Read Tobelo O KOKOANO MADODIHIRAKA 17 Bible Online

O KOKOANO MADODIHIRAKA 17 - Tobelo bible

O KOKOANO MADODIHIRAKA 17

¹ Naga womatengo o nabi ai romanga o Elia. Unanga ai ahali o Tisbeino, moi o kota o Gilead madaeraoka. O wange moiuku ünanga waika ma Koano Ahabika de witemo, ”De ma Jou wowango-wango, ma Jou Madutu iwihö huba-huba o Israeloka manyawa de ngohi tilö leleani, ngohi tonihi ngahu ngonaika Tuanga o taongo hinoto ekola hange yaino-ino nënanga, aha koiwa naga o dumunitara ekola o awana mahuhutulö, sowaliua nako ngohi totemo.”

²Iböto gënanga ma Jou witemo o Eliaika,

³”Na mal̄a o ngï nënanga, nöiki o wange mahiwaroko o Yordan ma Ngairi mahonongaika de noma ngiunika dokengoka o Kerit ma Ngairi maiti madatekoka.

⁴Ngona yakunu naokere o akere o ngairi maitino gënanga, de o totaleo o wogono aha Tahuloko ini gao o inomo mangale ngona.”

⁵O Elia wamoteke ma Jou Ai pareta gënanga, deʼ woiki o Kerit ma Ngairi maitika daha wogogere genangoka.

⁶Unanga wokere o ngairi maitino gënanga, de wol̄omo o roti de o hiode ma akeme yaö ao-ao o totaleo o wogono o ngorumino deʼ o bimaoa magetongo.

⁷”Oraha muruono naga madekana ipaha, o ngairi maitiö gënanga iowaha karana iawanua.

⁸Ipaha ma Jou wïtemo o Eliaika,

⁹ ”Oraha nënanga ngona kiani nöiki o Sarfat makotaika, itigi de o Sidon de nogogere dokengoka. Ngohi tomi hulokoka o bobao momatengo dokengoka hupaya munanga monihi döaka o inomo ngonaika.”

¹⁰Daha o Elia wöiki o Sarfatika. Maöraha womahi ädono o kota mangoranoka gënanga, ünanga womi make o bobao momatengo magogiria matoomu o gota hohi dofo-dofo. Daha o Elia womi temo o bobaoika gënanga, ”Ayo, nohi l̄ë o akere mahuhutulu mangale ngohi tokere.”

¹¹Maöraha o bobao gënanga magogiriaka moiki mo l̄ë o akere gënanga, o Elia womi boaka, ”Ayo, noaö o roti ma huhutulu.”

¹²Ma bobao gënanga mohaluhu, ”De ma Jou wowango-wango, ma Jou Madutu Bapa nihö huba-huba, ngohi tokoboto tongohi ahi roti koiwa. Tongohi duga-duga o gopunu o bokoto moi o mangkoka, de o zaitun maminya mahuhutulu o botoka. Ngohi magogiria to toomu o gota hohi dofo-dofo mangale tohihakai o gopunu mahuhutulu gënanga la ngohi de tongohi ahi ngohaka yakunu mia ol̄omo. Genangala tongomi mia inomo mabobaha; iböto gënanga ngomi kamio damä dika aha mihonenge.”

¹³”Uha nohawatere, Ayo!” o Elia womi temo munangika, ”Ika Ayo nodiai o inomo mangale Ayo de ani ngohaka Ayo. Mä kowahi de gënanga, nadiai ihira moi o roti mai teteke o gopunu de o minyaino gënanga, de naoino nenangino.

¹⁴Hababu ma Jou, ma Jou Madutu o Israeloka manyawa iwihö huba-huba, wotemo o mangko gënanga hoko genangika madol̄a o gopunu, de o boto gënanga hoko genangika madol̄a o minya hiädono maöraha ma Jou wohiguti o awana o duniauku.”

¹⁵Daha o bobao gënanga möiki madiai okia o Elia wotö temo-temoka. Daha önanga yaruange yawedono ima sadia manga inomo mangale madekanino o wange ihi getongo.

¹⁶De hokä ma Jou wotemoka o Eliaika, o mangko gënanga hoko genangika dika madol̄a o gopunu, de o boto gënanga hoko genangika madol̄a o minya.

¹⁷O öraha muruono naga ipaha o bobao gënanga ami ngohaka wopanyake. I holoi itedekana iholoi ikiria ai panyake hiädono ünanga wohonenge.

¹⁸Daha o bobao gënanga mitemo o Eliaika, ”Ma Jou Madutu Ai Gilaongo, yadodoa Bapa nodiai o hali nënanga ngohiino? Boteka Bapa noboa mangale idadi hababu ma Jou Madutu aha wohininga tongohi ahi baradoha, hiädono tongohi ahi ngohaka kiani wohonenge?”

¹⁹O Elia wohaluhu, ”Niaoino o ngohaka gënanga.” Daha o Elia wi l̄ë o ngohaka o nauru gënanga ngoi ayoka, de wiao makamari il̄o l̄oku-l̄oku il̄eoka, o kamari o Elia womahi dodogumikaoka. O Elia wirubaiha o ngohaka gënanga o dangiroka,

²⁰daha womä niata de ai ilingi makuatil̄e, ”ya Jou, ahi Jou Madutu, yadodoa Ngona Nohi boa o bodito nënanga o bobaouku nënanga? Munanga mohi hidöakoka o dodogumu ngohiino de o öraha nënanga ami ngohaka Ngona natoma!”

²¹ Iböto gënanga o Elia wohi gali mahange ai röehe widomotumuku o ngohaka gënanga ai l̄okuoka, daha womä niata, ”Ya Jou, ahi Jou Madutu, tanu nihi wango o ngohaka nënanga!”

²²Ma Jou woihene o Elia ai niata; o ngohaka gënanga mulaenge wo womaha de wowango okali.

²³Daha o Elia wo uti ai kamaroka de wa uku daha wi ao o ngohaka gënanga ngoi ayoika de wato, ”Ayo, nënanga ani ngohaka Ayo! Unanga wowango okali!”

²⁴O bobao gënanga mohaluhu, ”Oraha nënanga ngohi tohi öriki Bapa ganga ma Jou Madutu Ai gilaongo de ani demo Bapa igoungu itiai ma Jouino!”