Read Tobelo O SAMUEL MAHINOTOKA 17 Bible Online

O SAMUEL MAHINOTOKA 17 - Tobelo bible

O SAMUEL MAHINOTOKA 17

¹Ipahaika gënanga itedekanua o Ahitofel witemoli o Absalomika, ”Nohihi gumal̄a ngohi tairiki o nyawa yaribuhu ngimoi de hinoto. Damä o hutu-hutu ngohi aha toiki tiginïki o Daud.

²Unanga aha tiparangi maöraha ünanga wobole deʼ wonaurokaua. Ngohi aha titodokana ünanga, hiädono ainyawa mata-mata ihi oara manga diri. Duga-duga ma Koano Daud dika aha titoma.

³Mä ainyawa mata-mata aha tä higilio ngonaika ahi Tuanga, hokä o ngoheka mokawi-kawingi molio ami rokatika. Koi goungua ahi Tuanga noigo duga-duga ai jiwa womatengo dika? Ma homoa aha nadodoaua.”

⁴O nasihati gënanga o Absalom wapulono yaoa deʼ o Israeloka manga tutuda mata-mata.

⁵Ngaro hoko gënanga o Absalom wato, ”O öraha nënanga niwi ahoko o Husai; niaino ngone hoihene, sarakia ai damake.”

⁶Maöraha o Husai woboa wihimanga, o Absalom wihi ngahu o Ahitofel ai datoro, daha wato, ”Ngone aha hamoteke o nasihati gënanga? Nako kowali, nohi döaka o damake mahomoa.”

⁷O Husai wohaluhu, ”O Ahitofel ai nasihati mamoi nënanga itorou.

⁸Jou Koano marai nohi öriki o Daud deʼ ainyawa gënanga ganga yoparangi yokuata deʼ yo barani. Toönanga manga hatera kai madaene o beruanga mabeka ihihangoka mangohaka. Ikali o Daud ganga o tentara mangoë wanako komaiwahi ima idu imaki nïki deʼ ainyawa.

⁹Mudukua öraha gënanga ö ünanga magogiria woma ngiunu o aruku moi magoronaka ekola o ngï mahomoaka. Hoʼ, hohi ade Jou Koano ani nyawa o Daud wa parangi, deʼ naga go honenge, done o nagona dika yoihene o hali gënanga aha yotemo o Absalom ainyawa yohihangoka.

¹⁰Daha hagala o nyawa duru yobobarani de yokuata deʼ yo nauru hokä o singaö, marai aha idadi yohawana. Hababu o Israeloka manyawa mata-mata ihi öriki Jou Koano ani Ama gënanga ganga wonauru, de ainyawa yoparangi yokuata deʼ yobarani.

¹¹Hababu gënanga, ahi nasihati hoko gënanga: Natoomu o Israeloka manyawa mata-mata o bereraino ingodumu, hiädono manga gegetongo manga ngoë hokä dowongi gahi madatekoka. Daha ma Jou Koano mahirete natuda önanga yoiki yoparangi.

¹²Ngone aha himake ünanga kiakaö ünanga naga, deʼ ngone hiparangi ünanga, ünanga woma nako uahi okia idadi. Moiua aha yakunu yootana, yaoa ünanga yaoa ainyawa.

¹³Nako ünanga woara moi o kota magoronaika, tongone nanga kawaha yongodumu ima l̄ë hagala o liliko deʼ yata tauru o kota gënanga daha iwihi otaka o wai itö tigi ika magoronauku. O helewo kamoiö aha koiwa naga igogogere o doporono gënanga mal̄okuoka.”

¹⁴Yoihene gënanga o Absalom deʼ o Israeloka manyawa mata-mata yotemo, ”O Husai ai nasihati iholoi yaoa ngaro deʼ o Ahitofel ai nasihati.” Igoungu, ma Jou wohi gogeroka mangale wohi dadiua o Ahitofel ai nasihati maoa-oa gënanga, hupaya o Absalom iwi baanga o bodito.

¹⁵Iböto gënanga o Husai wohi ngahu ma Imam Zadokika deʼ o Abyatarika mangale o Ahitofel ai nasihati deʼ ai nasihati mahirete o Absalomika deʼ o Israeloka manga tutuda-tutudaika.

