Read Tobelo O KOKOANO MADODIHIRAKA 1 Bible Online

O KOKOANO MADODIHIRAKA 1 - Tobelo bible

O KOKOANO MADODIHIRAKA 1

¹”Oraha nënanga ma Koano Daud duru iwi perekioka. Ngaroka ünanga iwi korobiti de o ngoëre mabiri-birini, ünanga kahirahi iwï alo.

²Karana gënanga ai pegawe-pegawe iwi temo, ”Nomo Mulia, kayaoa ngomi milingiri momatengo o moholehe mangale mogogere de Jou Koano de moni paliara Jou Koano. Munanga aha momaidu kamamoi de Jou Koano, hupaya Jou Koano namao ini hauku.”

³Daha yolingiri o Israelokaka ingodumu momatengo o moholehe ami hohailoa. Daha o Sunemoka imi make momatengo o moholehe duru kaami hailoa ami romanga o ngo Abisag. Munanga imi ao makoanoika, daha munanga migoana ma koano de mipaliara. Mäma koano ima roëhe moiua dede munanga.

⁴

⁵ Karana o Absalom wohonengoka, daha o Adonia, o Daud ai ngohaka nauru mahinotoka wodadi worö ria-riaka. Ngoi ayo ami romanga o ngo Hagit. O Adonia ganga o nyawa yohohailoa. Ai ama komaiwa wingamo nako ünanga wodiai o howono. O Adonia duru wö nahihu wodadi o koano, daha ünanga wosadia mangale ai diri mangoë o kureta ihi poparangi, de o tentara yobö bare-barene o kuda ikali ai diri yogö goa-goana yamoritoa.

⁶

⁷Daha ünanga wöiki ima katuru de o Yoab de ma Imam Abyatar. O Yoab ngoi ayo ami romanga o ngo Zeruya. O Yoab de ma Imam Abyatar yorimoi mangale yoriwo o Adonia ai hidailako.

⁸Mä ma Imam Zadok, o Benaya o Yoyada aingohaka, ma Nabi Natan, o Simei, o Rei de ma Koano Daud ai diri yo goa-goana iwihi böaua o Adoniaino.

⁹O wange moiuku ihi romanga o Dodiha ma Helewo mangïoka o En-Rogel ma jobubu madatekoka, o Adonia wohi huba o huhuba o duba, o hapi manauru de o hapi mangohaka maboburere. Unanga wä ahoko ma Koano Daud ai ngoha-ngohaka o nauru mahomoa de o kadato ma pegawe-pegawe o Yehuda ai hoanino o huhuba marameangika gënanga.

¹⁰Mä ai dodoto o Salomo, de ma Nabi Natan ikali o Benaya de ma Koano Daud ai diri magogoana wä ahokua.

¹¹ Daha ma Nabi Natan wöiki womiädono o ngo Batsyeba, o Salomo ngoi ayo, daha womi temo munangika, ”Jou Boki bote noihenuahi o Adonia o ngo Hagit ami ngohaka o nauru woma göraka ai diri wodadi o koano, enahioko ma Koano Daud okia-okiaua wohi öriki mangale o hali gënanga?

¹²Jou Boki noigo hupaya o Salomo de Jou Boki mahirete nihalamati, ngohi toni nasihati,

¹³itaiti nihimanga ma Koano Daud, de notemo hoko nënanga unangika: ’Koigoungua Jou Koano mahirete nokobotoka ngohino ahi ngohaka o nauru o Salomo aha wodadi o koano wonitagali Jou Koano? Yadodoa, öraha nënanga o Adonia wodadi o koano?ʼ ”

¹⁴O Natan wotemo wohi gila-gila, ”Damä, Jou Boki de ma koano mima ade-ade magogiriaka, ngohi aha towohama mangale tohi kuata okia Jou Boki notö temo-temoka.”

¹⁵Daha o ngo Batsyeba moiki mihimanga ma koano ai kamari magoronaka. ”Oraha gënanga makoano duru iwi perekioka, de o ngo Abisag, o Sunem mamoholehe gënanga, magogiria mileleani.

¹⁶O ngo Batsyeba matilabukuku ma koano ai himangoka, daha ma koano womi leha, ”Ngona okia nö mau?”

¹⁷O ngo Batsyeba mohaluhu, ”Jou Koano nomo Mulia, Jou Koano nokobotoka ngohino de ma Jou Ai romanga, Jou Koano ani Jou Madutu, ahi ngohaka o Salomo aha wodadi wokoano woni tagali Jou Koano.

