Read Tobelo O SAMUEL MAHINOTOKA 7 Bible Online

O SAMUEL MAHINOTOKA 7 - Tobelo bible

O SAMUEL MAHINOTOKA 7

¹Ma Jou wihohongino ma Koano Daud hagala manga ruaë ai haturuino, hiädono ünanga wakunu wotatapu ai kadato ma goronaka.

²Ma koano witemo ma Nabi Natanika, ”Nolega, nënanga togogere o kadatoka yododiai o liwewuru magota o Libanonino, ena hioko ma Jou Ai Jaji ma Peti duga-duga igogono o hubayanga matau magoronaka dika!”

³O Natan wohaluhu, ”Nadiai hagala ani mau Jou Koano, hababu ma Jou woniriwo Jou Koano.”

⁴Mä o hutu gënanga ma Jou witemo o Natanika,

⁵”Noiki de nohi ädono ahi gilaongika o Daud, Ahi behehongo nënanga, ’Kiaka yakunu ngona nohigoko o tau Ngohino.

⁶Mamulaenge o Israel manyawa tahihupu o Mesirino hiädono o öraha nënanga, komaiwahi Ngohi to gogere o tau moi magoronaka, mä hoko genangika todagi tongika-ngino deʼ togogere o tau-tauoka moi.

⁷Madekana Todagi tongika-ngino mimaki nïki o Israeloka manyawa, komaiwahi Ngohi taleha o tutuda-tutudaika Taö iri-irikoka, okia mahababu önanga ihigokoua o tau-tau o liwewuru magota Libanonino mangale Ngohi.’

⁸Hababu gënanga, Natan, nihi ngahu Ahi gilaongika o Daud, Ngohi, ma Jou Toko Kuaha, titemo unangika, ’Ngona toni l̄ëoka ani manaramino o duba nogoa-goana o tonaka malua-luasoka deʼ toni goraka nodadi o koano Ahi umatoka o Israel.

⁹Ngohi toni tomotekoka ngona kiaika dika ngona noiki, deʼ hagala ani haturu Tabinahaka maöraha ngona nimateke parangi. Ngona aha toni diai ini nako hokä o tutuda-tutuda duru yolamo-amoko o duniaka.

¹⁰Ikali, Ahi umatoka o Israel Tasadiaoka o ngï de Tahuloko önanga yotatapu genangoka, hupaya önanga yotatapu genangoka, hupaya önanga yakunu yowango yorïdi, koyaruaë okauaoli. Kadeʼ mulaenge toönanga manga böa o tonakino nënanga mahira, deʼ Tagoraka o tutuda-tutuda mangale önanga, önanga yaparangioka hagala o nyawa yoigo ima poputurungu, mä o hali gënanga aha idadi okauaoli. Ngohi tojaji ngona aha norïdi hagala ani ahaturuino deʼ Tonihi döaka ngonaika o ngohaka deʼ o danongo.

¹²Dama, nako ani ajali yadono, deʼ ngona ini lungunu ani ete deʼ ani tohora manga jereoka, woma tengo ani ngohakino aha tigoroka wodadi o koano. Unanga aha wohi goko o tau mangale Ngohi. Ai pareta aha Tohi kuata deʼ mangale kahi ädo-ädonika womatengo aidifauku aha wopareta hokä o koano.

¹⁴ Ngohi aha todadi ai Ama, de ünanga aha wodadi Ahi ngohaka o nauru. Maöraha okia ünanga wodiai o howono, ünanga aha Tihukumu hokä womatengo o Ama wihukumu aingohaka.

¹⁵Mä Ngohi aha tatapu todiai o oa-oa unangika imamoteke deʼ Ahi jaji. Ahi jaji unangika aha kahirahi Tasösö, hokä Tadodiaiua o Saulika Tihi rehenoka ai kuruhi oka hupaya ngona yakunu nodadi o koano.

