Read Tobelo O SAMUEL MAHINOTOKA 2 Bible Online

O SAMUEL MAHINOTOKA 2 - Tobelo bible

O SAMUEL MAHINOTOKA 2

¹I böto gënanga o Daud wïleha ma Jouika, ”Boteka Jou kano modeke ngohi toiki takuaha o kota moi o Yehudaka?” ”Iya,” ma Jou wohaluhu. ”O kota kiaka?” o Daud woleha. Ma Jou wohaluhu, ”O Hebron.”

² Daha o Daud woiki o Hebronika imakinïki deʼ ngoi hekata yahinoto: o ngo Ahinoam o Yizreel ma ngohaka, deʼ o ngo Abigail o Nabal ngoi fao enagënanga o Karmel mangoheka.

³Hoko genangö ainyawa deʼ manga tau manyawa moi-moi ima kinïki deʼ o Daud, daha önanga gënanga yotatapu o Hebronoka deʼ magilolitino.

⁴ Ipaha hagala o Yehuda manyawa yaika o Hebronika, deʼ iwi tede o Daud wodadi o Yehuda manga koano. Maöraha o Daud woihene hagala o Yabesh manyawa o Gileadoka iwi lungunoka o Saul ai mayeti,

⁵ünanga wahidingoto ai huhuloko dokengoka deʼ ihiädono o behehongo, ”Tanu ma Jou wihi barakati ngini, karana ngini nihidumutoka niasetia niakoanoika deʼ nia lungunu ai mayeti.

⁶Hababu gënanga, tanu ma Jou wohi dumutu Ai dora deʼ Ai setia nginika. Ngohiö aha tini hidiai ngini deʼ kaya oa-oa karana nia manarama gënanga.

⁷Nia tongohono nia hininga deʼ nidiai hokä o nyawa yonau-nauru! O Saul, nia koano igoungu wohonengoka, ma hagala o Yehuda manyawa ihi tedeoka ngohi toönanga manga koano.”

⁸O Saul aitentara manga baluhu, enagënanga o Abner o Ner aingohaka, wohioaroka aidiri ima kinïki o Isyboset o Saul aingohaka, o Mahanaimika o Yordan ma Ngairi mahonongaka.

⁹Dokengoka o Abner wigoraka o Isyboset wodadi o koano madaera-daera o Gilead, o Asyuri, o Yizreel, o Efraim deʼ o Benyamin de, o Israel ingödumu.

¹⁰O Isyboset ai umuru o taongo moruata maöraha iwihi dadi o Israeloka manga koano, deʼ ünanga wapareta o taongo hinoto madekana. Mä o Yehuda aihöana kahirahi yosetia o Daudika,

¹¹deʼ o Daud wopareta o Hebronoka mangale o Yehuda, o taongo tumidi deʼ mahononga madekana.

¹²O wange moiuku o Abner woiki o Mahanaim deʼ waino o Gibeon makotaika, ima kinïki deʼ o Isyboset ainyawa.

¹³O Yoabö (ngoi ayo ami romanga o ngo Zeruya), ima kinïki o Daud ainyawa yongodumu o kotaika gënanga. O duduono hinoto imakoka lawani gënanga ima teke rori himanga o Gibeon malupungoka; o Abner deʼ unangino yoboa-boa yogogeruku nengino mahononga, o Yoab deʼ unangino yoboa-boa dokena ma honongaka.

¹⁴Daha o Abner witemo o Yoabika, ”Ika, ngone hahuloko tongone nanga nyawa imaka tadingi!” O Yoab wohäluhu, ”Kayaoa.”

¹⁵Daha yotagi yaika ya ngimoi deʼ yahinoto o Benyamin ai hoanino o Isyboset ai dagali, deʼ o nyawa yangimoi deʼ yahinoto o Daudino ainyawa.

