Read Tobelo O KOKOANO MADODIHIRAKA 13 Bible Online

O KOKOANO MADODIHIRAKA 13 - Tobelo bible

O KOKOANO MADODIHIRAKA 13

¹Öraha gënanga naga womatengo o Nabi o Yehudaka. Ma Jou wïhuloko ünanga mangale wöiki o Betelika. Ma Nabi gënanga woma hiädono dokengoka, maöraha o Yerobeam magogiria woma okoino o huhuba mangï mahimangoka mangale wohihuba o huhuba.

²De ma Jou Ai pareta o nabi gënanga wo boaka o huhuba ma ngïka gënanga, ”Hei huhuba mangï, hei huhuba mangï! Hoko nënanga ma Jou wotemo, ’O ngohaka womatengo aha wokil̄au o Daud ai tau magoronaka aha iwi hiromanga o Yosia. Hei huhuba mangï, ani l̄okuoka, ünanga aha wätoma o imam-imam yomö manarama o puji o gomangika mangïoka, de ihi hubaokaoli o huhuba ani l̄okuoka. De ani l̄okuokaoli ünanga waharongo o nyawa manga kobo-kobongo.’ ”

³Ma nabi gënanga wotemo wohi gila-gila, ”O huhuba mangï nënanga aha ikilianga, de makafo mal̄okuoka aha ikopoa. Genangala manyonyata ma Jou wohi huloko ngohi.”

⁴Maöraha o Yerobeam woihene o demo-demo gënanga, ünanga witumutu manabiika gënanga daha woma pöaka, ”Niwi tagoko o nyawa gënanga!” Mä o Yerobeam ai giama gila-gila i tirihoka hiädono ünanga wakunokaua watauru wohi gilio.

⁵Itodokanino o huhuba mangï gënanga ikilianga de o kafo ma l̄okuoka gënanga ikopoa o tonakuku, hokä ma nabi wohidö demo-demoka gënanga mangale ma Jou Ai pareta.

⁶Daha ma Koano Yerobeam witemo manabiika gënanga, ”Nohï riwo nomä niata ma Jouika ani Jou Madutu mangale ngohi. Nogähoko Ai hayanga de Ai dora mangale wohitogumu ahi giama!” Ma nabi gënanga womä niata ma Jouika, daha ma koano ai giama itogumu.

⁷Ipaha ma koano witemo ma nabiika gënanga, ”Naino nol̄omo ahi tauoka. Ngohi tomau toni hidöaka o hadia ngonaika.”

⁸Ma nabi gënanga wohaluhu, ”Ngaroka Jou Koano nohi hidöaka ngohi Jou Koano ani kaya mahononga, ngohi aha toikua mangale tol̄omo ekola tokere de Jou Koano.

⁹Ngohi tamake o pareta ma Jouino mangale tol̄omua de tokerua, de tolio tanïkua o ngekomo maöraha toboa de ngohi tanö nononu.”

¹⁰Hoko genangala manabi gënanga wöiki wanonu o ngekomo mahomoa.

¹¹O Oraha gënanga naga o nabi womatengo iwi popereki wo gogere o Beteloka. Ai ngoha-ngohaka iwi hingahu unangika mangale o nabi o Yehudaino gënanga. Önanga ihi ade-ade mangale okia wadodiai o Beteloka o wange gënanga, de okia wotö temo-temo ma koano Yerobeamika.

¹²Daha manabi iwi popereki gënanga wäleha, ”Ma nabi o Yehudaino gënanga maöraha ünanga wolio, wanonu o ngekomo kiaika?” Daha önanga iwi hidumutu o ngekomo gënanga unangika.

¹³Daha ünanga wähuloko önanga ihi noa magogogere ai keledaika. Iböto gënanga ünanga wodoa ai keledai il̄e de womä jobo,

¹⁴winïki manabi o Yehudaino gënanga. Unanga wimakeika manabi gënanga magogiria wogogereuku o gota moi mapako-pako matimiuku. ”Boteka ngona manabi o Yehudaino gënanga?” manabi iwi popereki gënanga woleha. ”Itiai,” o nyawa gënanga wohaluhu.

¹⁵”Naino nol̄omo tongohi ahi tauoka,” manabi iwi popereki gënanga wato.

