Read Tobelo O KOKOANO MADODIHIRAKA 11 Bible Online

O KOKOANO MADODIHIRAKA 11 - Tobelo bible

O KOKOANO MADODIHIRAKA 11

¹ Ma Koano Salomo waigo o ngoheka maporetino komanga ngoë. Mahomoa de ma koano Mesir ngoi ora, o Salomo wokawingö de o Het, o Moab, o Amon, o Edom de o Sidon mango-ngoheka.

² Ma Jou wohi paretaka o Israel manyawa yakunua yokawingi ima kaganu de o hoana-o hoana gënanga, hababu önanga yodadi hababu o Israel manyawa yahuba o gikiri-gikiri mahomoa. Ngaro hoko gënanga, o Salomo kawo kawingi dika o ngo-ngoheka ma poretino.

³O Salomo naga wakawingi o nyawa yomo mulia manga ngohaka o ngoheka yaratuhu tumidi, de nagaoli ngoi hekata paliara yaratuhu hange. Ngoi hekata-hekata gënanga yodadi o hababu o Salomo wimal̄a ma Jou Madutu,

⁴hiädono maöraha ünanga iwi perekioka önanga iwi ngakunu iwi baja wahuba o gikiri-gikiri mahomoa. O Daud, o Salomo ai ama, wososetia ma Jouika, ai Jou Madutu, mä o Salomo hokä ai amaua.

⁵O Salomo wahuba o Asytoret, o Sidon manyawa manga gomanga o ngoheka, de Molokh o gomalega inahohi miriti o Amon manyawa yahuba-huba.

⁶Hoko genangala o Salomo wobaradoha ma Jouika. O Daud, o Salomo ai Ama winïki ma Jou de ahininga magahumu, mä o Salomo hoko genangua.

⁷Ol̄oku o Yerusalem o wange mahiwaroko idaduoka matubuoka, ünanga wohi goko o huhuba mangï mangale o Kamos, o Moab manyawa manga gomanga, deʼ mangale o Molokh, o Amon manyawa manga gomanga — o gomanga hinoto-noto haö emo-emono.

⁸O Salomo wohi gokö o ngï-o ngï kiaka ngoi heka-hekata o berera ma homoaino yakunu yatuhuku o dupa, deʼ ihihuba o huhuba mangale toönanga manga gomanga mahirete.

⁹Mahinoto iböto ma Jou, o Israeloka manga Jou Madutu, womahi matoko Ai diri o Salomoika deʼ wihi döaka o hohininga ünanga, yakunua ünanga wahuba o gikiri-o gikiri mahomoa, mä o Salomo wihingounua ma Jou. Koaholi ünanga wimal̄a ma Jou, hiädono ma Jou wingamo unangika.

¹⁰

¹¹Ma Jou wato, ”Karana de noma nako-nakouku ngona na tilakuru ani jaji dede Ngohi deʼ nohi ngounua Ahi pareta-pareta, done o pareta gënanga Ngohi aha ngonaka de tarahuku, deʼ Tihidöaka ani pegaweika womatengo.

¹²Ngaro hoko gënanga, de ani ama o Daud, maöraha ka nowangohi Ngohi aha tadiaiua o hali gënanga. Maöraha ani ngohaka o nauru aipareta, daha Ngohi tadiai.

¹³Ma o pareta mata-mataua gënanga aha ngonaka de tarahuku. De Ahi gilaongo o Daud, de o Yerusalem Tohi dadioka Ahi kota gënanga, Ngohi aha tämal̄a utu o hoana moi mangale ani ngohaka o nauru.”

¹⁴Daha ma Jou widiai o Hadad, ma koano Edom aidifauku, wihaturu ma koano Salomoika.

¹⁵Kowahi de gënanga madekana, ma Koano Daud wahohihanga o Edom ibötino, o Yoab, ma Koano Daud aitentara yopoparangi manga kapita, wöiki o Edomika mangale wajere ainyawa yohone-honenge. O mede butanga madekana ünanga de ainyawa yogogere o Edomoka. De öraha magoronaka gënanga önanga yätoma o nau-nauru mata-mata dokengoka.

