Read Tobelo O KOKOANO MADODIHIRAKA 10 Bible Online

O KOKOANO MADODIHIRAKA 10 - Tobelo bible

O KOKOANO MADODIHIRAKA 10

¹ O Syeba maberera ma koano moihene mangale o Salomo ai barija. Daha munanga moboa o Yerusalemika mangale miuji o Salomo de o loleha mahü huha.

²Munanga moboa ima komoteke iminö ninïki komanga ngoë de o onta ioma-omanga magina o rampa-rampa o itanga de o folori, de duru kohä ngoë o gurasi. Maöraha ima make de o Salomo, ma koano gënanga mohihimanga hagala rupa o loleha yakunu mapö piki-pikiroka.

³Mata-mata o loleha gënanga o Salomo wakunu wahaluhu, ka moiö maduru ihuhaua unangika.

⁴O koano gënanga mahirete mahakihi hokokia o Salomo ai barija. Munanga mamake o kadato wohigö goko-goko o Salomo,

⁵ai kadatoka mapegawe-pegawe manga manarama madatoro, de manga pakeanga o rupa moi ikali toönanga manga tau. Munanga ma make ihidö dodiai o inomo de o ngokere, yolö leleani madodagi yoleleani o rameanga, de o huhuba-o huhuba o Salomo wohi huba-huba ma Jou Ai Tauoka. Mata-mata gënanga o Syeba maberera ma koano gënanga imi diai moheranga de mokiriri.

⁶Daha munanga motemo ma Koano Salomoika, ”Hagala ngohi toö ihe-ihene tongohi ahi berera madutuoka mangale Tuanga de ani barija Tuanga, igoungu itiai!

⁷Mahira ngohi tongakua, mä ngohi toboaka de tahakihi mata-mata de ahi lako mahirete, de ahaö ngohi tongaku. Igoungu hagala ngohi toö ihe-ihene gënanga itogorona uahi de ngaro ngohi tamö make-make öraha nënanga. Inyata ani barija de ani kaya Tuanga iholoi ilamoko ngaro de ihihi ngahu-ngahu ngohino.

⁸Duru kamanga utumu ngoni heka-hekata Tuanga! De duru youtumu ani pegawe-pegawe hoko genangika yomanarama mangale Tuanga hiädono yakunu yoihene Tuangino mahirete hagala o dodotoko iböbobarija!

⁹O higiri ma Jou, Tuanga ani Jou Madutu! De woni goraka Tuanga nodadi o Israeloka manga koano, ma Jou wohi dumutu hokokia Unanga ai sanangi ngonaika Tuanga. Koi togu-togumua Unanga wahininga o Israeloka manyawa; gënanga hababu Unanga woni goraka Tuanga nodadi toönanga manga koano, hupaya Tuanga yakunu nabitumu o hukumu de o adili.”

¹⁰Ipaha o Syeba maberera ma koano gënanga mohilapahi o hadia-hadia o Salomoika maö ao-ao, enagënanga o gurasi o kilo o ribuhu iata iholoi, de o itanga de o folori magegetongo ko haamoko ikali o rampa-rampa. Komaiwaka o Salomo watarima o rampa-rampa hoko gënanga mangoë hokä o Syeba maberera ma koano mihi doa-doaka gënanga unangika. (

¹¹O Hiram ai kapa-ai kapa yaö ao-ao o gurasi Ofir de yaino mangale o Salomo, yaoö o itanga de o folori mahelewo ma gegetongo kohä ngoë de o cendana magota.

¹²O gota gënanga o Salomo wopake mangale wadiai o tarali-tarali ma Jou Ai Tauoka de ma koano ai kadatoka; mangale wadiaiö o kecapi deʼ o gambus mangale yonyä nyanyika. O gota-o gota gënanga ganga o cendana magota duru maoa-oa mamoi iböto yao o Israelika; komaiwaka o nyawa yamakeoli o gota ma rahai gënanga.)

¹³O hadia-hadia biaha mahomoa o Salomo womihi döaka, ünanga womihi doakö ma koanoika o Syeba mabereraino gënanga hagala mogö gaho-gahoko. Ipaha ma koano gënanga molio ami bereraika ima komoteke mata-mata iminö ninïki.