¹⁶Onanga moi-moi imaku utukika manga tadauru deʼ ima kotopoko manga haturu manga mamataoko, hiädono önanga yohonenge kamamoiuku. Hababu gënanga mangï o Hebronoka gënanga yahetongo o ”Oworo ma Dumule.”

¹⁷Iböto gënanga idadi o parangi kohagiria, deʼ o Daud ainyawa yahihangoka o Abner deʼ o Israeloka manga tentara.

¹⁸O ngo Zeruya ami ngohaka yaruange naga genangoka, enagënanga o Yoab, o Abisai deʼ o Asael. O Asael woma popata ai japati hokä maijanga,

¹⁹daha wiginïki o Abner kahoko genangika.

²⁰O Abner womalega ai poretoka deʼ wileha, ”Ngona gënanga o Asael?” ”Iya,” wohaluhu.

²¹”Uha nohiginïki ngohi!” o Abner wato. ”Beika nitagoko womatengo o tentara gënanga deʼ nal̄ë ai daë!” Mä o Asael hoko genangika dika wiginïki ünanga.

²²Mä moioli o Abner witemo unangika, ”Uha nohiginïki ngohi! Done deʼ mapakisa toni toma ngona. Hoʼ, sarakia ngohi takunu tolega o Yoab ai biono ani riaka gënanga?”

²³Maöraha o Asael kahirahi woluku woma togumu, o Abner wituduku wohidoporetoko, deʼ yakorona o Asael ai mamataoko hiädono o kuama gënanga itotara ai poretoko. O Asael woruba kai riouku deʼ wohonenge ongioka gënanga. O nyawa mata-mata yobö böa böa o ngï ika ünanga worö ruba-rubauku gënanga, ima togumu genangoka.

²⁴Mä o Yoab deʼ o Abisai ihi gila-gila iwi ginïki o Abnerika. Maöraha o wange itumunu, önanga ima hiädono o Ama ma Doporonoka, naga o Giah o wange mahiwaröko idaduoka, o Gibeon matonaka makokakaha yohimangika.

²⁵Dokengoka hagala o nyawa o Benyamin ai hoanino imako dogoli deʼ o Abner, daha yatatoro toönanga manga duduono moi o doporono matubuoka.

²⁶Dokengino o Abner wiböaka o Yoabika, ”Kokiani ngone homa teke parangi kahoko genangika? Namaoua ngona, o parangi nënanga duga-duga inagao o huha? Ngomi nënanga nia riadodoto o hoana moi. Hokokiahi madekanaoli ngona nomau notamä nahi paretaua ani nyawa hupaya ima togumu imiginïki ngomi?”

²⁷O Yoab wohaluhu, ”De ma Jou Madutu wowö wango-wango, hohi ade ngona itaitua mulaenge notemo, maraioka ahi nyawa aha gila-gila ini ginïki ngini hiädono yahere o ngorumino.”

²⁸Daha o Yoab wawuwu o trompet hokä manonako ai nyawaika hupaya ima togumu yaginïki o Israeloka manyawa, daha itogumu o parangi gënanga.

²⁹O Abner deʼ ainyawa o hutu moi yahaiwatiki ima tuduono yanonu o Yordan mawai, daha yatobongo o Yordan ma Ngairi, de ima dagi yogila-gila maginitarino o wange moi madodagi iahumu ibötino, ima hiädono önanga o Mahanaimika.

³⁰O Yoab wiginïki o Abner woma togumu ibötino, ünanga wätoomu mata-mata ainyawa. Ma homoa deʼ o Asael inyata yangimoi deʼ yahiwo yohihanga onangino.

³¹O Daud ainyawa yatomaka yaratuhu hange deʼ yamori butanga o Abner ai duduono manyawa o Benyamin ai hoanino.

³²Iböto gënanga o Yoab deʼ ainyawa yagoraka o Asael ai mayeti deʼ yalungunu ai tau manyawa manga jere magoronaka o Betlehemoka. Daha önanga ima dagi o hutu moi deʼ ima hiädono o Hebronoka maöraha idaduika i tebini.