Read Tobelo O SAMUEL MAHINOTOKA 20 Bible Online

O SAMUEL MAHINOTOKA 20 - Tobelo bible

O SAMUEL MAHINOTOKA 20

¹ O Gilgal makotaka naga womatengo wororuaë ai romanga o Seba. Unanga o Bikri aingohaka, o Benyamin ai hoanino. Maöraha o Daud iwihidö duo-duono yoboa, o Seba wawuwu o trompet deʼ wopöaka, ”Ngone koiwa nanga dodohanga deʼ o Daud. Mangale okia ngone hinïki dede ünanga? Hei o Israeloka manyawaika ngone holio!”

²Daha hagala o Israeloka manyawa gënanga yoiki iwi mal̄a o Daud de iwi nïki o Seba. Mä hagala o Yehuda manyawa kahirahi yosetia deʼ iwi nïki o Daud o Yordan ma Ngairoka deʼ yaino hiädono o Yerusalemika.

³ O Daud womahiädonoka ai kadatoka o Yerusalemoka, ai hekata paliara yangimoi wamö mal̄a-mal̄aika mangale yogoana o kadato, yahi gogere o tau magoronaka yogoana yogö goa-goana. Toönanga manga paralu wäsadia itö totomo, mä o Daud komaiwaka woma iduoli dede önanga. Hoʼ, önanga gënanga yakurumika de önanga yowango hokä o bobao hiädono yohonenge.

⁴Ma koano wipareta o Amasaika, ”Natoomu o Yehuda manyawa deʼ naino nenangino nimakinïki önanga maöraha o wange hange magoronaka.”

⁵Daha o Amasa woiki mangale wätoomu önanga, mä ünanga wolioua maöraha ma koano wohitä tantuoka.

⁶Ipaha ma koano witemo o Abisaika, ”O Seba gënanga aha iholoi wonahihuba ngone ngaro deʼ o Absalom. Hababu gënanga na ao ahi nyawa deʼ niwi ginïki ünanga, la uha hiädono ünanga wogogere o kota-o kota mabebeno o mehele, deʼ yakunu ngoneoka deʼ woara.”

⁷Daga o Abisai ai tutuda matimioka, o Yoab ai duduono deʼ ma koano ai diri yogoa-goana manga duduono ikali o tentaraoka mahomoa mata-mata ima jobo o Yerusalemoka de yohupu mangale iwi ginïki o Seba.

⁸Maöraha önanga imahi ädono o helewo mapako-pakoika o Gibeonoka, o Amasa woboa wabuhukika önanga. Oraha gënanga o Yoab womahi noauku o pakeanga ihi poparangi deʼ ai oworo deʼ maharumoka wohi likoino ai goronaino. Maöraha ünanga womä dagi ai himangika, ai oworo maharumu gënanga ipaha hiädono ai öworo ima tururu ai giama mahigilika. O Yoab witemo o Amasaika,

⁹”O abari okia, dodiawo?” ikali wasö o Amasa ai gumi deʼ ai giama maniraka matero-tero womau wiame ünanga.

¹⁰O Amasa wamakeua naga o öworo o Yoab ai giama mahigiloka. Itodokanino o Yoab wihi topoko deʼ o oworo gënanga o Amasa ai mamataoko, hiädono ai wariki hohohi barihika o tonakika. Unanga wohonenge öraha gënanga dika, hiädono o Yoab iparalu okaua witopokoli. Daha o Yoab deʼ ai dodoto o Abisai, gila-gila iwi ginïki o Seba.

¹¹O Yoab aitentara womatengo woma okoino o Amasa ai mayeti madatekoka deʼ wopöaka, ”O nagona iwihi böa o Yoab deʼ o Daud, niwï nïki o Yoab!”