¹⁴O taongo ihi getongo ma Koano Salomo watarima o gurasi ngadeke o kilo o ribuhu monaoko de hange,

¹⁵ietonguahi ai utumu-ai utumu woma huku-hukunino, de o soungu-o soungu, ima huku-hukunino, o Arab makokoano ikali o Israeloka manga gubernur-gubernur.

¹⁶O Salomo wodiai o dadatoko ma ago-agomo o gurasi de yatutuku, o ratuhu hinoto. O gurasi ihipö pake-pake o dadatoko yogetongo naga makuranguku o kilo tumidi.

¹⁷Unangö wodiai o dadatoko o gurasi iholoi ieteke o ratuhu hange. O gurasi ihipö pake-pake mangale o dadatoko mai teteke yogetongo gënanga, naga makuranguku o kilo hinoto, mata-mata o gurasi de yatutuku. O dadatoko mata-mata gënanga yakelenga o tauoka ihi romanga o Libanon ma Hongana ma Tau.

¹⁸Unangö wodiai o pareta makuruhi moi ma amo-amoko ihi lape de o gadingi deʼ ihi poromu de o gurasi madutu.

¹⁹O kuruhi gënanga de magiamoka, de yohohononga naga o singa madulada. O kuruhi maporetiha gënanga naga o hapi mahaëke madulada. O kuruhi gënanga toenangö madoko-doko butanga.

²⁰Mabarene o higiloka deʼ mabarene o nirakoka o ngute madoko-doko yogetongo gënanga naga o singa madulada — mata-mata o gahumu ngimoi de hinoto. Koiwahi naga o pareta makuruhi hoko gënanga o pareta kiakaö dika.

²¹O Salomo wohiö oke-okere mapakakaha mata-mata yadiai o gurasino, deʼ mata-mata mapakakaha o Libanon ma Hongana ma Tauokaö yadiai de o gurasi madutu. Koiwa yadiai de o haaka, hababu o Salomo ai orahoka o nyawa yapulono o haaka koiwa maija.

²²O Salomo to ünanga ai kapa ma ago-agomo kohä ngoë, ima kinïki ihidete de ma Koano Hiram ai kapa. O taongo hange ma moi o kapa-o kapa gënanga ilio iao o gurasi, o haaka, o gadingi, o mia deʼ o luri.

²³Ma Koano Salomo iholoi wokaya de iholoi wobarija ngaro de o koano okiainoö dika o duniaka.

²⁴O nyawa mata-mata o dunia magilolitino ihi dailako iwi make o Salomo mangale yoihene o dodotoko ibobarija ma Jou Madutu wihidö doa-doaka unangika.

²⁵Önanga moi-moi yoboa deʼ yoao o hadia mangale o Salomo. Önanga iwi hidöaka okia honanga o haaka, o gurasi, o pakeanga, o daë, o rampa-rampa, o kuda deʼ o keledai. Hoko genangala o taongo tagali taongo.

²⁶ O Salomo wätoomu aitentara yopoparangi enagënanga o kureta ihi poparangi yaribuhu moi de yaratuhu iata deʼ o tentara yobö bare-barene o kuda yaribuhu ngimoi de hinoto. O hidoku moi wahi gogere o Yerusalemoka deʼ maboloi o kota-kota mahomoaka.

²⁷ O Salomo aipareta maöraha magoronaka, o Yerusalemoka o haaka marupa kabiaha, kaimatero hokä o helewo, deʼ o Libanon maliwewuru magota duru kohä ngoë hokä o ara magota biaha.

²⁸ De ma koano ai hidailako, o kuda yoao o Mesirino de o Kilikiaino,

²⁹deʼ o kureta-kureta ipoparangi yoao o Mesirino. O kuda o dutu moi maija o ratuhu moi de moritoa o tiwi o haaka, de o kureta ihi poparangi moi maija o ratuhu butanga o tiwi o haaka. Ipaha de yodö dodiai gënangoli dika o kuda-o kuda de o kureta-o kureta ihi poparangi gënanga yahukunoli o Het ma kokoano de o Siria ma kokoanoika.