Read Tobelo O SAMUEL MAHINOTOKA 16 Bible Online

O SAMUEL MAHINOTOKA 16 - Tobelo bible

O SAMUEL MAHINOTOKA 16

¹ Ma o öraha o Daud daha watilakuru o doporono matubu, itodokanino o Ziba o Mefiboset ai gilaongo woboa, wi ädono ünanga deʼ woao o keledai o habi moi magina o roti o ratuhu hinoto, o angguru mahohoko matore o gosela o ratuhu moi, o hohoko gënanga daha il̄ëino o liko o ratuhu moi deʼ o angguru ma akere o kadu-kadu moi.

²Ma Koano Daud wileha unangika, ”Mangale okia mata-mata nënanga?” O Ziba wohaluhu, ”O keledai-o keledai nënanga mangale o aiwani yobare-barene o Jou Koano ani tau manyawa, o roti deʼ o hohoko nënanga mangale Jou Koano inilö leleani, deʼ o angguru ma akere nënanga mangale önanga yabö bole-bole o tonaka makokakahaka.”

³Daha ma koano wileha unangika, ”Kiaka o Mefiboset ani tuanga o Saul ai danongo?” ”Unanga kahirahi o Yerusalemoka,” o Ziba wohaluhu, ”hababu ünanga wongaku öraha nënanga o Israeloka manyawa aha ihi gilio ai ete o Saul aipareta unangika.”

⁴Daha ma koano witemo o Zibaika, ”Mulaenge öraha nënanga hagala to Mefiboset madutu idadi tongona madutu.” ”Tarima kasih Jou Koano,” o Ziba wohaluhu. ”Tanu Jou Koano hoko gënangika nohï sanangi ngohino!”

⁵Maöraha o Daud womahi ädono o Bahurimika, woboa woma tengo o ngïno gënanga, de womahi tigi ma koano ai doomuika, ünanga wilolai o Daud. O nyawa gënanga ai romanga o Simei o Gera aingohaka, o Saul ai roriadodotika.

⁶O Simei wikaweli o Daud deʼ ai pegawe-pegawe deʼ o helewo, ngaroka o Daud iwihi gilolitino ainyawa deʼ ai pegawe-pegawe.

⁷O Simei wilolai deʼ mademo-demo, ”Noiki! Noiki! No toma-toma! Nododiai o dorou!

⁸Ngona na oraka o Saul aipareta! Oraha nënanga ngona ma Jou woni hukumu karana nätoma hoko gënanga manga ngoë o Saul aingohaka deʼ ai riadodoto. Ma Jou wihi döakoka ani pareta ani ngohakika o Absalom. Oraha nënanga nohonenge ngona, hei notoma-toma!”

⁹O Abisai o Yoab ai dodoto o ngo Zeruya ami ngohaka, witemo ma koanoika, ”Yadodoa Jou Koano nimal̄aika wododiai o ruaë gënanga wonihi lai-lai Jou Koano? Nohihi gumal̄a ngohi ta luiti ai ngomahino!”

¹⁰Mä ma koano wätemo o Abisai ika deʼ o Yoab ai riaka. ”Uha nohadulika. Mal̄aika dika ünanga wohi lolai ngohi. Hababu nako ma Jou wihuloko ünanga, o nagona manga haku yo leha yadodoa ünanga wodiai hoko gënanga?”

¹¹Daha o Daud watemoli o Abisaika deʼ ai gilaongika mata-mata, ”Ahingohaka madutu mahirete wohi dailako womau wohi toma ngohi; yadodoa ngini niheranga nia make o Benyamin manyawa nënanga ai kalakuanga? Ma Jou wihuloko ünanga wohi lolai ngohi; hababu gënanga uha niwi dodoa ünanga deʼ mal̄aika dika ünanga wohi lolai.

¹²Kai yakunu ma Jou aha wohininga o hangihara nënanga deʼ wohihi barakati ngohi hokä madagali o lolai gënanga.”

¹³Daha o Daud deʼ iwinö ninïki ihi gila-gila manga dodagi, o Simei magogiria woma dagi woma tai-taiti wanïki önanga o doporono magelehoroka ikali wilolai deʼ wikaweli deʼ o helewo deʼ o tonaka.

¹⁴Ma koano deʼ ainyawa mata-mata duru yabole maöraha ima hiädono o Yordan ma Ngairoka, daha önanga imahi batongo genangoka.

¹⁵O öraha gënanga o Absalom deʼ o Israeloka manyawa mata-mata iwinö ninïki yowohama o Yerusalem makota, deʼ o Ahitofelö wanïki.

¹⁶Maöraha o Husai o Daud ai dodiawo wososetia gënanga ima make deʼ o Absalom, o Husai wopöaka, ”No wango koano! No wango koano!”

¹⁷Mä o Absalom wileha unangika, ”Kiaka ani setia ani dodiawoika o Daud? Yadodoa ngona ninïkua dede ünanga?”

¹⁸O Husai wohaluhu, ”Kiaka yakunu! Ngohi tahi boa o nyawa ma Jou wairi-irikoka, mangale hagala o nyawa nënanga, deʼ mangale mata-mata o Israeloka manyawa. O nyawa gënanga aha tinïki.

¹⁹Ikali, o nagonali aha talelelani? Koigoungua ahi tuanga aingohaka o nauru? Hokä tileleanioka Jou Koano ani Ama, hoko genangoli o öraha nënanga aha toni leleani Jou Koano.”

²⁰Ipaha o Absalom witemo o Ahitofelika, ”Notemo okia kiani ngone hadiai.”

²¹O Ahitofel wohaluhu, ”Noiki ahi Tuanga ani Ama ngoi heka-hekata paliaraika wamal̄a-mal̄aika mangale yogoana o kadato, deʼ noma idu dede önanga. O Israeloka yongodumu aha ini öriki deʼ ani manarama ahi Tuanga gënanga, ahi Tuanga ini pulonoka ahi Tuanga ani Ama ai haturu. Daha mata-mata ahi Tuanga ininö ninïki aha idogo yobarani.”

²² Hoʼ, mangale o Absalom wodiai o tau-tau o kadato makatu itö totiai ika mal̄okuoka gënanga. Daha deʼ o nyawa mata-mata iwi make o Absalom wowohama o tau-tau gënanga magoronaika deʼ woma idu deʼ ai ama ngoi heka-hekata paliara.

²³O öraha gënanga o Ahitofel ai hitiari magetongo yatarima matero-tero gënanga ma Jou Madutu Ai demo mahirete; yaoa o Daud yaoa o Absalom yamoteke ai hitiari-hitiari.