Read Tobelo O SAMUEL MAHINOTOKA 22 Bible Online

O SAMUEL MAHINOTOKA 22 - Tobelo bible

O SAMUEL MAHINOTOKA 22

¹Ma Jou wihi halamatioka o Daud o Saul ai giama mahoatino, deʼ hagala ai haturu mahomoaino, o Daud wonyanyi nënanga ma Jouika: [

²Katoni hohininga Ngonaika, ya Jou, Ngonala ahi kuata.]

³Ma Jou hokä o bebeno o mehele ikö kua-kuata o ngï ngohi tomahi tatako. Ahi Jou Madutu hokä ol̄oku o helewo, o ngï ngohi tomahohongo. Hokä o dadatoko ünanga wohi tamunuku ngohi, deʼ wohi goana ngohi hupaya salalu to rïdi.

⁴Ngohi tomahi böaka ma Jouika kiani tihigiriri, Unanga wohihilapahioka ngohi ahi haturu-haturuino.

⁵Ngohi ihi kilolitino o honenge mabahaya, deʼ ihi dahahuru o binaha manguihi.

⁶Ngohi ihi kilolitino o honenge mabahaya, o honenge madadagoko naga ahi himangoka.

⁷Ahi dehehoto magoronaka ngohi tomahi böaka ma Jouika, ngohi tomahi böaka ahi Jou Madutuika togahoko o roriwo. Ai Tauino Unanga woihene ahi ilingi deʼ wohohininga ahi boaka.

⁸Daha o dunia igiwi deʼ ihahara, o l̄oku matiti igiwi deʼ ihahara karana ma Jou Madutu Ai gangamo!

⁹O nofo ihi oporu Ai ngunungu mapidahuku, o uku deʼ mangaboho ihupu Ai uruiha.

¹⁰O dihanga Wabelaka, daha Unanga wouti, deʼ o lobi ihohuhutu Ai l̄ou matimioka.

¹¹Unanga wohoho deʼ wö barene o malaekat; Unanga woma haili, o hidal̄oko magahuhu mal̄okuoka.

¹²Unanga womahi kokudu Ai diri deʼ o hohutu; o lobi ihohonguku mabiri-birini iwi kilolitino Unanga.

¹³O leletongo Ai himangoka, ihupu o lobi, o awana o es deʼ o uku.

¹⁴Daha ma Jou woma dotoreke o gitawaino, Woko Kurutil̄e wohito ihene Ai ilingi.

¹⁵Unanga wohi tuhuku Ai toi-toimi, deʼ wahi kokabarihika o haturu. Unanga wahi utuku o leletongo wogogilio deʼ wädiai önanga yopiringana.

¹⁶O ngöto mabukuku ipä deʼ o dunia mahohol̄e ihelenga, maöraha ma Jou wäbanarata Ai haturu deʼ ai dohata.

¹⁷Dakuku ma Jou watoaka Ai giama; deʼ wohi sö ngohi de wohi tauru o akere iluku-lukuil̄e.

¹⁸Unanga wohihalamati ngohi o haturu yonö nau-nauru deʼ hagala o nyawa ihi doha-dohata ngohi karana önanga duru yokuata ngaro deʼ ngohi.

¹⁹Onanga ihi parangi ngohi maöraha ngohi ihi baanga o huha mä ma Jou wodadi ahi roriwo.

²⁰Unanga wohihi pidiloka ngohi o bahayaino deʼ wohihalamati ngohi karana Unanga ai hininga yadaene ngohino.

²¹Ma Jou wabalahi ahi manarama itö totiai; Unanga wohihi barakati ngohi hababu ngohi tahowonua.

²²Ngohi tohi ngounu ma Jou Ai tita, deʼ toma idulua ahi Jou Madutuoka de taino.

²³Mata-mata Ai hukumu tohohininga, Ai pareta-pareta komaiwa la to lega ikaua.

²⁴Unanga wohi öriki ngohi ahi kuranga koiwa deʼ tomahi kurutika ahi diri deʼ o howono.

²⁵Daha ma Jou wabalahi ahi manarama itö totiai, hababu Unanga wohi öriki ngohi tahowonua.

