Read Tobelo O KOKOANO MADODIHIRAKA 14 Bible Online

O KOKOANO MADODIHIRAKA 14 - Tobelo bible

O KOKOANO MADODIHIRAKA 14

¹O öraha gënanga o Yerobeam aingohaka o nauru ai romanga o Abia wopanyake.

²O Yerobeam womitemo ngoi hekatika, ”Noma hidiai la nöiki o Siloika ma Nabi Ahia ai tauika mahira wotö temo-temo ngohi aha todadi o Israeloka manga koano. Mä noma halere la o nyawa ini nakoua ngona o nagona.

³Nigao mangale ünanga o roti ngimoi, o kukisi utu de o ohungu ma gula o boto moi. Nileha unangika okia aha idadi de o Abia, tongone nanga ngohaka. Ma nabi gënanga aha woni hingahu ngonaika.”

⁴Daha o Yerobeam ngoi hekata möiki ma Nabi Ahia ai tauika o Siloka. Ma nabi gënanga womahi orikokaua karana ünanga duru iwi perekioka.

⁵Mä ma Jou wihingahu unangika o Yerobeam ngoi hekata ge ngino naga moboa, la moni leha mangale ami ngohaka wo popanyake. De ma Jou wihi ngahuö ma Nabi Ahiaika damä okia kiani wotemo. Maöraha o Yerobeam ngoi hekata moma hiädono dokengoka, munanga momadiai matero-tero munanga o nyawa mahomoa.

⁶Mä hoko gënanga ma Nabi Ahia woihene ami aguru madihihiri o ngoranoka, ünanga womi temo, ”Nowohamino, ngohi tohi öriki ngona o Yerobeam ngoi hekata. Ngaro uha noma dodiai. Naga o abari madorou mangale ngona.

⁷Nolio de nihi ngahu o Yerobeamika nenangala ma Jou wotemo o Israeloka manga Jou Madutu, ’Ngona toni irikoka o kawaha manga hidogoronaino de tonihidadi Ahi umati o Israeloka nakuaha.

⁸Ngona tonihi döakoka o pareta Tal̄ö l̄ë l̄ëoka o Daud aingohaka de ai danongino. Mä ngona hokä Ahi gilaongua o Daud. Unanga i goungu wo setia Ngohiino de wo hi ngounu Ahi titaika. Unanga wadiai duga-duga Toö igo-igo.

⁹Mä ngona nodiai o dorou iholoi ilamoko ngaro de önanga yadodiai de yopareta kowahiohi de ngona. Ngona nohi mal̄aka Ngohi de namomiki Ahi gangamo de nodiai o gomanga ikali o dulada-dulada o tabaga mangale nahuba.

¹⁰ Karana gënanga Ngohi aha todotagao o bodito ani tau ma nyawauku. Mata-mata ani difauku o nau-nauru, okia dika manga pangkati, aha Tä toma. Ngohi aha Tahohihanga ani tau manyawa hokä imatero o nyawa yahehara o peseke yatebi-tebinoka.

¹¹Ani tau madol̄a manyawa yohö hone-honenge o kotaoka aha o kaho yä ol̄omo, de yohö hone-honenge o kota maporetoka aha o totaleo yäol̄omo. Nohininga, Ngohi ma Jou totö temo-temo!ʼ ”

¹²Wohi gila-gila ma Nabi Ahia wotemo o Yerobeam ngoi hekatika, ”Aa, öraha nënanga nolio! Maöraha ngona nongohama o kota, ani ngohaka gënanga aha wohonenge.

¹³O Israeloka makawaha yongodumu aha imahipake o duka ma nonako de iwi lungunu. Unanga genangö womatengo o Yerobeam ai tau madol̄a manyawa aha iwi lungunu de mahoromati, hababu duga-duga ünanga ma Jou, o Israeloka manga Jou Madutu Ai hininga yadaene.

¹⁴Ma Jou aha wahidöaka o Israeloka o koano womatengo aha wohi bobaha o Yerobeam ai difauku manga pangkati hokä o koano. Mawange iboaka! Mulaenge öraha nënanga.