¹²O Amasa ai mayeti imahi ohikoka o awunu gënanga irubaiha o ngekomo magö goronaka. O Yoab aitentara kangano wä make mata-mata o nyawa yakaino ima togumu genangoka. Mahababu gënanga ünanga waliliara mayeti gënanga o dumuleika deʼ wa tamunuku deʼ o ngoëre.

¹³O mayeti gënanga wohi rehene iböto o ngekomoka, o nyawa mata-mata ihi gila-gila manga dodagi iwi nïki o Yoab mangale iwi ginïki o Seba.

¹⁴O Seba watilakuroka o Israeloka manga hoana madaera mata-mata, daha womahi ädono o Abel-Bet Maakha makotaoka iwi nïki o Bikri ai ahaluku manyawa yongodumu.

¹⁵O Yoab ainyawa yoihene o Seba naga genangoka, daha ihi giloliti o kota gënanga. Onanga yodoporono o tonaka yakilolitino o bebeno o mehele maporetoka, deʼ mulaënge yafaiti o tonaka o bebeno o mehele matimioka gënanga mangale ya kilianga.

¹⁶O kotaka gënanga naga o ngoheka momatengo mososawaro, deʼ munanga moma okoino o bebeno o mehele ma l̄okuoka daha mopöaka, ”Niihene! Togahoko hupaya o Yoab waino nenangino; ngohi toigo mima ade-ade dede ünanga.”

¹⁷Daha o Yoab waika deʼ o ngoheka gënanga mileha, ”Ngona ma Tuanga o Yoab?” ”Iya,” wohaluhu. O ngoheka gënanga mato, ”Noihene ahi demo nënanga, Tuanga.” ”Kayaoa, ngohi tohi gihene,” o Yoab wohaluhu.

¹⁸O ngoheka gënanga mato, ”Mahira hagala o nyawa biaha yotemo hoko nënanga, ’Nako ngona noparalu o hidumutu, noiki o Abel makotaika’ — deʼ gënanga önanga yadiai.

¹⁹Tongomi mia kota o Abel nënanga ilamoko, moi o kota duru irïdi deʼ isetia o Israel ma tonakoka. Yadodoa Tuanga nohi dailako nawedere? Noigo Tuanga nakilianga toma Jou Ai tonaka?”

²⁰”Kautuö deʼ koiwa!” o Yoab wohaluhu, ”ngohi kautuö deʼ koiwa ahi dungutu takilianga ekola tawedere nia kota!

²¹Genangua tongomi mia datoro. Mä womatengo ai romanga o Seba o Bikri aingohaka ai ahali o Efraim madaera deʼ ma l̄oku-l̄oku okaino, wilawanoka ma Koano Daudika. Niwihilapahi ünanga, daha ngohi aha toiki ta mal̄a o kota nënanga.” O ngoheka gënanga mato, ”O nyawa gënanga ai häeke aha ngomi mihikaweli Tuangika o bebeno o mehelino nënanga.”

²²Daha munanga moiki deʼ ami sawaro mohi ädono ami dungutu o kota ma nyawaika gënanga. Iböto gënanga o Seba ai häeke ya tobiki deʼ ihi kaweli o Yoabika. Ipaha o Yoab wawuwu o trompet deʼ ainyawa yamal̄a o kota gënanga daha yolio manga tauika moi-moi. O Yoabö wolio o Yerusalemika wihimanga ma koano.

²³Nënanga yopopareta ikokurutil̄e o Daud wagö gora-goraka; O Israeloka manga tentara yongodumu manga kapita: o Yoab. O Daud ai diri yogoa-goana manga duduono manga baluhu: o Benaya o Yoyada aingohaka.

²⁴Yahi karajanga deʼ mapakisa manga baluhu: o Adoram. O Negara matiwi wogogono: o Yosafat o Ahilud aingohaka.

²⁵Wotö tuli-tulihi o negaraka: o Seya. Ma Imam: o Zadok deʼ o Abyatar.

²⁶Ma Imam o kadatoka: o Ira o Yair makotaino.