Read Tobelo O SAMUEL MAHINOTOKA 5 Bible Online

O SAMUEL MAHINOTOKA 5 - Tobelo bible

O SAMUEL MAHINOTOKA 5

¹Iböto gënanga o Israeloka manga hoana-hoana matutuda mata-mata yoboa o Daudika o Hebronoka deʼ yotemo unangika, ”Ngomi nënanga Jou Koano ani dutu itö tigi-tigi.

²Kahuruono mamulaenge, igoungu maöraha o Saul womi paretahi ngomi, Jou Koano mahi geto-getongo natuda o Israeloka manga tentara önanga yoiki yoparangi, ikali ma Jou wojajioka ngonaika Jou Koano, Jou Koano aha natuda Ai umati de nodadi toönanga manga koano.”

³O Daud wodiai o jaji deʼ o Israeloka manga tutuda-tutuda gënanga, daha önanga iwi tede ünanga wodadi o Israeloka manga koano.

⁴ O Daud ai umuru o taongo moruange maöraha ünanga wodadi o koano deʼ ünanga wopareta o taongo moruata madekana.

⁵O Hebronoka ünanga wapareta o Yehuda o taongo tumidi de mahononga madekana deʼ o Yerusalemoka ünanga wapareta o Israel yongodumu deʼ o Yehuda o taongo moruange deʼ hange madekana.

⁶ O wange moiuku ma Koano Daud deʼ ainyawa ima jobo yomau yaparangi o Yerusalem. O kota gënanga yogö gogere o Yebus ma nyawa, yato bote o Daud aha wakunua wahihanga o Yerusalem. Hababu gënanga önanga yotemo unangika, ”Ngona aha nakunua nowohama nenangino; hagala o nyawa yopilo-piloko deʼ hagala o nyawa yosegu-seguö yakunu ini duhu.”

⁷O Daud wätemo ai nyawaika, ”Nagaka nengangoka ö yadoha-dohata o Yebus manyawa hokä ima tero ngohi tadohata önanga? Yaoaka iwi dohata ünanga hiädono duru woigo wä toma önanga? Niwohama nia nonu o akere mangekomo, deʼ niaparangi hagala o nyawa yosö suga-suga deʼ yopiloko tadö doha-dohata gënanga.” (Hababu gënanga o nyawa yotemo, ”O nyawa yopiloko deʼ o nyawa yosuga yakunua yö ngohama ma Jou Ai Tau.”) O Daud wohasili waora o Sion mabebeno o mehele de wögogere. Unanga wohi romangaö ”Daud ai Kota”. O kota gënanga ihi goko o bebeno o mehele gënanga magilolitino, mulaenge o doporono ihi kurutil̄e deʼ o tonaka o wange mahiwariha iboaka.

¹⁰O Daud iholoi itedekana iholoi wokuata, karana ma Jou, ma Jou Madutu woko Kuaha wiriwo.

¹¹Ma Koano Hiram o Tirus mabereraino wohi dingoto ai huhuloko-huhuloko o Daudika, o liwewuru Libanon magota deʼ yododiai o tau ikali yomö mehe-mehele mangale ihi goko o kadato.

¹²Karana gënanga o Daud wamao wongaku ma Jou wihi kuatoka ünanga hokä o Israeloka manga koano, deʼ wohi kuata aipareta mangale ma Jou Ai umati manga paralu.

¹³O Dau woma tururu iböto o Hebron deʼ o Yerusalemika, ünanga woma hekatoli o ngoheka yamuruono naga de wal̄ëoli o ngoheka yamuruono naga mangale ngoi hekata paliara; done yodogo-dogo aingohaka o nauru deʼ ngoheka.

¹⁴Ai ngoha-ngohaka ima kil̄au o Yerusalemoka ganga: o Syamua, o Natan, o Salomo,

¹⁵o Yibhar, o Elisua, o Nefeg, o Yafia,

¹⁶o Elisama, o Elyada deʼ o Elifelet.

¹⁷Maöraha o Filistin manyawa yoihene o Daud wodadioka o Israeloka manga koano, önanga yoboa yomau iwi tagoko ünanga. Mä o Daud woihene o hali gënanga, daha woiki o bebeno mehelika.

¹⁸O Filistin manyawa imahi ädono o Refaim ma Waioka de yogogere.

¹⁹O Daud woleha ma Jouika, ”Kokiani ngohi taparangi o Filistin manyawa gënanga? Boteka Ngona aha nohihi döaka o utumu ngohino?” ”Naparangi!” ma Jou wohaluhu. ”Ngohi aha tonihi döaka o utumu ngonaika!

²⁰Ipaha o Daud woiki o Baal-Perasimika de genangoka o Filistin manga duduono wahihangoka. Daha ünanga wotemo, ”Ma Jou wakiliangoka ahi haturu manga bebeno o mehele, hokä o nguihi yaruba hagala moi-moi o öraha moi magoronaka.” Hababu gënanga o ngï gënanga yahetongo o Baal-Perasim.

²¹O Filistinoka manga duduono yopiringana imahi daenua yao toönanga manga gomanga madulada-dulada. O dulada-dulada gënanga o Daud deʼ ainyawa yal̄ë.

²²Itedekanua ipahaika o Filistin manyawa yoboali yogogere o Refaim ma Wai.

²³Wohigalioli o Daud wogahoko o hidumutu ma Jouika. Ma Jou wohaluhu, ”Uha naparangi nenangoka deʼ naika, mä notagi nakiloliti deʼ naparangi önanga manga poretino, itigiki deʼ o murbei magota mautu-mautu.

²⁴Maöraha okia noihene o ilingi hokä o nyawa manga duduono madibingi gota-gota matubuoka gënanga, done notagi ani himangika, hababu Ngohi aha totagi ani himangoka la Tahohihanga o Filistinoka manga tentara.”

²⁵O Daud wadiai okia ma Jou wihi pareta, deʼ ünanga wohasili waparangi wahidodohuku o Filistin manyawa o Giba deʼ yaino hiädono o Gezer.