Read Tobelo O KOKOANO MADODIHIRAKA 18 Bible Online

O KOKOANO MADODIHIRAKA 18 - Tobelo bible

O KOKOANO MADODIHIRAKA 18

¹Öraha muruono naga madekana ipaha, o taongo mahangeoka maöraha ihiwara gënanga, ma Jou wïtemo o Eliaika, ”Noiki nihimanga ma Koano Ahab, itedekanokaua Ngohi aha tohi guti o awana.”

²Daha o Elia womä jobo. Öraha gënanga o balä o habirokata duru kohagiriaka o Samariaka.

³Karana gënanga o Ahab wiahoko o Obaja mangale waino wihimanga. (O Obaja ganga o kadatoka manga tau manyawa manga baluhu. Unanga womatengo wagou-goungu wipuji ma Jouika.

⁴Maöraha o ngo Izebel mätoma ma Jou Ai nabi-nabi, o Obaja nënanga wäriwo o nabi yaratuhu moi de wangiunu önanga o aruku magoronaka — o aruku moi magoronaka o nyawa yamoritoa — ikali ünanga wahi döaka o inomo de o akere.)

⁵O Ahab wïtemo o Obajaika, ”Naino ngone hödagi ho ngika-ngino o berera nënanga ingodumu de holingiri o jobubu ekola o ngairi. Maraioka ngone aha ha make o momo mangale hohi halamati tongone nanga kuda de nanga bagal, hupaya iparalua ngone hatoma o dutu moiö tongone nanga aiwani o giginino.”

⁶Imahi kodoku iböto madaera aha yodö dagi-dagi gënanga, onangö ima jobo. O Ahab ai meta moiika de o Obaja ai meta mahomoaika.

⁷O ngekomo mahi dogoronaka o Obaja ima make de o Elia, wi nako iböto o Elia, o Obaja watilabukuku wihoromati daha wileha, ”Igoungu nënanga ma Bapa Elia?”

⁸”Igoungu, ngohi o Elia,” o Elia wohaluhu. ”Oraha nënanga nöiki nihi ngahu ani koanoika ngohi naga nenangoka.”

⁹O Obaja wohaluhu, ”Okia tongohi ahi howono hiädono Bapa nomau nohihi lapahi ngohi o Ahabika mangale wohi toma?

¹⁰De ma Jou wowango-wango, ma Jou Madutu nihö huba-huba Bapa, ngohi tonihi nyata ma koano wohi hulokoka ngohi toni lingiri Bapa okiaika honanga. Nako o berera moioka wakokuaha wotemo Bapa koiniwa dokengoka, o Ahab wogahoko hupaya o berera wakokuaha gënanga wokoboto igoungu Bapa woni makeua genangoka.

¹¹De öraha nënanga Bapa nomau hupaya ngohi töiki unangika de totemo Bapa naga nenangoka?

¹²Nako ngohi töikoka nenangoka, ma Jou Ai Womaha bote aha Iniao Bapa o ngï ngohi tanako-nakoikaua! De nako ngohi tohi ngahu o Ahabika Bapa naga nenangoka, ipaha ünanga woni makeua Bapa, maraioka ünanga aha wohi toma ngohi. Nohi öriki, Bapa, ngohi nënanga igou-goungu tipuji ma Jouika maöraha kahi etetekinohi!

¹³Boteka Bapa noihenuahi maöraha o ngo Izebel mä toma ma Jou Ai nabi-nabi, ngohi tangiunu önanga ya 100 o aruku magoronaka — o nyawa ya 50 o aruku moi magoronaka — de tahi döaka önanga o inomo de o akere?

¹⁴Öraha nënanga, yadodoa Bapa nohi huloko ngohi töiki tohi ngahu ma koanoika Bapa naga nenangoka? Maraioka ünanga aha wohi toma ngohi!”

¹⁵O Elia wohaluhu, ”De ma Jou WokokoKuaha ngohi tilö leleani, ngohi tojaji aha toboa mahirete tihimanga ma koano o wange nënanga dika.”

¹⁶Daha o Obaja woma jobo wohi ngahu ma koanoika, daha o Ahabö woma jobo mangale ima make de o Elia.

¹⁷Maöraha o Ahab wïmake o Elia, o Ahab wopöaka, ”Ne ünanga doka wororuaë o Israelokaka!”