¹⁶

¹⁷Maöraha gënanga o Hadad kawoma gö ikahi, woaroka o Mesirika ima kinïki de o Edom manyawa yamuruono naga, ai ama iwilö leleani.

¹⁸Önanga ima jobo o Midian de yaino, daha yöiki o Paranika. Dokengoka o nyawa mahomoa yamuruono naga ima hidogo dede önanga, daha ima kinïki yöiki o Mesirika iwi ädono ma koano Mesir. Ma koano gënanga wihidöaka o Hadadika o tau de o tonaka mangale ai gogere mangï ikali watagongo ai wowango.

¹⁹Daha o Hadadö wodadi ma koano ai dodiawo maoa-oa, hiädono ma koano wihidöaka ngoi hahuru mahirete, enagënanga ngoi hekata o ngo Tahpenes ngomi dodoto, o Hadadika mangale mo dadi ngoi hekata.

²⁰Ipaha o Hadad ngoi hekata gënanga mihingohaka o ngohaka o nauru womatengo, deʼ iwihi romanga o Genubat. O ngohaka nënanga mipaliara ngoi hekata mahirete, de wogogere o kadatoka de ma koano aingohaka o nau-nauru.

²¹Maöraha o Hadad watarima o abari ma Koano Daud wohonengoka, de o Yoab, o Israeloka manga tentara yopoparangi manga kapitaö wo honengoka, o Hadad witemo ma koano Mesirika, ”Nohihigumal̄a ngohi tolio ahi berera madutuika.”

²²”Yadodoa?” ma koano woleha. ”Bote ngona nokuranga nenangoka, hiädono ngona nomau nolio ani berera madutuika?” ”Ngohi okia-kiaua tokuranga,” o Hadad wohaluhu, ”mä nohihigumal̄a la ngohi töiki.” Daha ünanga wolio ai berera madutuika.

²³Ma Jou Madutuö widiai o Rezon, o Elyada aingohaka, wihaturu o Salomo. O Rezon ganga ma Koano Hadadezer o Zobaino ai gilaongo enagënanga ai tuangoka de wohi oaroka ai diri.

²⁴Ma Koano Daud mamoi iböto wihohihangoka o Hadadezer nënanga deʼ wakoki toma o Hadadezer ai dodiawo o Siriaino. Oraha gënanga o Hadadezeroka de o Rezon wohi oara ai diri de watoomu hagala o nyawa daha wodadi o doomu yororuaë manga baluhu. Unanga de ainyawa yöiki o Damsyikika daha yogogere o kotaka gënanga. Dokengoka ainyawa iwi göraka ünanga wodadi o Siria ma koano.

²⁵Hokä o Hadad, ma Koano Rezonö wahaturu o Israeloka maöraha o Salomo woma ngangoika, de yaruaë o berera gënanga.

²⁶O nyawa mahomoa womatengo enagënanga ai pegawe ai römanga o Yerobeam wïlawani o Salomo. Unanga o Nebat ai ngohaka o Zereda nabereraino o Efraim madaeraoka. Ngoi ayo mo faooka, ami romanga ongo o Zerua.

²⁷Ma jarita nënanga madohanga mangale o Yerobeam ai lolawani. Maöraha ma Jou Ai Tau o koreharail̄e idaduoka magogiria yopohuku de o tonaka, deʼ o kota mabebeno o mehele ihi diai,

²⁸o Yerobeamö wo manarama genangoka. Maöraha o Salomo wi make o Yerobeam wopilipere womanarama deʼ iwi magawe, o Salomo wihidöaka unangika o manarama mangale wä goana yomanarama ipopakisa o Manasye deʼ o Efraim manga hoana madaeraoka.