¹⁶Ngona aha hoko genangika deʼ tongona ani difauku, deʼ Ngohi aha tadiai ani pareta itongohono kahi ädo-ädonika. Mangale kahi ädo-ädonika womatengo ani difauku aha wopareta hokä o koano.’ ”

¹⁷Daha o Natan wohi ngahu o Daudika hagala wohinyö nyata-nyata ma Jou Madutu unangika.

¹⁸Daha ma Koano Daud wowohama ma Jou Ai Tau magoronakaika. Unanga wogogere deʼ woma niata, ”Ya Jou Nokö Kurutil̄e, ngohi deʼ ahi tau manyawa ipatutua mia tarima hagala o oa-oa Nohidö dumu-dumutu ngohino madekanino nënanga.

¹⁹Ngona nodiaioka o jaji ima korona ahi difauku mangale maöraha aha iboa. deʼ Ngona nohihi matokoka o hali gënanga ngohino, ngaroka ngohi duga-duga kao nyawa, ya Jou No ko Kurutil̄e!

²⁰Okiahi yakunu totemo Ngonaika? Ngona nohi öriki hagala mata-mata mangale ani gilaongo nënanga.

²¹Deʼ Ani jaji deʼ mangale Ani mau mahirete Ngona nodiaioka o manarama-o manarama ma ago-agomo gënanga mangale nohï dotoko Ani gilaongo nënanga.

²²Ngona igoungu nolamoko, ya Jou Madutu! Duga-duga Ngona Jou Madutu, koiwa imake tero dede Ngona. Ngomi mihi öriki o hali gënanga hababu imihi ngahuoka ka ma hirahi.

²³O dunia ingodumu koiwa o hoana hokä o Israeloka. O Israeloka kagenangö moi o hoana Nahi lapahioka o gilaongino mangale yodadi Ani umati mahirete. Hagala o manarama ma ago-agomo deʼ ihera-heranga Ngona nadodiaioka onangika, yadiai Ani romanga yanako o duniaka ingodumu. Hagala o hoana mahomoa ima nïki toönanga manga goma-gomanga Naduhuoka maöraha Ani umati yoiki yoparangi.

²⁴O Israeloka manyawa nahi dadioka Ani umati mahirete mangale kahi ädo-ädonika, deʼ Ngona ya Jou, nodadi toönanga manga Jou Madutu.

²⁵Deʼ o öraha nënanga, ya Jou madutu, noigo Ngona nohi kuata mangale kahi ädo-ädonika o jaji Nohidö demo-demoka imakorona ahi diri deʼ ahi gutiuku. Noigo na diai Nohi jajioka gënanga.

²⁶Kiaka honanga o nyawa aha hoko genangika ihi mulia Ani romanga deʼ yotemo, ’Ma Jou Duru woko Kuaha enagënanga ma Jou Madutu mangale o Israeloka.’ Done mangale kahi ädo-ädonika womatengo ahi gutiukuino aha wopareta hokä o koano mangale o hoana nënanga.

²⁷Jou Duru woko Kuaha! Ngohi tohibarani ahi diri tohi doa ahi niata nënanga Ngonail̄e, hahabu Ngona mahirete nohingahuoka ngohino ahi ngohaka deʼ ahi danongo de ahi gutiuku Nahi dadi o koano mangale o hoana nënanga.

²⁸Ya Jou Duru noko Kurutil̄e, Ngonaö ma Jou Madutu; mata-mata Ani jaji Natotomo, deʼ o hali mahohailoa gënanga nohi jajioka ngohino.

²⁹Hababu gënanga ngohi togahoko, noigo nahibarakati ahi difauku hupaya önanga yamao Ani dora kahi ädo-ädonika. Ya Jou Duru noko Kurutil̄e, mata-mata gënanga nohijä jajioka, done ahi gutiuku aha kahirahi Nahibarakati mangale ka hi ado-adonika.”