¹⁵Ma Jou aha wä hukumu o Israeloka hiädono yogiwi-giwi hokä o totuhuro o akere magoronaka. Ma Jou aha warahuku o Israeloka makawaha o berera yaö oa-oa ino nënanga wahi dö doa-doakoka toönanga manga ete de manga tohoraika. Unanga aha wahi kokitingakoka önanga o Efrat ma Ngairi mahonongaika, karana önanga yamomikoka Ai gangamo de yodiai o gikiri o Asyera madulada-dulada.

¹⁶Ma Jou aha wamal̄a o Israeloka karana o Yerobeam wobaradohaoka de wodadi o hababu o Israelokao manyawa yobaradoha dika.”

¹⁷I böto gënanga o Yerobeam ngoi hekata molio o Tirzaika. Maöraha munanga mowohama ami tauika, ami ngohaka wohonenge.

¹⁸O Israeloka makawaha imahipake o duka manonako daha iwi lungunu hokä ma Jou wotemoka Ai gilaongika, ma Nabi Ahia.

¹⁹Ma jarita mahomoa ima korona ma Koano Yerobeam, enagënanga aipareta, de watö tuda-tuda o parangi, itulihoka o Israeloka manga Kokoano manga Jarita ma Buku magoronaka.

²⁰O taongo monaoko de hinoto madekana o Yerobeam wopareta hokä o koano, ipaha ünanga wohonenge de iwi lungunu. Aingohaka ai romanga o Nadab witagi ünanga hokä o koano.

²¹Maöraha o Rehabeam, o Salomo aingohaka, wodadi o Yehuda manga koano, ünanga ai umuru o taongo moruata de moi. Unanga wopareta o taongo ngimoi de tumidi madekana, o Yerusalemoka. O Israelokaino yongodumu o kota gënanga yatingakoka mangale ma Jou hokä o puji mangï Unangika. O Rehabeam ngoi ayo enagënanga o ngo Naama o Amonino manyawa.

²²O Yehuda manyawa yodiai o dorou ma Jou Ai lolegaka. Toönanga manga manarama iholoi yamomiki ma Jou Ai gangamo ngaro de hagala manga manarama toönanga manga ete deʼ manga tohora.

²³ O doporono-doporono mal̄okuoka deʼ o gota-o gota ma ago-agomo matimiuku, önanga ihi goko o gomangika yahuba-huba mangï, de ihi goko o tugu-o tugu ikali o dewi Asyera ma dulada-dulada mangale yahuba.

²⁴ O ngï-o ngïoka gënanga önanga yodiai o dorou hokä ya huba o gikirika. I goungu o nau-naurö yo manarama hokä o huhutu ya nï nïki. O Yehuda manyawa ya diai mata-mata o manarama i pese-peseke ya dodiai o höana de o berera ma Jou wa dö duhu-duhuoka maöraha o Israeloka manyawa yö ngohama o berera gënanga.

²⁵ O Rehabeam aipareta o taongo ma motoaka, o Sisak, o Mesir ma koano wa parangi o Yerusalem.

²⁶ Unanga wa ora mata-mata okia honanga de ma ija-ijaka naga ma Jou Ai Tauoka de ma koano ai kadatoka, o dadatoko-o dadatoko ö gurasi o Salomo wa dö dodiai.

²⁷Daha hokä ma dagali ma Koano Rehabeam wadiai o dadatoko-o dadatoko o tabaga, de wa higögoana aitentara manga balu-baluhika yo gö goa-goana ma koano ai kadato ma ngorana ma amo-amoko.

²⁸Ma hi geto-getongo ma koano wöiki ma Jou Ai Tauika, yo gö goa-goana yao o dadatoko-o dadatoko gënanga, ipaha ihigilio ma kamari yo goa-goanika.

²⁹Majarita mahomoa yakorona Makoano Rehabeam itulihoka o Yehuda makokoano manga sejarah ma buku magoronaka.

³⁰Maöraha o Rehabeam woparangi salalu naga o parangi Rehabeam de o Yerobeam manga hidogoronaka.

³¹Ipaha Rehabeam wohonenge de iwi lungunu o kokoano manga jereoka o Daud ai kotaka. O Abiam, aingohaka o nauru, witagali ünanga hokä o koano.