Read Tobelo O KOKOANO MADODIHIRAKA 15 Bible Online

O KOKOANO MADODIHIRAKA 15 - Tobelo bible

O KOKOANO MADODIHIRAKA 15

¹Ma Koano Yerobeam wä pareta mangale o Israeloka mataongo ngimoi de tufangeoka, o Abiam wodadi o Yehuda manga koano,

²de wopareta o taongo hangeino madekana o Yerusalemoka. Ngoi ayo ganga o ngo Maakha, o Abisalom ngoi ora.

³O Abiam wodiai o baradoha-baradoha hokä ai ama. Unanga ai hininga magahumua wosetia ma Jouika ai Jou Madutu, ima howono de o Daud, ai ete de ai tohora.

⁴ Mä, de ma Koano Daud, daha ma Jou, ma Jou Madutu o Daud wihö huba-huba, wihi döakoka o Abiamika o ngohaka womatengo mangale witagali ünanga wopareta o Yerusalemoka de wogoana o kota gënanga.

⁵ Ma Jou wodiai o hali gënanga hababu o Daud wasanangioka Ai hininga. O Daud komaiwahi la wamotekua ma Jou Ai tita ai tita, sowaliua o Uria o Het manyawa gënanga ai perekara magoronaka.

⁶ O parangi o Rehabeam de o Yerobeam manga hidogoronaka imulaenge maöraha o Rehabeam kawohi gila-gilahi o Abiam aipareta madekana.

⁷Ma jarita mahomoa ima korona o Abiam itulihoka o Yehuda manga kokoano manga sejarah ma buku magoronaka.

⁸O Abiamö wohonenge de iwi lungunu o Daud ai kotaoka. Aingohaka o Asa wodadi o koano witagali ünanga.

⁹Ma Koano Yerobeam wäpareta o Israeloka mataongo monaokoka, o Asa wodadi o Yehuda manga koano.

¹⁰Unanga wopareta o taongo moruata de moi madekana o Yerusalemoka. Ngoi el̄e enagënanga o ngo Maakha, o Abisalom ngoi ora.

¹¹O Asa wasanangi ma Jou Ai hininga, hokä o Daud, ai ete de ai tohora.

¹² Mata-mata yododiai o dorou yomo manarama o gikirika yahö huba-huba mangïoka wahi rehenoka, de mata-mata o gomanga ihigö goko-goko o kokoano kowahi de ünanga wopareta wahohihangoka o berera ingodumu.

¹³Ngoi el̄e, o ngo Maakha, womihiguti ami pangkati hokä ma koano ngoi ayo, hababu munanga modiaioka o gomanga idodiai o dorou madulada mangale o Asyera, o gikiri o ngoheka ibö boburere. O Asa warubaka o gomanga gënanga de watuhuku o Kidron ma Waioka.

¹⁴Ngaro mata-mataua o Asa wawedere o gomanga yahuba-huba mangï, ma’ ünanga kahirahi wosetia ma Jouika ai wowango magurutu.

¹⁵Mata-mata o gurasi de o haaka ai ama wohihö huba-hubaoka ma Jouika, wao ma Jou Ai Tauika, hoko genangö o gurasi de o haaka, ai huhuba mahirete.

¹⁶Maöraha manga pareta ma Koano Asa o Yehudaino de ma Koano Baesa o Israelino salalu naga o parangi o koano yahinoto gënanga manga hidogoronaka.

¹⁷O Baesa wä parangi o Yehuda de wakuata o Rama makota mangale watatoko o Yehuda manga ngekomo yohupu yowohama.

¹⁸Karana gënanga ma Koano Asa wal̄ë mata-mata o gurasi de o haaka kanagaohi ma Jou Ai Tauoka deʼ ma Koano ai kadatoka daha wohi dingoto o Damsyikika o Benhadadika ma koano Siria, o Tabrimon aingohaka, enagënanga o Hezion ai danongo. Okia honanga gënanga wohi dingoto deʼ yao o pegawe o kadatoka ya muruono naga, de wohi kinïki o behehongo hoko nënanga,

¹⁹”Naino tongone nanga dodiawo hohi kekete hokä yadö diaioka tongone nanga dimono. Ima nïki nënanga ngohi tohi dingoto o gurasi deʼ o haaka hokä o hadia, deʼ tonihigaro tuanga natoaka ai dodohanga de o Baesa o Israeloka manga koano, hupaya ünanga wahigilio aitentara manga duduono tongohi ahi daeraoka.”