¹⁸O Elia wohaluhu, ”Ngohi ua to roruaë, mä Jou Koano mahirete. Jou Koano de Jou Koano ani tau manyawa niroruaë. De nia huba o Baal magoma-gomanga, Jou Koano natilakuru ma Jou Ai tita.

¹⁹Oraha nënanga, napareta o Israeloka makawaha yongodumu mangale mima kamake dede ngohi o Karmel mal̄okuoka. Naoö o Baal manabi yaratuhu iata de yamoritoa de o Dewi Asyera yaratuhu iata gënanga mabö bangu-bangu ma jou boki Izebel.”

²⁰Daha o Ahab watoömu o kawaha mata-mata de o Baal ma nabi-nabi gënanga o Karmel mal̄okuika.

²¹Daha o Elia womahi tigi o kawahaika gënanga de wätemo, ”Hiadono öraha okia ngini nimau kahirahi nia hininga ihago? Nako ma Jou gënanga o Jou Madutu, niwi huba ma Jou! Nako o Baal gënanga o Jou Madutu, nia huba o Baal!” O kawaha ima totoomuino genangoka yori rïdoka.

²²Ipaha o Elia watemo, ”Ma Jou Ai nabi-nabi manga hidogoronaka duga-duga ngohi dika togö gogere, ena hioko nenangoka naga yaratuhu iata de yamoritoa o Baal ma nabi.

²³Öraha nënanga niao ino o hapi manauru o dutu hinoto. Nia huloko o Baal ma nabi-nabi gënanga yal̄ë o dutu moi de yatoaka, ipaha yalui-luiti daha yakelenga o gota ihi dofo-dofo mal̄okuoka. Mä önanga yakunua yatofo o uku genangoka. O hapi dutu moioli aha ngohi tohidiai hoko genangö. Ngohi aha tatoaka de talui-luiti ikali takelenga o gota ihi dofo-dofo ma l̄okuoka. Mä ngohiö aha tatofoua o uku genangoka.

²⁴Mal̄aika o Baal ma nabi-nabi gënanga imä niata toönanga manga gikirika, de ngohiö aha tomä niata ma Jouika. Wobaluhu de wohi dingoto o uku, Unangala ma Jou Madutu.” O kawaha yongodumu yohaluhu de manga ilingi makuatil̄e, ”Mihigoungu!”

²⁵Daha o Elia wätemo o Baal ma nabi-nabiika gënanga, ”Karana ngini niwoë, ika ngini nima ngiriki ihira mahapi de nihi diai, mä uha nia tofo o uku magotaoka. Iböto gënanga nima niata nia gikirika.”

²⁶Daha önanga ima ngiriki o hapi o dutu moi de ihi diai. Iböto gënanga önanga imä niata o Baalika o ngorumino hiädono o wange ikorona ikali ima pöa-pöaka, ”Nomi baluhu ngomi, Baal!” ”Onanga yadiai gënanga ikali gila-gila önanga yoselo-selo yakokiloliti toönanga manga huba mangï. Mä ka utu de koiwa mabobaluhu.

²⁷O wange ikorona o Elia mulaenge wähohedu önanga. ”Nima niata iholoi nia kuatil̄e! Koigoungua, ünanga o gikiri? Boteka ünanga magogiria kawoma totakihiriohi, ekola wo hupuoka maporetika. Mudukuaö ünanga magogiria woikoka! Ekola mudukua ünanga magogiria womä iduoka, de ngini kiani niwi tomanga ünanga!”

²⁸O nabi-nabi gënanga ima niata iholoioli ikuatil̄e. De hokä manga biaha önanga yadodiai, önanga yariri toönanga manga roëhe de o oworo de o kuama hiädono manga awunu iuihi.

²⁹Hoko gënanga önanga gila-gila hiädono o bimaoa, hokä o nyawa yapootekika o tokata. Mä koiwa yabaluhu, moiua ya legaika.

³⁰Daha o Elia wätemo o kawahaika gënanga yongodumu, ”Niaino nimahi tigi-tigino!” Önanga mata-mata ima toomu iwi higilolitino, ipaha ünanga mulaenge wohidiai ma Jou Ai huhuba mangï ikö kokiliangoka.

³¹ Unanga wal̄ë o helewo o gahumu ngimoi de hinoto, moi-moi o helewo yatagali o hoana moi o Yakub aihöana ngimoi de hinotoino, enagënanga o nyawa ma Jou wahirö roma-romangoka o Israeloka.

