Read Tobelo O SAMUEL MAHINOTOKA 21 Bible Online

O SAMUEL MAHINOTOKA 21 - Tobelo bible

O SAMUEL MAHINOTOKA 21

¹Maöraha o Daud wopareta, idadi o balä o habirokata kohagiria igila-gila madekana o taongo hange itö totomo. Daha o Daud wogahoko ma Jou ahi dumutu iyakorona o hali gënanga, deʼ ma Jou wotemo, ”O balä o habirokata gënanga enagënanga karana o Saul deʼ ai tau manyawa manga howono, önanga yätomaka hagala o Gibeon manyawa.”

² (O Gibeon manyawa, o Israeloka ua manyawa; önanga iwohamika o doomu moi mai teteke o Amori manyawa. Hagala o Israeloka manyawa yojajioka aha yapaliara önanga, ma o Saul wohi dailakoka wahohihanga önanga karana ünanga wapikiri manga paralu o Israel manyawa deʼ o Yehuda.) Daha o Daud wa ahoko o Gibeon manyawa gënanga,

³deʼ waleha onangika, ”Okia yakunu todiai mangale ngini? Ngohi toigo tatuhuhu o howono yadodiaioka nginika, hupaya ngini nia hibarakati ma Jou Ai umati.”

⁴Onanga yohaluhu, ”Tongomi mia perekara deʼ o Saul deʼ ai tau manyawa yakunua yatiai deʼ o haaka ekola o gurasi, mä ngomiö mio igoua mia toma imatengo o Israel manyawaino.” Daha o Daud wato, ”Nako hoko gënanga, okia ngini niomau ngohi tadiai?”

⁵Onanga yohaluhu, ”O Saul o koano ma Jou Ai ngongiriki woigo womibinaha ngomi mata-mata hiädono ngomi koimiwaka o Israeloka mingodumu.

⁶Hababu gënanga, nahilapahi aidifaukuino o nyawa yatumidi o nau-nauru, hupaya ngomi mia likouku ma Jou Ai himangoka o Gibeaoka, ma Koano Saul ai kota mahirete.” Ma koano wohaluhu, ”Kayaoa, önanga aha tahi lapahi.”

⁷ Mä karana o Daud deʼ o Yonatan imahibori kobotoka moi deʼ moi, o Daud wilapahiua o Mefiboset o Yonatan aingohaka.

⁸ O Daud wa l̄ë enagënanga o Armoni deʼ o Mefiboset, enagënanga o Saul aingohaka o nauru yahinoto mahingö ngoha-ngohaka o ngo Rizpa o Aya ngoi ora; o Saul ngoi oraö o ngo Merab ami ngohaka o nauru yamotoa, o ngoha-ngohaka gënanga ima kil̄au manga kawingino o ngo Merab deʼ o Adriel o Barzilai aingohaka, o Mehola manyawa gënanga.

⁹Onanga yahilapahi hagala o Gibeon ma nyawaika, daha o nyawa yatumidi gënanga yohonenge ima kutuono yalikouku o doporono mal̄okuoka ma Jou Ai himangoka. O Hukumanga yohonenge gënanga yadiai maöraha o dumamata mabobahaka, maöraha buapo mulaenge youtuku.

¹⁰Daha o ngo Rizpa o Saul ngoi hekata paliara, mahoheika o ngoëre o karongo mangale ami diri o helewo ma l̄oku oka o maiyeti-maiyeti mangï yatö tigirangika gënanga. O ngo Rizpa matingakua gënangoka mulaenge maöraha o gugutuku imulaenge hiädono o awana ihi bobaha ihiwara. Ma mal̄aua o maiyeti-maiyeti gënanga yaruaë o totaleo-o totaleo o wangeoka ekola o aiwani madorou o hutu-hutu.

¹¹Maöraha iwihi ngahu o Daudika okia madiai o ngo Rizpa,

¹² ünanga woiki wa l̄ë o Saul deʼ o Yonatan manga kobo-kobongo o Yabes makota manyawaino o Gileadoka. (Hagala o nyawa gënanga yatohikoka o kobo-kobongo gënanga o tana lapangino o Bet-San makotaka, mangï o Filistin manyawa yalikouku o maiyeti-maiyeti gënanga o Saul iwi hohihanga ibötino o Gilboa madoporonoka.)

¹³O Saul deʼ o Yonatan manga kobo-kobongo gënanga yao genangino, daha yatoomuö o nyawa yatumidi yaliko-likouku gënanga manga kobo-kobongo.

¹⁴Ipaha o Saul deʼ o Yonatan manga kobo-kobongo ikali o nyawa yatumidi gënanga manga kobo-kobongo yajere o Kish o Saul ai ama ai jere magoronaka o Zelaoka o Benyamin madaeraoka. Mata-mata yadiai iböto imamoteke deʼ ma koano aipareta, ma Jou Madutu watarima toönanga manga niata mangale o berera gënanga.

¹⁵O Filistin manyawa deʼ o Israel manyawa idadioli ima teke parangi. O Daud deʼ ainyawa yoiki yaparangi yalawani o Filistin manyawa. O parangi gënanga magoronaka o Daud idadi iwi bole.

¹⁶Woboaino womatengo kai pako ai romanga o Yisbi-Benob. Ai kuama yadiai o tabaga deʼ o hori, madubuho done o kilo hange deʼ mahononga. Unangö womahi hurukuku ai öworo mahungi, deʼ ünanga wongaku wakunu witoma o Daud.

¹⁷Mä o Abisai o ngo Zeruya ami ngohaka waino wiriwo o Daud. Iwi parangi ai pako-pako gënanga deʼ iwi toma. Iböto gënanga o Daud ainyawa yogahoko hupaya o Daud wojaji aha wo nïkoka uaoli o parangi magoronaka. ”Jou Koano ganga o Israel mangonganono. Uha hiädono tongomi mia Jou Koano ihihanga,” önanga yato.

¹⁸Idadioli o parangi yälawani o Filistin manyawa o Goboka. O parangi magoronaka gënanga o Sibkhai o Husa manyawa wïtoma womatengo ai pako-pako ai romanga o Saf.

¹⁹O parangi mahomoa magoronaka deʼ o Filistin manyawa o Goboka, o Elhanan o Yair aingohaka o Betlehemino wïtoma o Goliat o Gatino. O Goliat ai kuama maotini gënanga hö tau ma liate mapako.

²⁰Idadioli o parangi yälawani o Filistin manyawa o Gatoka. Genangoka naga womatengo ai pako-pako duru woigo ima teke parangi. To ünanga ai hagarara butanga ai giamoka yo getongo deʼ ai hagarara butanga ai l̄ouoka yogetongo.

²¹Unanga wahohedu o Israel manyawa, deʼ karana gënanga, o Yonatan o Simea aingohaka, o Daud ai riaka witoma ünanga.

²²O nyawa yaruata, o Daud deʼ ai duduono yato toma-toma gënanga, ganga o nyawa yopö pako-pako o Gatino manga ahaluku.