Read Tobelo O KOKOANO MADODIHIRAKA 12 Bible Online

O KOKOANO MADODIHIRAKA 12 - Tobelo bible

O KOKOANO MADODIHIRAKA 12

¹O Rehabeam wöiki o Sikhemika, karana o Israeloka makawaha yongodumu o koremieuku idaduoka ima toomu inoka dokengoka mangale iwi tede wodadi o koano.

²”Oraha gënanga o Yerobeam o Nebat aingohaka naga kao Mesir okahi, karana ma Koano Salomoka deʼ wohi oaroka ai diri. Maöraha ünanga woihene mangale o Rehabeam, ünanga wolio o Israeloka.

³O kawaha o koremieuku idaduoka iwi ahoko o Yerobeam, daha önanga ima komoteke dede ünanga yöiki iwi himanga o Rehabeam. Önanga yato,

⁴”Salomo ani ama Jou Koano womihi döakoka o momoku itotubuhu ngomino. O oraha nënanga nako Jou Koano nohi uwini de na kuranga tongomi mia hangihara, ngomi aha mima higilaongo Jou Koanoika.”

⁵O Rehabeam wohaluhu, ”Ngohi kiani toma pikiriohi. O wange hange ohi de nia inoli.” Daha yolio hagala o nyawa gënanga.

⁶Daha o Rehabeam wogahoko o nasihati o nyawa yobalu-baluhika mamoi iböto yodadi o Salomo o Rehabeam ai ama, iwinö nonasihati. ”Sarakia ngohi kiani täbaluhu hagala o nyawa gënanga?” o Rehabeam woleha, ”Okia tingini nia nasihati?”

⁷Onanga yohaluhu, ”Nako Jou Koano nagou-goungu noigo noma higilaongo o kawahaika, natarima toönanga manga gogahoko, done önanga aha ima higilaongo Jou Koanoika kahi ado-adonika.”

⁸Mä o nyawa yobö balu-baluhu gënanga manga nasihati o Rehabeam wolegaikaua. I idulu yaino, ünanga wöiki o nyawa yogö-göika, o gö-gö moi dede ünanga de öraha nënanga iwirö riwo-riwo ünanga.

⁹Onangika ünanga wäleha, ”Okia nia nasihati ngini ngohino, mangale täbaluhu o kawaha, yogahoko hupaya ngohi tohi uwini toönanga manga momoku?”

¹⁰Onanga yohaluhu, ”Hoko nënanga kokiani Jou Koano notemo onangika, ’Duru koahi moboleuku ngohi, ngohiohi iholoi tokuata ngaro de ahi ama!ʼ

¹¹Ahi ama wini hidöaka nginika o momoku itö tubuho, mä ngohi aha tinihi döaka iholoioli itubuho. Unanga wini gohara ngini de o boboha, mä ngohi aha tini gohara ngini de o boboha ma hihika o behi!”

¹²O wange hange ipaha o Yerobeam de o nyawa mata-mata gënanga iwi himangoli ma Koano Rehabeam hokä wahi poparetaka.

¹³Ima howono de hagala o nyawa gënanga manga nasihati, o kawaha yobö boa-boa unangika gënanga watemo de mabuturungu.

¹⁴Ima tero de o nyawa yogö gö manga nasihati, ünanga wato, ”Ahi ama winihidöaka nginika o momoku itö tubuho, maʼ ngohi aha tadiai o momoku gënanga iholoi itubuhooli. Unanga wini gohara ngini de o boboha, ma’ ngohi aha tinï gohara ngini de o boboha mahihika o behi.”

¹⁵O kawaha manga gogahoko wolegaikaua. Mä gënanga igoungu ma Jou Ai mau. Okia ma Jou wotö temo-temo ma Nabi Ahiaika o Siloino ima korona o Yerobeam o Nebat aingohaka kokiani idadi.

¹⁶ Maöraha o kawaha ya make ma koano wöluku wahi gihene önanga, önanga ima pöaka, ”Duru wohaduli de o Daud de ai difauku! Önanga komaiwahi yodiai okianaga mangale ngone. O Israeloka makawaha, niaino ngone holio! Mal̄aika o Rehabeam gënanga wohi dailako ai diri mahirete!” Daha o Israeloka makawaha yolio,

¹⁷deʼ o Rehabeam wo dadi o koano duga-duga o Yehuda madaeraoka.

