Read Tobelo O SAMUEL MAHINOTOKA 9 Bible Online

O SAMUEL MAHINOTOKA 9 - Tobelo bible

O SAMUEL MAHINOTOKA 9

¹ O wange moiuku o Daud woleha, ”Kanagahi o nyawa yowango o Saul ai tau manyawaino? Nako naga, toigo todiai o oa-oa unangika mangale o Yonatan.”

²O Saul ai tau manyawa toönanga manga gilaongo ai romanga o Ziba, deʼ ünanga iwi huloko wihimanga ma Koano Daud. Ma Koano wileha, ”Ngona o Ziba?” ”Iya, Jou Koano,” wohaluhu.

³ Ipaha ma koano woleha, ”Kanagahi o nyawa yowango o Saul ai tau ma nyawaino? Ngohi toigo todiai o oa-oa unangika hokä tojajioka ma Jou Madutuika.” O Ziba wohaluhu, ”Kanagahi womatengo o Yonatan ai ngohaka. Unanga wosuga.”

⁴”Kiaka unanga?” ma koano woleha. ”O Lodebaroka, o Makhir o Amiel aingohaka ai tauoka,” O Ziba wohaluhu.

⁵Daha ma Koano Daud wahuloko iwi ahoko o Yonatan aingohaka gënanga.

⁶O Yonatan aingohaka gënanga ai romanga o Mefiboset. Maöraha ünanga woboa, ünanga watilabukuku wihoromati o Daud. O Daud witemo unangika, wato, ”Mefiboset,” de ünanga wo haluhu, ”Iya, Jou Koano.”

⁷O Daud witemo, ”Uha nohawana. Ngohi aha ahi hininga toigo tonihi döaka ngonaika mangale o Yonatan ani Ama. Mata-mata o tonaka toani ete o Saul, aha tohigilio ngonaika de, mangale kahi ädo-ädonika ngona yakunu nol̄omo o kadatoka.”

⁸O Mefiboset watilabukuoli deʼ wotemo, ”Okia mamangarati ngohi nënanga! Yadodoa Jou Koano hoko gënanga mahailoa ngohino?”

⁹Daha ma koano wiahoko o Ziba o Saul ai gilaongo gënanga, deʼ witemo, ”Hagala o Saul wamö mal̄a-mal̄aika deʼ ai tau ma nyawa tihi döaka ai tuanga ai danongika nënanga.

¹⁰Ngona deʼ ani ngoha-ngohaka ikali inirö riwo-riwo kiani nia manarama o tonaka gënanga mangale ani tuanga o Saul ai tau manyawa, deʼ nahi döaka onangika o tonaka mahasili gënanga, mangale ihi dogo toönanga manga paralu. Mä o Mefiboset yakunu wol̄omo o kadatoka kahi ädo-ädonika.” (O Ziba to ünanga ai ngohaka o nauru yangimoi deʼ yamotoa deʼ ai gilaongo ya monaoko.)

¹¹O Ziba wohaluhu ma koanoika, ”Hagala ani pareta Jou Koano aha ngohi tadiai.” Hoʼ, o Mefiboset wol̄omo o meja moi deʼ ma koano, hokä ma Koano Daud aingohaka mahirete.

¹²O Mefiboset to ünanga aingohaka ai romanga o Mikha. O Ziba ai tau manyawa mata-mata yodadi o Mefiboset ai gilaongo.

¹³Hoko gënanga o Mefiboset ai l̄ou hinoto gënanga itö tiai okaua gënanga wogogere o Yerusalemoka deʼ hoko genangika wol̄omo o kadatoka.