²⁶Jou, Ngona nosetia o nyawa yososetiaika deʼ yaoa o nyawa yaoa-oaika.

²⁷O nyawa yotebi-tebinika Nohi nyata Ani diri itebini, mä o nyawa madorou Ngona nä haturu.

²⁸O nyawa manga hininga itipokouku Ngona nahihalamati; mä manyawa manga hininga ikurutil̄e Ngona nahi tudukuku.

²⁹Ngona nawango ahi posi; ahi Jou Madutu watararono ahi huhutu.

³⁰Ngona nohihi kuatoka ngohi mangale tabinaha o haturu; deʼ ahi Jou Madutu Ai roriwo taruba toönanga manga bebeno o mehele.

³¹Ma Jou Madutu Ai manarama itö totomo, ma Jou Ai jaji yakunu hangaku! Unanga hokä o dadatoko mata-mata imahö hohongo Unangika.

³²Hababu duga-duga ma Jou, o Jou Madutu; ma Jou Madutu dika tongone nanga roriwo.

³³Unanga ma Jou Madutu wohihikö kua-kuata ngohi, deʼ wadiai ahi ngekomo irïdi.

³⁴ Unanga wohi kuata ahi l̄ou hokä o maijanga mal̄ou, deʼ wogoana ahi halamati il̄oku-l̄okuoka.

³⁵Unanga wohihi biaha ngohi la toparangi, hiädono ngohi takunu tatauru o toimi mal̄eha duru ikö kua-kuata.

³⁶Jou, Ngona nohi hohongino deʼ nohihalamati ngohi, deʼ nohitiki ngohi deʼ Ani kuaha ngohi todadi duru yaoa karana Ani manarama.

³⁷Nohi goana ngohi hupaya ngohi ihi tagokua deʼ ngohi komaiwahi ihi otaka.

³⁸Taginïki ahi haturu deʼ tahohihanga önanga, deʼ toluku todohuku hiädono önanga yobinaha.

³⁹Tahi paka önanga hiädono yakunokaua yomomikoli, önanga yoruba ima ngakunokaua ahil̄ou mahimangoka.

⁴⁰Nohihidöaka ngohi o kuata mangale täparangi, deʼ täutumu mangale ahi haturu-haturu.

⁴¹Nadiai ahi haturu yopiringana ngohioka; o nyawa ihi doha-dohata ngohi Nabinaha.

⁴²Onanga yopöaka, mä moiua yariwo, önanga imahi böaka ma Jouika, mä Unanga wabaluhua.

⁴³Onanga tawedere hokä o kafo hohohi bari-barihi, deʼ tahehara hokä o peseke o ngekomoka.

⁴⁴Ngona nohihi bebasoka ngohi o nyawa yososetia okauaino, deʼ nohihi dadi ngohi takuaha o hoana deʼ o berera; o hoana tanako-nakoua yodadi ahi gilaongo.

⁴⁵O nyawa maporetino ima ponu ngohino, deʼ ihi ngounu maöraha yoihene ahi pareta.

⁴⁶Toönanga manga barani ihihangoka; önanga yo hahara deʼ yo hupu manga kota ino.

⁴⁷Ma Jou wowango! O higiriri wohihibö boa-boa! Hohi mulia ai horomati ma Jou Madutu, wohihi hohalamati!

⁴⁸Unanga wohi hidöaka ngohi o utumu mangale ahi haturu, o hoana-o hoana Waponu ahi himangoka,

⁴⁹wohihi halamatoka ngohi ahi haturu-haturuino. Jou, nohihidöaka ngohi o utumu mangale ahi haturu, Ngona nohi hohongino ngohi o nyawa manga dora deʼ manga hayanga koö iwa-iwaino.

⁵⁰ Daha ngohi tonihi mulia Ngona o hoana deʼ o berera manga hidogoronaka, deʼ tohi nyanyi o puji Ngonaika.

⁵¹Ma Jou Madutu wihidöaka o utumu ai koanoika, Unanga kama hirahi wahininga Ai ngongikiri manyawa, enagënanga o Daud deʼ aidifauku mangale kahi ädo-ädonika.