¹⁸maöraha nënanga Jou Koano de konä nako-nakoua, o Adonia wodadioka o koano.

¹⁹Unanga wohihubaka o duba koha ngoë, o hapi manauru de o hapi mangohaka maboburere. Unanga wa ahokokali o rameangika gënanga Jou Koano ani ngoha-ngohaka o nauru de ma Imam Abyatar ikali o Yoab, Jou Koano ani tentara yopoparangi manga kapita. Mä ünanga wi ahokua o Salomo.

²⁰Jou Koano nomo Mulia, o Israeloka makawaha yongodumu öraha nënanga magogiria yododamä maputuhu Jou Koanoino, mangale o nagona aha ini tagali Jou Koano yodadi o koano.

²¹Nako Jou Koano nohi döakua o putuhu gënanga, maraioka Jou Koano kadeno honengoka, ngohi de ahi ngohaka aha imihidiai hokä yosetiaokaua.”

²²O ngo Batsyeba kamo temo-temohi, ma Nabi Natan womahi ädono o kadatoka.

²³Daha ma koano iwihingahu mangale o Natan woböa. O ngo Batsyeba mohupu, de o Natan wowohama, daha watilabukuku ma koano ai himangoka.

²⁴O Natan wotemo, ”Jou Koano nomo Mulia, boteka Jou Koano nohi ngahuoka o Adonia aha wonitagali Jou Koano wodadi o koano?

²⁵O wange nënanga dika ünanga wohihubaka o duba koha ngoë, o hapi manauru de o hapi mangohaka maboburere. Jou Koana ani ngohaka o nauru mata-mata wä ahokoka. Jou Koano ani tentara yopoparangi manga kapitaö, de ma Imam Abyatar. ”Oraha nënanga önanga manga gogiria yorameanga dede ünanga de ima uli-ulili, ’No wango Koano Adonia!ʼ

²⁶Mä, ünanga wohi ahokua ngohi. Ma Imam Zadok deʼ o Benaya ikali o Salomoö ma wiahokua.

²⁷Boteka Jou Koano nihuloko ünanga wodiai mata-mata nënanga, konohi ngahua Jou Koano ani pegawe-pegaweika, o nagona aha initagali Jou Koano?”

²⁸Ma Koano Daud wotemo, ”Nimi ähoko o ngo Batsyeba.” Daha ma Nabi Natan wohupu de o ngo Batsyeba ma koano mihimangoli.

²⁹Daha ma Jou Koano wato munangika, ”Igoungu ngohi tojajioka ngonaika, de ma Jou Ai romanga, o Israeloka manga Jou Madutu, o Salomo ani ngohaka o nauru aha wohi tagali ngohi wodadi o koano. Aa, öraha nënanga ngohi tojaji ngonaika de o Jou wo wango-wango, wohihilapahioka ngohi hagala ahi huhaoka, o wange nënanga dika ngohi aha tohiganapu ahi jaji ngonaika.”

³⁰

³¹Daha o ngo Batsyeba matilabukuku ikali motemo, ”No wango Jou Koano mangale kahi ado-adonika!”

³²Daha ma Koano Daud wähuloko iwi ahoko o Zadok, o Natan deʼ o Benaya. ”Onanga yoboainoka,

³³ma koano wätemo onangika, ”Niä ahoko ahi tentara manga balu-baluhu, de niöiki dede önanga ahi ngohakika o Salomo. Ni wihi döa ünanga ahi kuda mahirete mal̄okuil̄e, de niwi ao ünanga o Gihon majobubuika.

³⁴Dokengoka o Zadok deʼ o Natan kiani iwi tede wodadi o Israeloka manga koano. Iböto gënanga ngini kiani nia wuwu o trompet de nima uli-ulili, ’Nowango Koano Salomo!ʼ

³⁵Ipaha niwi nïki ünanga nima idulu nenangino mangale wogögere ahi kadatoka, karana ünanga tï irikoka wodadi o koano wohitagali ngohi, mangale wä pareta o Israel de o Yehuda.”

³⁶”Kayaoa, Nomo Mulia,” o Benaya wohaluhu, ”tanu ma Jou, Jou Koano ani Jou Madutu, wohi kuata Jou Koano ani pareta gënanga.

³⁷Hokä sarakia ma Jou wonitomotekoka Jou Koano, tanu Unangö o Salomo witomotekoli. Tanu ma Jou wadiai aipareta iholoi woutumu ngaro de Jou Koano ani pareta.”

