Read Tobelo O SAMUEL MAHINOTOKA 24 Bible Online

O SAMUEL MAHINOTOKA 24 - Tobelo bible

O SAMUEL MAHINOTOKA 24

¹Ma Jou wä ngamoli o Israel okaika, daha o Daud wibaja, de madungutu wahi baanga o huha o hoana ma nyawaika. Ma Jou wato unangika, ”Nadiai naetongo o Israeloka deʼ o Yehuda.”

²Daha o Daud wïtemo o Yoabika o tentara manga kapita, ”Noiki nimaki nïki deʼ ani tentara manga balu-baluhu o Israeloka manga hoanika mata-mata o berera ingodumu mangale nia diai o sensus. Ngohi toigo tohi öriki toönanga manga ngoë.”

³Mä o Yoab witemo ma koanoika, ”Tanu Jou Koano ani Jou Madutu wadogo ilape-lape o Israeloka ma kawaha hiädono higali maratuhu moi ngaro deʼ toönanga manga ngoë o öraha nënanga, deʼ Jou Koano tanu nowangohi hupaya yakunu namake. Mä mangale okia Jou Koano nomau noetongo nënanga?”

⁴Mä ma koano kahirahi wasö sö aipareta ika gënanga. Hoʼ o Yoab deʼ aitentara manga balu-baluhu yoiki mangale yä etongo o Israeloka manyawa.

⁵O Yordan ma Ngairi yatobongo iböto, o Yoab deʼ ainyawa ima tau o Aröeroka o koreharail̄e idaduoka, moi o kota o Gad madaera mawai mahidö dogoronaka. Genangoka deʼ yaino önanga yoiki o koremieuku, o Yaezerika,

⁶daha yogila-gila o Gileadika deʼ o Kadesika, o Het ma nyawa manga daeraoka. Ipaha önanga o Danika, daha o Dan deʼ yaino ima leboto manga meta o wange madumunika, o Sidonika.

⁷Genangoka deʼ yaino önanga yoiki o koreharail̄e o Tirusika o kota deʼ mapaga-pagaroka gënanga. Ihi gila-gila önanga yoiki o Hewi manyawa deʼ o Kanaan manyawa manga kotaika mata-mata, mabaha o Bersyebaika, o Yehuda o koreharail̄e idaduoka.

⁸Onanga yodagi yongika-ngino o berera ingodumu, maöraha o mede hiwo deʼ o wange monaoko magoronaka. Iböto gënanga önanga ima idulu o Yerusalemika,

⁹deʼ ihi ngahu ma koanoika manga hasili yoetongo gënanga. Manga ngoë o nau-nauru yadö dae-daene madodagi yodadi o tentara naga o Israeloka manyawa ya 800.000 deʼ o Yehudaoka manyawa ya 500.000.

¹⁰Mä o Daud waetongo o hoana gënanga ibötino, ünanga wamäo wahowono, daha wotemo ma Jouika, ”Ya Jou, ngohi duru tobaradoha! Nohihi apongo ngohi, hababu ahi manarama gënanga duru ibodo.”

¹¹Ma Jou wïtemo ma Nabi Gadika wodadi o dodohanga o Daud deʼ ma Jou manga hidogoronaka, ”Noiki deʼ nahetongo o Daudika ngohi tohidöaka unangika o ngongiriki o gahumu hange. Okia dika wairiki aha Tadiai.” Iyarehino mawange, o Daud woma idu womomikino,

¹³o Gad woboa wï himanga deʼ wihi ngahu unangika ma Jou Ai tita gënanga, wato, ”Kiaka Jou Koano nairiki: O berera nënanga yabaanga o huha o habirokata o taongo hangeino madekana, ekola Jou Koano nopiringana ini goginïki o haturu o mede hangeino madekana, ekola o berera nënanga yadaëne o panyake o bobaku o wange hangeino madekana? Naputuhu öraha nënanga okia kiani tohi ädono ma Jouika.”

¹⁴O Daud wohaluhu, ”Adede! Tobodito ngohi! Mä ngohi ihukumu o nyawa, iholoi yaoa ngone mata-mata ma Jou wona hukumu, hababu Ai hayanga deʼ ai dora ilamoko.”

¹⁵Daha ma Jou wodotagao o panyake o bobaku o Israel ma nyawaika mulaenge o wange gënanga mangorumino hiädono maöraha wohi totatapuoka. O Israeloka manyawa mata-mata yohonenge yamoritumidi maribuhu.

¹⁶Ma Jou Ai malaekat iao-ao o honenge gënanga ima hiädonoka o Arauna o Yebus manyawa, ai gandum wahido-hidoro mangïoka. Maöraha ma Jou wamake o malaekat gënanga ima hidiaioka mangale yohohihanga o Yerusalem, ma Jou wangali Ai putuhu, deʼ Unanga woma togumu wähukumu o hoana gënanga. O malaekatika gënanga wato, ”Iyaoaka! Nomatogumu!”

¹⁷O Daud wamake o malaekat yätoma o kawaha gënanga magogiria, daha ünanga wotemo ma Jouika, ”Ngohi tobaradoha hababu todiai o howono gënanga. Mä okia manga howono o hoana yobö bobodito gënanga? Nohi hukumu ngohi deʼ ahi tau ma nyawa!”

¹⁸O wange gënanga dika o Gad woboa wihimanga o Daud deʼ witemo unangika, ”Kokiani Jou Koano nodoa o Arauna ai gandum wahido-hodoro mangï il̄e, deʼ nohigoko o huba ma Jouika mangï.”

¹⁹Daha o Daud woma jobo imamoteke deʼ ma Jou Ai tita wohi ädo-ädono unangika itilakuru o Gad.

²⁰Ima daenika o Arauna wohi hahere daukuku, deʼ wimake ma koano ikali iwinö ninïki yoboa unangika. O Arauna watilabukuku o Daud ai himangoka,

²¹deʼ woleha, ”Okia madungutu ani boa Jou Koano?” O Daud wohaluhu, ”Mangale ta ija o gandum nobido-bidoro mangï nënanga, ngohi tomau tohi goko o huba ma Jouika mangï nenangoka, hupaya o panyake o bobaku nënanga ipaha.”

²²O Arauna wato, ”Nal̄ë dika Jou Koano, deʼ nohihuba ma Jouika okia Jou Koano namao yaoa. Nenanga hagala o hapi mangale o huhuba ituhu-tuhuku deʼ mangale o gota ihitö tuhu-tuhuku Jou Koano yakunu napake o pajeko magagao deʼ ma ao-aoto ihihö hido-hidoro.”

²³O Arauna wohidöaka mata-mata gënanga ma koanoika, ikali wotemo, ”Tanu Jou Koano ani Jou Madutu watarima ani huhuba Jou Koano.”

²⁴Mä ma koano wohaluhu, ”Uha! Ngohi tomau taija. Ngohi toluku tohihuba ahi Jou Madutuika okianaga moi, tamake deʼ kapö parahaja.” Daha o Daud waija o gandum yobo bido-bidoro mangï deʼ hagala o hapi gënanga deʼ maija o tiwi o haaka moritoa.

²⁵Daha o Daud wohi goko o huba mangï genangoka ma Jouika deʼ wohi huba o huhuba itö tuhu-tuhuku ikali o dame mahuhuba. Ma Jou watarima o Daud ai niata, daha ipaha o panyake o bobaku gënanga o Israeloka.