¹⁶O Husai wato, ”Itaiti! Niwihi ngahu o Daudika hupaya uha ima idu o ngï o ngairi yatobo-tobongoka o tonaka mako kakahaka. Unanga kiani itaiti watobongo o Yordan ma Ngairi. Nako kowali, ünanga deʼ ai duduono yongodumu aha yawedere.”

¹⁷Oraha gënanga o Yonatan o Abyatar aingohaka deʼ o Ahimaas o Zadok aingohaka manga gogiria yotamä itigioka o En-Rogel majobubu, o Yerusalem makota madatekoka. Onanga yomoroinua yowohama o kotaika hababu yomodongo o nyawa yämake. Hokä biaha, o ngoheka o gilaongo momatengo mohi ädono onangika o barani kokiani ihi ngahu ma koano Daudika.

¹⁸Mä mamoi gënanga o ngohaka o nauru womatengo ima daenika wamake önanga, deʼ wihi ngahu o Absalomika. Hoʼ, önanga ima tai-taiti yoiki deʼ ima ngiunu o Bahurim makapongo manyawa womatengo ai tauoka. Ai tau madatekoka naga o humu deʼ önanga ima noauku magoronaka.

¹⁹O tau madutu ngoï hekata gënanga mahoheika moi o ngoëre o humu mapidana mal̄okuoka gënanga, deʼ mohi barihika o gandum ma l̄okuoka, hiädono o humu genanga yamakeua.

²⁰O nyawa-nyawa o Absalom ai huhuloko. yoboa o tauika genanga de yohela ongo hekaika ka ngano, ”Kiaka o Ahimaas deʼ o Yonatan?” Mohaluhu, ”Onanga dahaö yatobongo o ngairi.” Onanga yälingiri o goduru yahinoto gënanga, mä yamakeua, daha önanga yolio o Yerusalemika.

²¹O Ahimaas deʼ o Yonatan yohupu o humuil̄e gënanga, daha ima tai-taiti yoiki imaka make ma Koano Daud deʼ ihi ngahu mata-mata. Onanga yato, ”O Ahitofel wahi döaka o nasihati la ini parangi Jou Koano. Hoʼ, noma goraka öraha nënanga dika, natobongo o ngairi nënanga.”

²²Daha o Daud deʼ ainyawa yatobongo o Yordan ma Ngairi, deʼ imahi ädono mahonongaka maöraha ibatingi.

²³Maöraha o Ahitofel womangarati ai nasihati yamotekua, ünanga wohi noa ai keledaiuku magogogere daha wolio ai kotaika mahirete. Watiai iböto hagala ai manarama ünanga woma liko ai diri, daha i wi jere ai tau manyawa manga jere magoronaka.

²⁴O Daud womahi ädonoka o Mahanaim ma kotaika, maöraha o Absalom watobongo o Yordan ma Ngairi, iwi nïki hagala o Israeloka manyawa. (

²⁵O Absalom wigorakoka Amasa wodadi o duduono manga kapita witagali o Yoab. o Amasa o Yitra aingohaka o Ismail manyawa; ngoi ayo ami romanga o ngo Abigail o Nahas ngoï ora, enagënanga ngoi hiranga o ngo Zeruya o Yoab ngoi ayo.)

²⁶O Absalom deʼ ainyawa ima tau o Gilead matonakoka.

²⁷Maöraha o Daud womahi ädono o Mahanaimoka, ünanga iwi tarima o Sobi o Nahas aingohaka o Raba makotaino o Amonoka, deʼ mangale o Makhir o Amiel aingohaka o Lodebarino, deʼ mangale o Barzilai o Rogelimino o Gileadoka.

²⁸Onanga yaao o udo-udomo, o bohoko, deʼ o bolsak, mangale o Daud deʼ ainyawa, o gandum, o tarigu, o gandum i ho hinanga, o tanuma madoka-dokara, o tanuma ma doka-dokara ma pako-pako, o ohungu magula, o keju, o huhu magoro-goro deʼ o duba o dutu muruono naga. Onanga ihi öriki o Daud deʼ ainyawa magogiria yahahini, manga kiriti madudungu deʼ yabole karana manga dodagi o tonaka makokakahaka.