¹⁶Mä manabi o Yehudaino gënanga wohaluhu, ”Uha nohi ngamo! Ngohi takunua tatarima ani gogahoko Bapa mangale toni nïki ani tauika Bapa. Ngohiö aha tol̄omua ekola tokerua nenangokadau de ngona Bapa.

¹⁷Ma Jou wohihiparetaka ngohi mangale tol̄omua ekola tokerua de tolio tanïkua o ngekomo kagënanga maöraha toboa de tanö nononu.”

¹⁸Daha manabi iwi popereki o Betelino gënanga wieluku unangika, de witemo, ”Ngohiö o nabi hokä ngona. Mangale ma Jouö Ai pareta o malaekat womatengo wohi hulokoka ngohi toni ahoko de toni hidiai ngona tongohi ahi tauoka.”

¹⁹Daha manabi o Yehudaino gënanga winïki manabi iwi popereki gënanga ai tauika de wol̄omo dede ünanga.

²⁰Maöraha önanga yogogeruku yol̄omo, ma Jou witemo ma nabi iwi poperekika gënanga,

²¹hiädono ünanga witemo ma nabi o Yehudaino gënanga, wato, ”Ma Jou wotemo Ngona nihi ngounua Unangika. Ngona na diaiua okia wonihi poparetaka Ngonaika.

²²Ngona noma iduloka nol̄omo de nokere, ena hioko Ngona wonï duhunoka mangale nadiai o hali gënanga. Karana gënanga ngona aha ini toma, de tongona ani mayeti aha yalungunua tongona ani tau manyawa manga lungunoka.”

²³Onanga yol̄omo ibötoka, manabi iwi popereki gënanga wohinoa magogogere ma nabi o Yehudaino ai keledail̄e gënanga,

²⁴daha woma jobo ma nabi gënanga. O ngekomo mahi dogoronaka ünanga iwi horokumu o dutu moi o singa, daha wo honenge iwi goli. Ipaha ai mayeti irubaiha o ngekomoka, de ai keledai ima okoino ai datekoka. O singaö gënanga ima okoino genangoka.

²⁵Hagala o nyawa yakokaino, yamake o mayeti de o singa gënanga genangokadau. Daha önanga yöiki o Betelika de ihi ngahu okia önanga yamö make-make.

²⁶Maöraha ma nabi iwi popereki gënanga woihene mangale o hali gënanga, ünanga wato, ”Maraioka gënanga ma nabi wohingö ngou-ngounua ma Jou Ai paretaika! Genanga mahababu ma Jou wohi dingoto o singa gënanga mangale iwi goli de iwi toma ünanga hokä kowahi de ma Jou woto temo-temoka.”

²⁷Daha ma nabi iwi popereki watemo ai ngoha-ngohakika, ”Nihi noa magogogere tongohi ahi keledaiika.” Ai keledai mal̄okuoka wodoail̄eoka, unangö woma jobo.

²⁸Unanga wamakeika manabi o Yehudaino gënanga ai mayeti kai kelengaukuohi o ngekomoka de o keledai de o singa ma datekoka. O singa gënanga yagoliua o keledai gënanga de ya öl̄omuaö o mayeti gënanga.

²⁹Unanga wagoraka o mayeti gënanga de wakelenga ai keledai mal̄okuoka, daha wao wohigilio o Betelika mangale wo dodora de wajere.

³⁰Ma nabi iwi popereki gënanga mahirete walungunu o mayeti gënanga ai tau manyawa manga jereoka, daha ünanga de aingoha-ngohaka yödodora o mayeti gënanga. Önanga yato, ”Hioko ngona, ahi riadodoto, hioko!”

³¹Ipaha manabi iwi popereki gënanga watemo aingoha-ngohakika, ”Nako ngohi tohonenge, nihi lungunu ngohi o lungunoka nënanga ma nabi gënanga ai datekuku.

³²Okia wohidö demo-demoka de ma Jou Ai tita o huhuba mangï ika o Beteloka gënanga de mata-mata o puji mangï ika o Samaria ma kota-kotaoka maraioka aha idadi.”

³³Ma Koano Yerobeam kahirahi woluku wamal̄a ai manarama itotorou. Mangale wohidailako hagala o puji mangï wohigö goko-gokoka gënanga, ünanga hoko genangika dika wä ïriki o imam o tau manyawa biaha. O nagona dika yömau, wä goraka yodadi o imam.

³⁴Ai manarama itotorou gënanga idadi hababu ai gutiuku yobodito de yomorutu kama moiuku.