Read Tobelo O KOKOANO MADODIHIRAKA 16 Bible Online

O KOKOANO MADODIHIRAKA 16 - Tobelo bible

O KOKOANO MADODIHIRAKA 16

¹Daha ma Jou witemo ma Nabi Yehuika o Hanani aingohaka, wato, ”Nohiädono Ahi behehongo nënanga o Baesaika,

²’Mahira ngona okia-kiaua, maʼ ngona Toni gorakoka nodadi o tutuda mangale Ahi umati o Israeloka. ”Oraha nënanga ngona nobaradoha hokä o Yerobeam de idadi o hababu Ahi umati o Israeloka yobaradoha, hiädono namomiki Ahi dohata.

³Karana gënanga Ngohi aha toni hohihanga ngona de ani tau manyawa hokä imatero Tadodiaioka o Yerobeamika.

⁴Ani tau madol̄a manyawa yohonenge o kotaoka aha yä ol̄omo o kaho, de önanga yohonenge o kota maporetoka aha yäol̄omo o totaleo.’ ”

⁵Ma Jou Ai behehongo o Baesaika de ai tau manyawa gënanga wohiädono ma Nabi Yehu karana o Baesa wodiaioka itotorou ma Jou Ai lolegaka, o Baesa wamomiki ma Jou Ai dohata, koigoungua duga-duga karana ünanga wätomaka o Yerobeam ai tau manyawa yongodumu. Ma jarita mahomoa yakorona o Baesa, idogoika ai nauru de ai barani itulihoka o Israeloka manga Kokoano manga Sejarah ma Buku magoronaka. O Baesa wohonenge daha iwi jere o Tirza ma kotaoka. O Ela, aingohaka o nauru witagali ünanga wodadi o koano.

⁸O taongo monaoko de mabutangaoka ma Koano Asa wapareta o Yehuda o Ela o Baesa aingohaka wodadi o Israeloka manga koano. Unanga wopareta o Tirza makotaoka o taongo hinoto madekana.

⁹O Zimri, o tentara manga baluhu womatengo wahibaluhu yokokureta manga duduonino mahononga, ima toomu iwi lawani o Ela, o wange moiuku o Tirza makotaoka, o Arza ai tauoka o Ela wokere hiädono iwi daluku, ma koano ai kadatoka manga tau manyawa manga baluhu.

¹⁰Daha o Zimri wowohama de wïtoma o Ela, ipaha wodadi o koano witagali o Ela. Gënanga idadi mataongo monaoko de tumidoka ma Koano Asa wapareta o Yehuda.

¹¹De majapati o Zimri wodadi koano ibötino, ünanga wätoma ma Koano Baesa ai tau manyawa yongodumu. Igoungu o Baesa ai roriadodoto o nonau-nauru mata-mata ikali ai dodiawo manga tau ma nyawaö koiwa yaotana.

¹²Ima daene de okia ma Jou wotemoka o Baesaika itilakuru ma Nabi Yehu, o Baesa ai tau manyawa yongodumu yätoma.

¹³O Baesa de o Ela, aingohaka, yahuba o gikiri de idadi hababu o Israeloka manyawa yodiai o baradoha. Karana gënanga, ”Onanga yamomiki ma Jou Ai dohata, ma Jou Madutu kokiani o Israeloka manyawa iwi huba.

¹⁴Majarita mahomoa ima korona o Ela, itulihoka o Israeloka manga Kokoano manga Sejarah manga Buku magoronaka.

¹⁵Ma taongo monaoko de tumidoka ma Koano Asa wapareta o Yehuda, o Zimri wodadi o Israeloka manga koano de wopareta o Tirza makotaoka o wange tumidi ma dekana. Öraha gënanga o Israeloka manga tentara magogiria ihi giloliti o Gibeton, o Filistin manyawa manga kota.

¹⁶Maöraha önanga yoihene o Zimri watoomuoka iwi lawani ma koano de watomaka, o wange gënanga dika toönanga manga tauoka gënanga, önanga mata-mata iwi goraka o Omri, toönanga manga kapita, hokä o Israeloka manga koano.

¹⁷Ipaha o Omri de ai duduono yamal̄a o Gibeton daha yöiki ihigiloliti o Tirza.