³²De o helewo-helewo gënanga o Elia wohi goko okaoli o huhuba mangï iwi hipö puji-puji ma Jouika mangï. O huba mangï yakilolitino gënanga ünanga wohaiti o goti yaoaka maamokika hiädono yakunu yoguhe o akere o litere ngimoi de motoa.

³³Unanga watatoro o gota ihi dofo-dofo o huhuba mangï mal̄okuoka, daha o hapi o dutu moi gënanga walui-luiti de wa kelengauku o gota gënanga mal̄okuoka. Ipaha ünanga wätemo, ”Nio guhe o rube iata de o akere hiädono iomanga, daha nio guhe o akere gënanga o huhuba i hi hö huba-huba de magota mal̄okuoka.” Onanga yadiai o hali gënanga iböto,

³⁴ünanga wätemo, ”Mamoi ohioli,” daha önanga yadiai. ”Mamoi ohioli,” o Elia wato, de önanga yadiaioli.

³⁵Daha o akere ihahuru yakilolitino o huba mangï gënanga hiädono o goti o i omanga o akere.

³⁶Maöraha yadonoka maöraha wohihuba o huhuba o bimaoa, ma Nabi Elia woma hitigi o huhuba mangï ika gënanga daha womä niata, ”Ya Jou, o Jou Madutu inihö huba-huba o Abraham, o Ishak de o Yakub, öraha nënanga Nohi matoko Ngonala o Jou Madutu o Israelokaka, de ngohi Ani gilaongo. Nohi matoko hagala ngohi tadö dodiai nënanga ganga mangale Ani pareta.

³⁷Nobaluhu, ya Jou! Nohi baluhu ngohi hupaya o kawaha nënanga inihiöriki Ngona, ya Jou, ganga o Jou Madutu, de Ngona nädiai önanga ima idulu Ngonaika.”

³⁸Daha ma Jou wohi dingoto o uku o dihanguku de yatuhuku youku o huhuba gënanga ima kinïki magota ihi dofo-dofo, ma helewo-helewo de matonaka ikali ya al̄eme yamata o akere naga o goti magoronaka gënanga.

³⁹Maöraha o kawaha yamake o hali gënanga önanga imahi tudukuku o tonakuku daha yotemo, ”Ma Jou gënanga o Jou Madutu! Igoungu ma Jou gënanga o Jou Madutu!”

⁴⁰Daha o Elia wätemo, ”Nia tagoko o Baal manabi-nabi gënanga! Uha nia mal̄a yo otana kaima tengö ma!” Daha hagala o nyawa yatagoka o Baal ma nabi-nabi gënanga, ipaha o Elia wa ao önanga o Kison ma Ngairika de dokengoka ünanga wä toma önanga mata-mata.

⁴¹Iböto gënanga o Elia witemo ma Koano Ahabika, ”Öraha nënanga kayaoa Jou Koano nöiki nol̄omo! Öraha mahuhutulohi aha o awana, hababu maruruhu ho ihenoka.”

⁴² Daha o Ahab wöiki wol̄omo, de o Elia wo doa o Karmel mal̄okuil̄e. Dokengoka ünanga wa tilabukuku de ai biono o tonakuku ai buku hinoto mahi dogoronaka.

⁴³Wi loleleanika ünanga wïtemo, ”Nodoa matubu il̄e de nolega nameta o ngötoko.” O gilaongo gënanga wodoa, daha wolio de wato, ”Okia-kiaua ngohi tamake.” Hiädono higali matumidi o Elia wïhuloko ai gilaongo wodoa wouti mangale wolega.

⁴⁴Higali matumidoka o gilaongo gënanga wolio de wato, ”Ngohi tamake o lobi hö giama mahoata mame ngeteke o ngötoka de yaiha.” Daha o Elia witemo ai gilaongika, ”Noiki ma Koano Ahabika, nihuloko ünanga wodoa ai kuretail̄e de wolio o awana iwi hida tatokuahi ünanga.”

⁴⁵Ho lako dadawi dika magoronaka o dihanga idadi kai hohonguku, de o hidal̄oko ipoputurungu iwuwu ikali o awana iriki-rikimö mulaenge iuti. O Ahab wodoa ai kureta il̄e daha wolio o Yizreelika.

⁴⁶Öraha gënanga o Elia wamake o kuata ma Jouino. Unanga watupukoril̄e ai juba de wohi likoino ai goronaino daha woma popäta o ngekomo magurutu wihihira o Ahab hiädono o Yizreel ma kota mangorana maamo-amokika.