Read Tobelo O SAMUEL MAHINOTOKA 3 Bible Online

O SAMUEL MAHINOTOKA 3 - Tobelo bible

O SAMUEL MAHINOTOKA 3

¹O parangi o Saul ai tau manyawa iwi hibö böa-böa ma hidogoronaka deʼ o Daud iwibö boa-boa gila-gila ima togumua. O Daud i dogo wokuata, mä ai lawani idogo yobole.

²O Daud aingoha-ngohaka ima kil̄au o Hebronoka ganga yanïki nënanga imamoteke ima kokadadu imakil̄au. O Amon. Ngoi ayo enagënanga o ngo Ahinoam o Yizreelino.

³O Kileab. Ngoi ayo enagënanga o ngo Abigail, o Nabal ngoi fao o Karmelino. O Absalom. Ngoi ayo enagënanga o ngo Maakha, ma Koano Talmai ngoi ora o Gesurino.

⁴O Adonai. Ngoi ayo enagënanga o ngo Hagit. O Safaca. Ngoi ayo enagënanga o ngo Abital.

⁵O Yitram. Ngoi ayo enagënanga o ngo Egla. Aingohaka o nauru yabutanga gënanga ima kil̄au o Hebronoka.

⁶Oraha utu o parangi itagi gila-gila o Daud iwihi bö böa-böa manga hidogoronaka deʼ o Saul ai tau manyawa iwihibö böa-böa, o Abner wohidailako hupaya ai kuaha iholoi ilamoko o Saul iwihibö böa-böa manga hidogoronaka.

⁷O wange moiuku Isyboset, o Saul aingohaka, wikalaki o Abner womi hidu o Saul ngoi hekata paliara moma tengo ami romanga o ngo Rizpa o Aya ngoi ora.

⁸Daha o Abner idadi duru wongamo deʼ ünanga wotemo, ”Boteka ahi Tuanga nato bote ngohi nënanga titipu o Saul deʼ tahi böa o Yehudaokaino? O öraha kamulaengohi ngohi tosetia o Saulika Tuanga ani ama, deʼ ai roriadodotika ikali ai dodiawoika. Ngohi toni riwoka ahi Tuanga hiädono o Daud wakunua wini hihanga. Ngaro hoko gënanga ahi Tuanga nohihi kauku ngohi duga-duga karana mahali o ngoheka!

⁹ Iholoi yaoa ngohi tiriwo o Daud, okiali ma Jou wojajioka unangika aha wal̄ë o pareta nënanga o Sauloka de ai gutiukuoka, daha wigoraka o Daud wodadi o koano o Israel manyawaika yongodumu deʼ Yehuda. Tanu ma Jou Madutu wohi toma, nako ta diaiua ma Jou Ai jaji o Daudika gënanga!”

¹¹O Isyboset wakunua wohaluhu kao demo moiö, karana ünanga wimodongo o Abnerika.

¹²Daha o Abner wahidingoto ai huhuloko o Daud ika öraha gënanga naga o Hebronoka, deʼ yoao o behehongo, ”Onagona aha yakuaha o tonaka nënanga? Nodiai o jaji dede ngohi, done ngohi aha tonï riwo ahi Tuanga hupaya o Israel manga hoana yongodumu inihiböa ahi Tuangino!”

¹³O Daud wohaluhu, ”Kayaoa! Nihiadono o behehongo nënanga o Abnerika: Ngohi tomau todiai o jaji dede ngona, mä deʼ moi madodagi: o ngo Mikhal, o Saul ngoi ora, kiani nomiao ngohino nako ngona noböa nohihimanga ngohi.”

¹⁴ Iböto gënanga o Daudö wahidingoto ai huhuloko o Isybosetika, deʼ yoao o behehongo, ”Kokiani Tuanga nomihi gilio o ngo Mikhal, ngohi hekata, ngohino. Munanga tomi ijaka deʼ o Filistinoka manyawa tonauru makai o ratuhu moi.”

¹⁵Daha o Isyboset wä hüloko ai huhüloko imi l̄ë o ngo Mikhal ami rokatoka, enagënanga o Paltiel o Lais aingohaka.

¹⁶Mä o Paltiel gila-gila womi nïki o ngo Mikhal wo ari-ari monga. Maöraha önanga ima hiädono o Bahurim makotaka, o Abner witemo unangika. ”Iböto, nolio dika!” Daha o Paltiel wolio.

¹⁷O öraha mahuhutulu gënanga o Abner ima katatoro deʼ o Israeloka manga balu-baluhu deʼ wätemo, ”Madekanoka ngini nio mau o Daud wodadi nia koano.

¹⁸Aa, nënanga nia öraha nginika. Niohininga, ma Jou wojajioka o Daudika, ünanga aha wipake o Daud mangale wahi halamati Ai umati o Israeloka o Filistin ma nyawaino deʼ mata-mata manga haturu mahomoaino.”

¹⁹O Abnerö ima katatoro deʼ o Benyamin manyawa, deʼ ipahaino wöiki o Hebronika mangale wohi ngahu o Daudika okia ihi goungoka o Benyamin manyawa deʼ o Israeloka manyawa gënanga.

²⁰Maöraha o Abner imakinïki deʼ ainyawa yamonaoko iwi himanga o Daud o Hebronoka, o Daud wodiai o rameanga mangale önanga.

