawani ma koano iholoi ikuata, deʼ iholoi yowoë o Absalom iwinö ninïki.

¹³Ipaha womatengo woao-ao o abari wohi ngahu o Daudika, ”O Israeloka manyawa iwi hiboaka o Absalom.”

¹⁴Daha o Daud wätemo ai pegaweika mata-mata naga o Yerusalemoka, ”Niaino ngone homahi ditoko. Kanënanga moi mangekomo hupaya holapahi o Absalomoka. Itedekanokaua ünanga aha woboa. Itaiti, uha hiädono ngone yakunu wona ginïki deʼ wona hohihanga, hiädono o kota manyawa yongodumu wätoma!”

¹⁵”Kayaoa, Jou Koano,” önanga yohaluhu. ”Ngomi mima bötoka mia diai okiaö Jou Koano ani mau.”

¹⁶Daha ma koano woma jobo iwi nïki ai tau manyawa yongodumu deʼ ai pegawe, sowaliua ngoi hekata paliara yangimoi wa mal̄aika mangale yogoana o kadato.

¹⁷Maöraha ma koano deʼ iwinö ninïki mata-mata ima dagi yamal̄a o kota, önanga ima togumu imahi tigika o tau mabö baha-bahaka.

¹⁸Ma koano ai pegawe mata-mata ima okoino ai honongaka maöraha ma koano ai duduono yotuono witilakuru ünanga. O tentaraoka manyawa yaratuhu butangaö iwinö ninïkoka o Gat ino, ima tuoniha ai himangoka.

¹⁹Wamake gënanga ma koano witemo o Itai ika o tentara ma nyawa yaratuhu butanga manga tutuda gënanga. ”Yadodoa ngonaö nomi nïki dede ngomi? Holoi yaoa ngona noma idulu deʼ nima gogere moi deʼ ma koano mahungi. Koigoungua ngona o nyawa maporetino, nomahi ditoko magurutika deʼ ani berera mahirete?

²⁰Notedekanuahi ngona nogogere nenangoka, kiaka iyakunu ngona toni huloko nonïki hodagi kiaka honanga dede ngohi? Ngohi mahirete tohi orikua okia ika ngohi aha toiki. Noma idulu deʼ na aoö ani dodiawo nima kohoana moi, tanu ma Jou woni dora deʼ wosetia ngonaika.”

²¹Mä o Itai wohaluhu, ”Wo Mömo Mulia, deʼ o Jou wowango-wango deʼ ahi Tuanga ani nyawa, okia ikaö ahi Tuanga noiki, ngohi aha toninïki dika, ngaroka nohimanga o honenge.”

²²”Kayaoa!” o Daud wohaluhu, ”Hoiki gila-gila nanga himangika!” Daha o Itai wotagi ima kinïki deʼ ai duduono yongodumu deʼ toönanga manga tau manyawa.

²³O kawaha mata-mata yoari deʼ koha kuatil̄e, maöraha o Daud ai duduono yamal̄a o kota. Ipaha ma koano watobongo o Kidron ma Ngairi maiti iwi nïki ai duduono yongodumu, daha önanga yotagi yodumutu o tonaka makokakahaika.

²⁴Ma Imam Zadok deʼ Imam Abyatar naga genangoka imaki nïki o Lewi manyawa mata-mata yaö ao-ao ma Jou Ai Jaji ma Peti. O Jaji ma Peti gënanga yakelenga, deʼ yagorakua o kawaha yongodumu yamal̄a uahi o kota gënanga.

²⁵Daha ma koano witemo o Zadokika, ”Nohi gilio o Jaji ma Peti gënanga o kotaika. Nako ma Jou wohi igo ngohi, maraioka ngohi aha wohihi gumal̄a toma idulu deʼ tamakeoli o Jaji ma Peti gënanga kamamoi deʼ yogelenga mangï.

²⁶Mä nako ma Jou wohi igoua ngohino, tohi lapahi dika okia Ai mau mangale ahi diri.”

²⁷Gila-gila ma koano wotemooli o Zadokika, ”Nihigaro o Ahimaas ani ngohaka deʼ o Yonatan o Abyatar aingohaka; ngini nima idulu o kotaika deʼ nima rirïdi.

²⁸Ngohi aha tini damä itigioka o ngï-o ngï o ngairi yodobo-dobongo o tonaka makokakahaka hiädono tatarima o abari nginino.”

²⁹Daha o Zadok deʼ o Abyatar yao o Jaji ma Peti gënanga ihi gilio o Yerusalemika deʼ önanga yogogere dokengoka.

³⁰Iböto gënanga o Daud waiki ai sapato. Unanga ima kao mata-mata iwinö ninïki yadoa o Zaitun ma Doporono deʼ yo ari deʼ manga haëke madadamunu o duka manonako.

³¹Maöraha iwihi ngahu o Daudika, o Ahitofelö wonïki ima kao o Absalom ai doomu yododiai o dorou, o Daud woma niata hoko nënanga, ”Ya Jou, tanu uha idadi o Ahitofel ai hitiari!”

³²Maöraha o Daud womahi ädono o doporono matubuika, o nyawa biaha yopuji ma Jou mangïoka, ünanga witarima ai dodiawo wososetia, enagënanga o Husai o Arki manyawa. O Husai ai pakeanga makakihi deʼ ai haëkoka wogelenga uku o kafo.

³³O Daud witemo unangika, ”Nako ngona nonïki homa kao dede ngohi, ngona nodadi o dodubuho ngohino.

³⁴Mä ngona yakunu nohï riwo, nako ngona noma idulu o kotaika de notemo o Absalomika, öraha nënanga ngona nomau nileleani ünanga deʼ ani setia, hokä nileleanioka ai ama mahirete. Deʼ madodagi hoko gënanga ngona yakunu nohi dadi okaua ai hitiari o Ahitofel.

³⁵Ma Imam Zadok deʼ o Abyatarö naga dokengoka. Nahi ngahu onangika hagala moi-moi ngona noihene o kadatoka.

³⁶O Ahimaas o Zadok aingohaka deʼ o Yonatan o Abyatar ai ngohaka ö yanïki toönanga manga ama, hoʼ, onangö naga genangoka. O ngoha-ngohaka gënanga nahuloko yaino ngohino mangale ihi ngahu hagala o abari yakunu toihene.”

³⁷Daha o Husai o Daud ai dodiawo gënanga woma idulu o Yerusalemika, ma o öraha yakokorona o Absalom womahi ädono genangoka.