¹⁸Ngaro hoko gënanga ma Koano Rehabeam kawi hulokohi o Adoniram, womatengo o manarama ipopakisa wohihö hae-haeke, wahi rïdi o kawaha. Ma önanga iwi kaweli ünanga de o helewo hiädono wohonenge. Wamake o hali gënanga o Rehabeam woma tai-taiti wodoa ai kuretail̄e, daha wohi oara ai diri o Yerusalemika.

¹⁹Mulaenge öraha gënanga o Israel mapareta makawaha o koremieuku i daduoka hoko genangika yälawani o kokoanoika o Daud aidifauku.

²⁰Maöraha o Israeloka makawaha yongodumu yoihene o Yerobeam wolioka o Mesir de waino, önanga iwi ahoko ünanga o doomu moika daha iwi goraka ünanga wodadi o Israeloka manga koano. Duga-duga o Yehuda aihöana makawahahi dika ka hirahi yosetia o Daud aidifaukuika.

²¹Maöraha ma Koano Rehabeam woma hiädono o Yerusalemoka, ünanga watoomu o tentara yaribuhu o ratuhu moi de yamori tufange maoa-oa o Yehuda de o Benyamin manga hoanino mangale yaparangi o Israel manyawa de wohigilio ai kuaha hokä mahirali mangale o Israeloka manga hoana-hoana o koremieuku idaduoka.

²²Mä ma Jou Madutu wï huloko ma Nabi Semaya,

²³wo hiädono o abari nënanga o Rehabeamika, deʼ o Yehuda deʼ o Benyamin manga hoanika yongodumu,

²⁴”Uha nia parangi nia roriadodoto o Israeloka manyawa. Ni lio! Okia idö dädadioka nagala Ahi mau.” Daha önanga mata-mata yamöteke ma Jou Ai pareta, daha yolio manga tauika moi-moi.

²⁵Wodadi iböto o Israeloka manga koano, o Yerobeam wakuata o Sikhem makota o Efraim madaera de ma l̄oku ma tuturungoka, daha mangale wogogere öraha utu dokengoka. Ipaha, genangino ünanga woikoli de wakuata o Pnuel makota.

²⁶Unanga woma pikiri ai hininga magoronaka hoko nënanga, ”Nako o kawaha kahirahi yöiki o Yerusalemika mangale ihihuba o huhuba ma Jou Ai Tauoka hokä önanga yadodiai öraha nënanga, önanga aha iwi hiboaoli o Rehabeam, o Yehuda manga koano, daha ihi toma ngohi.”

²⁸ Watiba-tibanga o hali gënanga ibötino, ünanga wodiai o hapi o gurasi ma dulada hinoto daha wätemo o kawahaika, ”Israel manyawa! Il̄aoaka ma dëkana ngini nioi-oiki o Yerusalemika mangale ni puji. Oraha nënanga, nënanga nia gikiri ini aooka ngini o Mesiroka de nihupu!”

²⁹Daha o Yerobeam wohi gogere o hapi o gurasi gënanga o Beteloka de mahomoa o Dan oka.

³⁰Daha o kawahaö yodiai o baradoha, karana önanga yöiki o Betelika de o Dan ika mangale yopuji.

³¹O Yerobeam wohi goko ö o puji mangï-mangï mahomoa o l̄oku matubu-tubuoka, de ünanga wä goraka o imam-imam o Lewi ai hoanua manga tau manyawa mahi dogoronaka.

³²Ipaha o Yerobeam wahi gogere o imam-imam gënanga o Beteloka mangale yomanarama dokengoka de ünanga mahirete wohi huba o huhuba o hapi-o hapi o gurasi wa dö dodiaioka gënanga. Daha ünanga wahi tantu o mede matufange mawange ngimoi de motoa hokä o wange ma ago-agomo mangale o Israeloka, hokä ima tero o wange ma ago-agomo o Yehudaoka. O wange gënanga o Yerobeam wöiki o Betelika de wohihuba o huhuba mangale wo hilamoko o wange ma ago-agomo wohitä tantuoka gënanga.