²⁹O wange moiuku o Yerobeam wohupu o Yerusalemino. O ngekomo mahi dogoronaka o tonaka malua-luasoka wimake ma Nabi Ahia o Silo de waino wiädono ünanga, öraha gënanga womahi noauku o juba mahungi.

³⁰Daha o Ahia wahuputu ai juba, de wakä kakihi idadi o belaka ngimoi de hinoto.

³¹Ipaha ünanga witemo o Yerobeamika, ”Na l̄ë o belaka ngimoi mangale ani diri, hababu ma Jou, o Israeloka manga Jou Madutu, hoko nënanga wotemo ngonaika, ’Ngohi aha tal̄ë o pareta nënanga o Salomo oka, deʼ toni hidöaka o hoana ngimoi ngonaika.

³²O hoana moi aha kahirahi o Salomoka, mangale Ahi gilaongo o Daud, de mangale o Yerusalem, taö iri-irikoka o Israeloka manga berera i ngodumu idadi Ahi kota.

³³Ngohi aha ta diai o hali gënanga karana o Salomo wohi mal̄aka Ngohi de wahuba hagala o gomanga, enagënanga: Asyitoret o Sidon manyawa manga gikiri o ngoheka; o Kamos, o Maob manyawa manga gomanga; de o Milkom, o Amon manyawa manga gomanga. O Salomo wamotekua Ahi mau. Unanga hokä ai amaua o Daud wohi hingounu Ngohino de wadiai Ahi pareta-pareta.

³⁴Ngaro hoko gënanga Ngohi aha tal̄ëua o pareta gënanga mata-mata unangoka. Unanga aha Timal̄aika wokuaha ai wowango madekana magoronaka. O hali gënanga Tadiai mangale Ahi gilaongo o Daud, tiö iri-irikoka deʼ wohi ngounu Ahi titah deʼ Ahi pareta-pareta.

³⁵O pareta nënanga aha Ta l̄ë o Salomo aingohaka o nauroka de o hoana ngimoi aha Tohi döaka ngonaika.

³⁶Mä o hoana moi aha Tamal̄aika unangoka, hupaya Ahi gilaongo o Daud ai difauku naga womatengo salalu wopareta mangale Ngohi o Yerusalemoka, o kota Taö iri-irikoka hokä o puji Ngohino mangï.

³⁷De ngona, Yerobeam, aha Tonihidadi o Israeloka manga koano deʼ Tonihi gumal̄a napareta o daera ingodumu ngona nomö mau-mau.

³⁸Nako ngona, hokä Ahi gilaongo o Daud, nohi hingounu Ngohino itö totomo ikali nowango imamoteke Ahi hukumu, de nasanangi Ahi hininga deʼ nadiai mata-mata Tohipö pareta ngonaika, done Ngohi aha salalu Toni tomoteke. Ngohi aha tonihi dadi ngona nokoano o Israelokaka. Ngohi aha tätagongo ani difauku aha wodadi o Israeloka manga koano woni tagali ngona, hokä imatero Todiaioka mangale o Daud.

³⁹Karana o Salomo wobaradoha, Ngohi aha tähukumu o Daud ai difauku, mä mangale kahi ado-adonikaua.’ ”

⁴⁰Maöraha o abari nënanga ima hiädono o Salomoika, ünanga wohi dailako wïtoma o Yerobeam. Mä o Yerobeam woara ma Koano Sisakika o Mesiroka, de wogogere genangoka hiädono o Salomo wohonenge.

⁴¹Majarita mahomoa yakorona o Salomo, yakorona mata-mata wamomanaramoka de yakorona ai sawaro, o Salomo ai wowango majarita mabuku magoronaka itulihoka.

⁴²O Salomo wopareta o Yerusalemoka mangale o Israel yongodumu o taongo moruata madekana.

⁴³Ipaha ünanga wohonenge deʼ iwi lungunu o Daud ai kotaoka. Daha aingohaka o nauru o Rehabeam wodadi o koano witagali ünanga.