²¹Iböto gënanga o Abner womahilooa deʼ wotemo, ”Nohi higumal̄a ngohi toma jobo mangale tahimomiki o Israeloka yongodumu hupaya imahi dogo deʼ ahi Tuanga. Onanga aha ini tarima ahi Tuanga hokä o koano, deʼ hoko gënanga ahi Tuanga aha napareta o berera ingodumu, ima daene deʼ ani mau ahi Tuanga.” Ipaha o Daud wihigumal̄a o Abner womajobo ikali witagongo ai halamati.

²²O Abner wasoboka, o Yoab ima kinïki o Daud ainyawa mahomoa yolio o parangioka deʼ yaino deʼ yao ihigilio okia honanga yaora-oraino koha ngöe.

²³O Yoabika iwihi ngahu o Abner woböaka wihimanga ma koano Daud deʼ wihi gumal̄aka wöiki ikali witagongo ai halamati.

²⁴Daha o Yoab wihimanga ma koanoika de wato, ”Sarakia Koano ani manarama gënanga? O Abner woböaka woni himanga Koano. Yadodoa Koano nihi gumal̄a ünanga wöiki hoko gënanga dika?

²⁵Maraioka Koano nohi öriki o Abner ai böa gënanga duga-duga mangale woni tipu Koano, deʼ mangale wohi öriki magogere ikali hagala Koano ani datoro.”

²⁶Wimal̄a iböto o Daud, o Yoab wahidingoto ai huhuloko-huhuloko mangale iwi ahoko o Abner. ”Onanga iwihi doduruino o Abner hiädono o Sira mahumu itigioka, daha önanga iwi ao iwi higilio. Mata-mata gënanga idadi o Daud wohi orikua.

²⁷Deʼ mada taitoka o Abner woma hiädono o Hebronoka, o Yoab wi ahoko ünanga ai datekika, itigika o ngorana ma amo-amoko, matero-tero womau wiade-ade moi irö rahasia. Itodokanino o Yoab witopoko o Abner ai mamataoko hiädono wohonenge. Hoko gënanga o Abner wohonenge o Yoab witoma mangale wabalahi o hininga wigogonika mangale witoma o Asaelika ai dodoto.

²⁸Maöraha o Daud woihene o hali gënanga, ünanga wotemo, ”Ma Jou wohi öriki ngohi deʼ ahi kawaha kamamoi mia howonua o hali magoronaka iwi toma o Abnerika gënanga.

²⁹Mal̄aika o Yoab deʼ ai tau manyawa yongodumu yahukumu karana ai manarama gënanga. Tanu o Yoab ai tau manyawa magoronaka manga gutiuku hoko genangika naga o nyawa yadaene o panyake manga kai ika hobo borohono, ekola o nau-nauru yokuatua, ekola yohonenge o parangi magoronaka ekola manga inomo ikuranga!”

³⁰Hoko gënanga o Yoab deʼ ai dodoto o Abisai, yabalahi o hininga iwi gogonika o Abnerika karana o Abner witomaka toönanga manga dodoto o Asael o parangi magoronaka o Gibeonoka.

³¹Ipaha o Daud wahi pareta o Yoabika deʼ ainyawa hupaya yakakihi toönanga manga pakeanga, deʼ imahi noa duka mapakeanga ikali iwi gari o Abner. Deʼ maöraha ai mayeti yangotaka, ma Koano Daud mahirete woma dagi o mayeti malungunu maporetino.

³²O Abner iwi jëre o Hebronoka, deʼ ma koano ikali o kawaha yongodumu yoari deʼ makuatil̄e o jëre gënanga ma himangoka.

³³Iböto gënanga o Daud widodora mangale o Abner, wato, ”Kokiani o Abner wohonenge hokä o nyawa bodo?

³⁴Ai giama ilikoua, deʼ ai l̄ou ialaraua. Unanga wohonenge iwi tuduku deʼ koö iwa-iwa manga dora.” Daha o kawaha yongodumu iwi gari o Abner iholoioli ikuatil̄e.

³⁵O wange moi iahumu hagala o nyawa ihi dailako iwi baja o Daud hupaya wol̄omo mahuhutulu, mä ünanga wokoboto, ”Tanu ma Jou Madutu wohi toma ngohi, nako o wange itumunuahi deʼ ngohi tol̄omo!”

³⁶O kawaha yoihene o hali gënanga yamao yosanangi. Igoungu, okia dika ma Koano Daud wadiai, toönanga manga hininga yadiai yasanangi.

³⁷O wange gënanga o Daud ai kawaha yongodumu deʼ o Israeloka manga hoana yongodumu imangarati, ma koano woigoua iwi toma o Abnerika gënanga.

³⁸Ma koano watemo iwinö ninïki, ”Nihi orikua ngini o wange nënanga o Israeloka manga tutuda woma tengo wolö amo-amoko wotihaka?

³⁹Ngaroka ngohiö nënanga o koano ma Jou madutu wohi iri-irikoka, mä o öraha nënanga ngohi tamao tobole. O ngo Zeruya ai ngoha-ngohaka gënanga ikiriaholi koiwa manga dora. Ngohi takunua takuaha önanga. Tanu ma Jou wahukumu yatotorou gënanga, ima moteke deʼ toönanga manga manarama!”