³⁸Daha o Zadok, o Natan, o Benaya de ma koano ai diri yogö goa-goana, iwi huloko o Salomo wodöa ma koano ai kuda mal̄okuil̄e daha önanga iwi nïki o Gihon majobubuika.

³⁹Ipaha o Zadok wal̄ë o zaitun maminya mangï wao-aoka ma Jou Ai Tauoka de waino, daha ünanga witede o Salomo de wapake o minya gënanga. O trompetö yawuwu de mata-mata yoboa-boaino genangoka youlili, ”Nowango Koano Salomo!”

⁴⁰Ipaha önanga mata-mata iwi nïki ünanga ima idulu ikali ima uli-ulili de yawuwu o sulingi, hiädono o tonaka matero-tero aha ibela-belaka karana marame gënanga.

⁴¹O Adonia de mata-mata ai tamu yoboa-boaino daha ibotino yorameanga, maöraha önanga yoihene o rame gënanga. Maöraha o Yoab woihene o trompet mailingi, ünanga woleha, ”Okia idadi o kotaka, hiädono duru koharame?”

⁴²O Yoab wotemo-temo kowa pahauahi, itodokanino o Yonatan woboa, ma Imam Abyatar aingohaka. ”Naino nowohama,” o Adonia wato. ”Ngona o nyawa maoa, marai noao o abari maoa-oaoli.”

⁴³”Uha nohi ngamo, o abari maoaua,” o Yonatan wohaluhu. ”Ma Koano Daud wigorakoka o Salomo wodadi o koano!

⁴⁴O Zadok, o Natan, o Benaya de ma koano ai diri yogoa-goana wahulokoka iwi nïki o Salomo. Onanga iwihi döaka ma koano ai kuda mal̄okuil̄e,

⁴⁵deʼ o Zadok ikali o Natan iwi tedeoka o Gihon majobubuoka. ”Oraha nënanga önanga ima iduloka o kotaika ikali ima uli-ulili de koha rame, de o kota ingodumu igora-gorakil̄euku. Genangala ngini ni ö ihe-ihene marame kangano.

⁴⁶”Oraha nënanga o Salomo wodadioka o koano.

⁴⁷Ma koano aitentara manga balu-baluhu yoikoka makoano Daudika yotemo halamati. Onanga yato, ’Jou Koano ani Jou Madutu wihi dadi o Salomo iholoi iwi heto-hetongo ngaro de ngona jou koano; tanu o Salomo aipareta mautumu iholoi, ngaro de jou koano ani pareta.’ Ipaha ai ngidu-ngidu mangïoka, ma Koano Daud watilabuku wihuba ma Jou Madutu,

⁴⁸deʼ woma niata, ’O higiriri Ngona, ya Jou, ma Jou Madutu o Israeloka ma umati ini hö huba-huba. O wange nënanga womatengo ahi gutiuku tigorakoka wodadi o koano wohi tagali ngohi. De Ngona nohihigumal̄aka ngohi towango, mangale tahakihi!ʼ ”

⁴⁹O Adonia ai tamu idadi yohawana, hiädono önanga mata-mata ima oko daha imajobo, moi-moi imahi lingiri o ngekomo mahirete.

⁵⁰Daha o Adonia duru wï modongo o Salomoika, hiädono ünanga woara ma Jou Ai Tauika de genangoka womahi jojoika o huhuba mangï mabare-barenika.

⁵¹O nyawa iwihi ngahu o hali gënanga o Salomoika. ”Onanga ihi ngahu karana o Adonia duru wï modongo o Salomoika, daha ünanga woikoka o huhuba mangïika de womahijojoika o huhuba mangï mabare-barenika gënanga, ikali wotemo, ”Ngohi aha toikua nenangoka nako o Salomo wokobotuahi ngohino ünanga aha wohi tomaua ngohi.”

⁵²O Salomo wohaluhu, ”Nako ünanga wodiai yaoa, kamahuhutulö mä ünanga aha iwihukumua; mä nako ünanga wodiai o dorou, ünanga kiani iwi toma.”

⁵³Daha ma koano wähuloko o nyawa yoiki iwi l̄ë o Adonia o huhuba mangïno gënanga. Daha o Adonia woböa wihimanga ma koano, de watilabukuku ai himangoka. Daha ma koano wïtemo, ”Ngona yakunu nolio!”