¹⁸Maöraha o Zimri wamake o kota gënanga yaoraoka, ünanga wowohama o kadato magoronaika de watuhuku o kadato gënanga wohi kinïki de ai diri, daha ünanga wohonenge.

¹⁹Genanga idadi karana ünanga wadiai itotorou ma Jou Ai lolegaka. Hokä ima tero ma Koano Yerobeam, o Zimri ö wobaradoha ma Jouika de idadi hababu o Israel manyawa ö yobaradoha.

²⁰Ma jarita mahomoa yakorona o Zimri, idogoika o doomu wosetiaokaua wohidö dato-datoro, itulihoka o Israeloka manga Kokoano manga Sejarah ma Buku magoronaka.

²¹Idadi o gitingaka o Israel manyawa manga hidogoronaka, karana naga yomau hupaya o Tibni o Ginat aingohaka wodadi o koano, maʼ naga ö yomau o Omri wodadi o koano.

²²Ma baha önanga iwi hibö boa-boa o Omriika youtumu. O Tibni wohonenge de o Omri wodadi o koano.

²³Genanga idadi mataongo moruange de moioka ma Koano Asa wapareta o Yehuda. O Omri wapareta o Israeloka hokä o koano o taongo ngimoi de hinoto madekana. O taongo butangaino madekana madodihiraka, ünanga wopareta o Tirzaoka.

²⁴Mä ipaha ünanga woija moi ol̄oku woma tengoika, ai romanga o Semer, ma ija o 6.000 o tiwi o haaka. Daha ünanga wohi goko moi o kota ol̄okuoka gënanga de wohi romanga o Samaria, imamöteke ai romanga o Semer, ol̄oku gënanga madutu wohö hira-hira.

²⁵O Omri wadiai o baradoha iholoi ilamoko ngaro de o kokoano yadodiai, yopareta kowahi de ünanga.

²⁶Hokä o Yerobeam, o Omri wobaradoha ikali idadi hababu o Israel ma nyawaö yobaradoha de yahuba o gikiri. Hababu karana gënanga önanga yamomiki ma Jou Ai dohata, ma Jou Madutu o Israeloka manyawa kokiani iwihö huba-huba.

²⁷Ma Jarita mahomoa ima korona ma Koano Omri, de mata-mata wadodiaioka itulihoka o Israeloka manga Kokoano manga Sejarah ma Buku magoronaka.

²⁸O Omri wohonenge de iwi lungunu o Samariaoka ibötino, aingohaka o Ahab wodadi o koano witagali ünanga.

²⁹Ma taongo moruange de tufangeoka ma Koano Asa wapareta o Yehuda, o Omri aingohaka o Ahab wodadi o Israeloka manga koano de wopareta o Samariaka o taongo monaoko de hinoto madekana.

³⁰Unanga wodiai o baradoha iholoi ilamoko ma Jou Ai lolegaka ngaro de o kokoano kowahi de ünanga.

³¹Unangika iwi wedonuahi dika wowango de o baradoha hokä ma Koano Yerobeam, ünanga koaholi womi kawingi o ngo Izebel ma Koano Etbaal ngoi ora o Sidonino, de ünanga wapuji o Baalika.

³²Unanga wohi goko o puji matau o Samariaoka mangale o Baal, de o puji matau magoronaka gënanga ünanga wodiai moi o huba mangï mangale o gikiri gënanga.

³³Unanga wodiaiö o Dewi Asyera madulada. Unanga wodiai iholoi iwoë o baradoha ngaro yadodiai o Israeloka manga kokoano mata-mata yopareta kowahi de ünanga. Karana gënanga ünanga wa momiki ma Jou Ai dohata, ma Jou Madutu o Israeloka manyawa kokiani iwihö huba-huba.

³⁴ O Ahab aipareta maöraha magoronaka, o Yerikho makota wohi gokookali o Hiel o Betel manyawa. Mä kowahi de gënanga hokä ma Jou wotemoka tilakuru o Yosua o Nun aingohaka. O Hiel aingohaka yahinoto yohihanga: Mariaka o Abiram wohonenge ma öraha o Hiel wogelenga o kota mahohol̄e, de madodoto ma kiditoko o Segub wohonenge maöraha o Hiel wohi goko o kota ma ngorana ma amo-amoko gënanga.