²⁰O Benhadad worimoi de o gogahoko gënanga daha wähuloko aitentara manga balu-baluhu ima kinïki toönanga manga duduono yaparangi o Israeloka manga kota-kota. ”Onanga ya hohihangoka o Iyon, o Dan, o Abel-Bet-Maakha de o Kinerot itigika de o Galilea ma Taaga ikali o Naftali madaera ingodumu.

²¹Maöraha o Baesa woihene o hali gënanga, ünanga woma togumu wakuata o Rama. Unanga wöiki o Tirzaika de mangale itai-itaitino woparangiokaua.

²²Iböto gënanga, mata-mata o nyawa o Yehudaoka ingodumu moiua yätio, ma Koano Asa wapareta mangale yotoraka o helewo deʼ o gota o Baesa wapö pake-pake o Ramaoka mangale wakuata o kota gënanga. O pakakaha gënanga o Asa wapake mangale wakuata o Mizpa de o Gibea makota, moi o kota o Benyamin madaeraoka.

²³Majarita mahomoa yakorona ma Koano Asa, enagënanga ai nauru deʼ ai barani de o kota-o kota wakö kua-kuata, i tulihoka o Yehuda manga Kokoano manga sejarah mabuku magoronaka. Maöraha iwi perekioka ai l̄ouika hinoto yadaene o panyake.

²⁴Unanga wohonenge de iwi lungunu o kokoano manga jereoka o Daud ai kotaoka. O Yosafat, aingohaka o nauru wodadi o koano witagali ünanga.

²⁵O taongo mahinotoka ma Koano Asa wäpareta mangale o Yehuda, o Yerobeam aingohaka o Nadab, wodadi o koano o Israelokaka de wopareta o taongo hinoto madekana.

²⁶Hokä ai ama wopareta kowahi de ünanga, unangö wodiai itotorou ma Jou Ai lolegaka hiädono idadi hababu o Israeloka manyawa yodiai o baradoha.

²⁷O Baesa, o Ahia aingohaka, o Isakhar ai hoanino, ima toomu iwi lawani o Nadab, daha iwi toma ünanga. Maöraha gënanga o Nadab de ai duduono ma gogiria ihi giloliti o Gibeton makota o Filistin madaeraoka.

²⁸Genanga idadi ma Koano Asa aipareta o Yehudaokaika o taongo hange magoronaka. Hoko gënanga o Baesa wodadi o Israeloka manga koano witagali o Nadab.

²⁹ De majapatioka o Baesa wodadi o koano, ünanga wätoma o Yerobeam ai tau manyawa yongodumu. Imamoteke de okia ma Jou wotemo-temoka Ai gilaongika, ma Nabi Ahia o Siloino, daha o Yerobeam ai tau manyawa yongodumu yätoma, komoiuaö yootana.

³⁰O Yerobeam wobaradoha de idadi o hababu o Israelokaö yobaradoha. De hoko gënanga o Yerobeam wamomiki ma Jou Ai dohata, ma Jou Madutu o Israeloka manyawa iwihö huba-huba.

³¹Ma Jarita mahomoa ima korona o Nadab, itulihoka o Israeloka manga Kokoano manga sejarah mabuku magoronaka.

³²Maöraha madekana ma Koano Baesa o Israeloka wapareta, o parangi salalu idadi o Baesa deʼ ma Koano Asa o Yehudaino manga hidogoronaka.

³³O taongo mahangeoka ma Koano Asa wäpareta o Yehudaoka, o Baesa o Ahia aingohaka wodadi o koano o Israeloka yongodumu. Unanga wopareta o Tirza makotaoka o taongo monaoko de iata madekana.

³⁴Hokä ma Koano Yerobeam wopareta kowahi de ünanga, ma Koano Baesaö wobaradoha ma Jouika de idadi hababu o Israel ma nyawaö yodiai o baradoha.